ಬದುಕಿನಲ್ಲಿ ಲಗಾಮಿಲ್ಲದ ಕುದುರೆಯಂತೆ ಓಡುವ ಮುನ್ನ ನಿಧಾನಿಸು… ನಿಧಾನಿಸು…!

ಇಂದಿನ ಆಧುನಿಕ ಜೀವನದಲ್ಲಿ ವೇಗವೇ ಎಲ್ಲವೂ ಆಗಿದೆ. ಪ್ರತಿಯೊಬ್ಬರೂ ಓಡಾಡುತ್ತಿದ್ದಾರೆ, ಆದರೆ ಎಲ್ಲಿಗೆ ಎಂಬುದು ತಿಳಿಯದೆ, ಗುರಿಯಿಲ್ಲದೆ…. ಈ ಜಂಜಾಟದಲ್ಲಿ ನಾವು ಜೀವನದ ಸೌಂದರ್ಯವನ್ನು, ಶಾಂತಿಯನ್ನು ಮತ್ತು ನಮ್ಮ ಸ್ವಂತ ಅಸ್ತಿತ್ವವನ್ನೇ ಮರೆತುಬಿಟ್ಟಿದ್ದೇವೆ. ಈ ಸಂದರ್ಭದಲ್ಲಿ “ನಿಧಾನಿಸು” ಎಂಬ ಸಂದೇಶವು ಅತ್ಯಂತ ಮಹತ್ವದ್ದಾಗಿದೆ.

ಇಂದಿನ ವೇಗದ ಜೀವನದಲ್ಲಿ “ನಿಧಾನವೇ ಪ್ರಧಾನ” ಎಂಬ ಮಾತು ನಮಗೆ ದೊಡ್ಡ ಪಾಠವಾಗಿದೆ. ನಾವು ಮಾಡುವ ಪ್ರತಿಯೊಂದು ಕೆಲಸದಲ್ಲೂ ವೇಗ ಹೆಚ್ಚಿದಂತೆ ತಪ್ಪುಗಳಾಗುವ ಸಾಧ್ಯತೆ ಹೆಚ್ಚುತ್ತದೆ. ಆದರೆ ನಿಧಾನವಾಗಿ, ಮನಸ್ಸು ಸಮಾಧಾನವಾಗಿರಿಸಿಕೊಂಡು, ಒಂದೊಂದು ಹಂತದಲ್ಲಿಯೂ ಸ್ಪಷ್ಟತೆ ಅರಿತು ಮುನ್ನಡೆದರೆ ಫಲಿತಾಂಶವು ಉತ್ತಮವಾಗಿಯೇ ಬರುತ್ತದೆ..

ಮರ ಬೆಳೆಯುವುದಕ್ಕೂ, ಬಿತ್ತನೆ ಮಣ್ಣಾಗುವುದಕ್ಕೂ, ಮಳೆ ಬೀಳುವುದಕ್ಕೂ ತನ್ನ ಸಮಯ ಬೇಕಾದಂತೆ, ನಮ್ಮ ಜೀವನದಲ್ಲೂ ಪ್ರತಿಯೊಂದು ಸಾಧನೆಗೆ ಸಹ ಶಾಂತಿ ಮತ್ತು ಧೈರ್ಯ ಬೇಕಾಗುತ್ತದೆ. ಓಟದಲ್ಲಿ ನಿಧಾನವಾಗಿ ಆದರೆ ಸ್ಥಿರವಾಗಿ ಓಡುವ ಆಮೆ ಕೊನೆಗೆ ಗೆಲ್ಲುವ ಕಥೆಯೂ ಇದೇ ಸಂದೇಶ ನೀಡುತ್ತದೆ

ನಿಧಾನವಾಗಿ ಮಾತನಾಡುವವರು ಮಾತಿನ ಅರ್ಥವನ್ನು ಚೆನ್ನಾಗಿ ತಲುಪಿಸುತ್ತಾರೆ; ನಿಧಾನವಾಗಿ ಕಲಿಯುವವರು ವಿಷಯವನ್ನು ಆಳವಾಗಿ ಅರ್ಥಮಾಡಿಕೊಳ್ಳುತ್ತಾರೆ. ಕೆಲಸದಲ್ಲೂ ನಿಧಾನವಾಗಿ, ಕ್ರಮಬದ್ಧವಾಗಿ ಮಾಡಿದರೆ ಗುರಿ ದೂರವಾಗಿರುವಂತೆ ಕಂಡರೂ ಕೊನೆಗೆ ಅತೀ ಉತ್ತಮ ಫಲ ಸಿಗುತ್ತದೆ. ಹೀಗಾಗಿ, ಜೀವನದಲ್ಲಿ ಯಶಸ್ಸು ಬೇಕಾದರೆ ಅಥವಾ ಸಂತೋಷ ಬೇಕಾದರೂ ಒಂದೇ ಮಂತ್ರ  “ನಿಧಾನವೇ ಪ್ರಧಾನ.”

ವೇಗದ ಜೀವನದ ಪರಿಣಾಮಗಳು ಏನೇನು?

ತಂತ್ರಜ್ಞಾನದ ಅಭಿವೃದ್ಧಿಯು ನಮಗೆ ಅನೇಕ ಅನುಕೂಲಗಳನ್ನು ತಂದಿದ್ದರೂ, ನಮ್ಮ ಜೀವನವನ್ನು ಅಸಹನೀಯ ವೇಗದತ್ತ ತಳ್ಳಿದೆ. ಮೊಬೈಲ್, ಇಂಟರ್ನೆಟ್, ಸಾಮಾಜಿಕ ಮಾಧ್ಯಮಗಳು ನಮ್ಮನ್ನು ಸದಾ ಕಾರ್ಯನಿರತರನ್ನಾಗಿಸಿವೆ. ನಾವು ಮಲಗುವಾಗಲೂ ಫೋನ್ ಕೈಯಲ್ಲಿ, ಎದ್ದ ಕೂಡಲೇ ಫೋನ್ ತೆಗೆದುಕೊಳ್ಳುತ್ತೇವೆ. ಈ ನಿರಂತರ ವ್ಯಸ್ತತೆಯು ಮಾನಸಿಕ ಆರೋಗ್ಯದ ಮೇಲೆ ಋಣಾತ್ಮಕ ಪ್ರಭಾವ ಬೀರುತ್ತಿದೆ.

ನಿಧಾನಗೊಳಿಸುವುದರ ಮಹತ್ವವೆಂದರೆ, ನಿಧಾನಿಸುವುದು ಎಂದರೆ ಸೋಮಾರಿತನವಲ್ಲ. ಅದು ಜೀವನವನ್ನು ಸಂಪೂರ್ಣವಾಗಿ ಅನುಭವಿಸುವ ಕಲೆ. ನಾವು ನಿಧಾನವಾಗಿ ನಡೆದಾಗ, ಸುತ್ತಮುತ್ತಲಿನ ಪ್ರಕೃತಿಯ ಸೌಂದರ್ಯವು ಕಾಣುತ್ತದೆ. ನಿಧಾನವಾಗಿ ತಿಂದಾಗ, ಆಹಾರದ ರುಚಿ ಅರ್ಥವಾಗುತ್ತದೆ. ನಿಧಾನವಾಗಿ ಮಾತನಾಡಿದಾಗ, ಪದಗಳ ಅರ್ಥ ಪ್ರಾಮುಖ್ಯ ಪಡೆಯುತ್ತದೆ.

ನಮ್ಮ ಪೂರ್ವಜರು ನಿಧಾನ ಜೀವನವನ್ನು ನಡೆಸಿದರು. ಅವರು ಪ್ರಕೃತಿಯೊಂದಿಗೆ ಸಾಮರಸ್ಯದಿಂದ ಬದುಕಿದರು. ಸೂರ್ಯೋದಯದೊಂದಿಗೆ ಎದ್ದು, ಸೂರ್ಯಾಸ್ತದೊಂದಿಗೆ ವಿಶ್ರಾಂತಿ ಪಡೆದರು. ಇಂದು ನಾವು ಪ್ರಕೃತಿಯ ಲಯವನ್ನು ಮರೆತು, ಕೃತಕ ವೇಗದಲ್ಲಿ ಬದುಕುತ್ತಿದ್ದೇವೆ.

ನಿಧಾನ ಜೀವನದ ಪ್ರಯೋಜನಗಳು

ನಿಧಾನವಾದ ಜೀವನಶೈಲಿಯು ಅನೇಕ ಆರೋಗ್ಯ ಪ್ರಯೋಜನಗಳನ್ನು ನೀಡುತ್ತದೆ. ಒತ್ತಡ ಕಡಿಮೆಯಾಗುತ್ತದೆ, ರಕ್ತದೊತ್ತಡ ನಿಯಂತ್ರಣದಲ್ಲಿರುತ್ತದೆ, ನಿದ್ರೆಯ ಗುಣಮಟ್ಟ ಸುಧಾರಿಸುತ್ತದೆ. ಮನಸ್ಸಿಗೆ ಶಾಂತಿ ಸಿಗುತ್ತದೆ, ಸೃಜನಶೀಲತೆ ಹೆಚ್ಚುತ್ತದೆ. ಕುಟುಂಬ ಸದಸ್ಯರೊಂದಿಗೆ ಗುಣಮಟ್ಟದ ಸಮಯ ಕಳೆಯಲು ಸಾಧ್ಯವಾಗುತ್ತದೆ.

ಧ್ಯಾನ, ಯೋಗ, ಓದುವಿಕೆ, ಕಲೆ ಮುಂತಾದ ಚಟುವಟಿಕೆಗಳಿಗೆ ಸಮಯ ಸಿಗುತ್ತದೆ. ನಮ್ಮ ಆಂತರಿಕ ಸ್ವರೂಪವನ್ನು ತಿಳಿದುಕೊಳ್ಳಲು ಅವಕಾಶ ದೊರೆಯುತ್ತದೆ. ಜೀವನದ ನಿಜವಾದ ಉದ್ದೇಶ ಏನೆಂಬುದು ಅರ್ಥವಾಗುತ್ತದೆ.

ನಿಧಾನವಾಗುವುದು ಸರಳವಾದರೂ, ಅದು ಸವಾಲಿನ ಸಂಗತಿ. ಮೊದಲು ನಾವು ನಮ್ಮ ದಿನಚರಿಯಲ್ಲಿ ಅನಗತ್ಯ ಚಟುವಟಿಕೆಗಳನ್ನು ಗುರುತಿಸಬೇಕು. ಸಾಮಾಜಿಕ ಮಾಧ್ಯಮದಲ್ಲಿ ಕಳೆಯುವ ಸಮಯವನ್ನು ಕಡಿಮೆ ಮಾಡಬೇಕು. ಪ್ರತಿದಿನ ಕನಿಷ್ಠ ಹತ್ತು ನಿಮಿಷ ಮೌನವಾಗಿ ಕುಳಿತು ಧ್ಯಾನ ಮಾಡಬೇಕು.

ಪ್ರಕೃತಿಯಲ್ಲಿ ಸಮಯ ಕಳೆಯುವುದು,  ಸ್ವಲ್ಪ ಹೊತ್ತು ನಮ್ಮವರೊಂದಿಗೆ ಕಾಲ ಕಳೆಯುವುದು, ಕೈತೋಟ ಮಾಡುವುದು, ನಡೆಯುವುದು, ಹಸಿರು ಪ್ರದೇಶಗಳಿಗೆ ಭೇಟಿ ನೀಡುವುದು ಮುಖ್ಯವಾಗಿದೆ. ಬಹು-ಕಾರ್ಯ (multitasking) ಮಾಡುವುದನ್ನು ತಪ್ಪಿಸಿ, ಒಂದೊಂದು ಕೆಲಸವನ್ನು ಪೂರ್ಣ ಗಮನದಿಂದ ಮಾಡಬೇಕು. ಪ್ರತಿಯೊಂದು ಕ್ಷಣವನ್ನು ಅರಿವಿನಿಂದ ಅನುಭವಿಸಬೇಕು.

” ನಿಧಾನಿಸು” ಎಂಬ ಸಂದೇಶದಲ್ಲೇನಿದೆ?

“ನಿಧಾನಿಸು ನಿಧಾನಿಸು” ಎಂಬ ಸಂದೇಶವು ಕೇವಲ ವೇಗವನ್ನು ಕಡಿಮೆ ಮಾಡುವ ಬಗ್ಗೆ ಮಾತ್ರವಲ್ಲ. ಇದು ಜೀವನದಲ್ಲಿ ಅರ್ಥಪೂರ್ಣವಾಗಿ ಬದುಕುವ ತತ್ವ. ವೇಗವು ನಮ್ಮನ್ನು ಗುರಿಗೆ ಬೇಗ ಕೊಂಡೊಯ್ಯಬಹುದು, ಆದರೆ ಪ್ರಯಾಣದ ಸೌಂದರ್ಯವನ್ನು ನಾವು ಕಳೆದುಕೊಳ್ಳುತ್ತೇವೆ. ಜೀವನವು ಗುರಿಯಲ್ಲಿ ಮಾತ್ರವಲ್ಲ, ಪ್ರಯಾಣದಲ್ಲಿಯೂ ಇದೆ.

ನಮ್ಮ ಪ್ರಾಚೀನ ಸಂಸ್ಕೃತಿ ನಮಗೆ ಸಮತೋಲನದ ಪಾಠ ಕಲಿಸುತ್ತದೆ. “ಯೋಗಸ್ಥಃ ಕುರು ಕರ್ಮಾಣಿ” ಎಂಬ ಗೀತೆಯ ಸಂದೇಶವು ಶಾಂತ ಮನಸ್ಸಿನಿಂದ ಕರ್ತವ್ಯ ನಿರ್ವಹಿಸುವುದನ್ನು ಹೇಳುತ್ತದೆ. ನಾವು ನಿಧಾನಿಸಿದಾಗ, ನಮ್ಮ ಜೀವನವು ಹೆಚ್ಚು ಶ್ರೀಮಂತವಾಗುತ್ತದೆ, ಹೆಚ್ಚು ಅರ್ಥಪೂರ್ಣವಾಗುತ್ತದೆ ಮತ್ತು ಹೆಚ್ಚು ಆನಂದಮಯವಾಗುತ್ತದೆ.

ಆದ್ದರಿಂದ, ನಾವೆಲ್ಲರೂ ನಮ್ಮ ಜೀವನದಲ್ಲಿ ನಿಧಾನವೇ ಪ್ರಧಾನವೆಂಬಂತೆ ನಿಧಾನವಾಗಿ ಸಾಗೋಣ.ನಿಧಾನಿಸೋಣ ಮತ್ತು ಜೀವನದ ಪ್ರತಿಯೊಂದು ಕ್ಷಣವನ್ನೂ ಸಂಪೂರ್ಣವಾಗಿ ಅನುಭವಿಸೋಣ. ಸ್ನೇಹಿತರೆ ಯಾವ ವಿಷಯಕ್ಕೂ ನಾವು ಅವಸರ ಪಡದೆ ನಿಧಾನವಾಗಿ ಯೋಚಿಸಿ ಮುನ್ನಡೆಯೋಣ. ಯಾರ ಮನಸ್ಸಿಗೂ ನೋವು ಮಾಡದೆ ನಿಧಾನವಾಗಿ ನಮ್ಮ ಗುರಿಯನ್ನು ಸಾಧಿಸೋಣ. ಏನಂತಿರಾ?

ವಿಭಿನ್ನ ವಿಶಿಷ್ಟ ರೀತಿಯ ಇನ್ನಷ್ಟು ಲೇಖನಗಳನ್ನು ಓದಲು ಇದರ ಮೇಲೆ ಕ್ಲಿಕ್ ಮಾಡಿ…