ಕೊಡಗಿನ ಪವಿತ್ರ ನೆಲ ತಲಕಾವೇರಿಯಲ್ಲಿ ಇಂದು ರಾತ್ರಿ 7.50ಕ್ಕೆ ಪುಣ್ಯದ ಗಳಿಗೆ. ನಮ್ಮ ಕಾವೇರಿ ತಾಯಿ ತೀರ್ಥರೂಪಿಣಿಯಾಗಿ ಉದ್ಭವಿಸಿ, ಲೋಕಕ್ಕೆ ಜೀವಜಲವಾಗಿ ಹರಿಯುವ ದಿವ್ಯ ಕ್ಷಣ. ತುಲಾ ಸಂಕ್ರಮಣದ ಈ ಪುಣ್ಯ ಮುಹೂರ್ತದಲ್ಲಿ ಬ್ರಹ್ಮ ಕುಂಡಿಕೆಯಲ್ಲಿ ತೀರ್ಥ ಉಕ್ಕಿ ಬಂದಾಗ, ಭಕ್ತರ ಮನದಲ್ಲಿ ಭಕ್ತಿ ಉಕ್ಕಿ ಬರುತ್ತದೆ.
ಕಾವೇರಿ ಕೇವಲ ನದಿಯಲ್ಲ, ಅವಳು ನಮ್ಮ ತಾಯಿ, ನಮ್ಮ ಸಂಸ್ಕೃತಿ, ನಮ್ಮ ಬದುಕು. ಕೊಡಗಿನ ಬೆಟ್ಟದಲ್ಲಿ ಹುಟ್ಟಿ, ಮೈಸೂರು ಮಂಡ್ಯದ ಮೂಲಕ ಹರಿದು ತಮಿಳುನಾಡಿನವರೆಗೂ ಕೋಟಿ ಜನರ ದಾಹ ತಣಿಸುವ ಜೀವನದಿ. ಈ ನದಿಯ ದಡದಲ್ಲಿ ನಮ್ಮ ನಾಗರಿಕತೆ ಬೆಳೆದಿದೆ.
ಈ ಪವಿತ್ರ ದಿನದಂದು ತಾಯಿ ಕಾವೇರಿ ನಾಡಿಗೆ ಸುಖ, ಶಾಂತಿ, ಸಮೃದ್ಧಿ ಹಾಗೂ ಉತ್ತಮ ಮಳೆ ಬೆಳೆ ಕೊಡಲಿ ಎಂದು ಪ್ರಾರ್ಥಿಸೋಣ. ಎಲ್ಲರೂ ತಮ್ಮ ಮನೆಗಳಲ್ಲಿ ಕಾವೇರಿ ಮಾತೆಯನ್ನು ಸ್ಮರಿಸಿ, ನದಿ ಸ್ವಚ್ಛತೆ ಹಾಗೂ ಪಾವಿತ್ರ್ಯತೆ ಕಾಪಾಡುವ ಸಂಕಲ್ಪ ಮಾಡೋಣ.
ಮತ್ತೊಮ್ಮೆ ಎಲ್ಲಾ ಕೊಡಗಿನ ಬಂಧುಗಳಿಗೆ ಹಾಗೂ ನಾಡಿನ ಸಮಸ್ತ ಜನತೆಗೆ ಕಾವೇರಿ ತೀರ್ಥೋದ್ಭವದ ಹಾರ್ದಿಕ ಶುಭಾಶಯಗಳು.
