ನವರಾತ್ರಿ ಸಂಭ್ರಮ… ಆಯುಧಪೂಜೆ… ದಸರಾ ಸಡಗರ…ಕುಮಾರಕವಿ ನಟರಾಜರಿಗೆ ಕಂಡಿದ್ದು ಹೀಗೆ..

ಮಹಾನವಮಿ ಆಯುಧಪೂಜೆ ಅಂದ್ರೆ ಸುಮ್ನೆನಾ? ಇದು ಹತ್ತು ಹಲವು ವಿಶೇಷತೆಗಳ ಮಹಾಸಂಗಮ.. ನಿತ್ಯ ಬದುಕಿಗೆ ಆಸರೆಯಾಗಿರುವ ನಿರ್ಜೀವಿಯಾದರೂ ನಮಗೆ ಜೀವವಾಗಿರುವ ವಾಹನ, ಉಪಕರಣ, ಹತ್ಯಾರು ಹೀಗೆ ಎಲ್ಲದಕ್ಕೂ ಪೂಜೆ ಸಲ್ಲಿಸಿ ಕಾಪಾಡೆಂದು ಪ್ರಾರ್ಥಿಸುವ  ಕ್ಷಣವಾಗಿದೆ. ರಾಜರ ಕಾಲದಲ್ಲಿ ಆಯುಧವೇ ಎಲ್ಲವೂ ಆಗಿತ್ತು. ರಾಜ್ಯದ ಮೇಲೆ ದಂಡೆತ್ತಿ ಬರುವ ಶತ್ರುಗಳನ್ನು ನಿಗ್ರಹಿಸಲು ಆಯುಧದ ಅನಿವಾರ್ಯತೆಯಿತ್ತು. ಆ ಆಯುಧಗಳು ದೇಶವನ್ನು ರಕ್ಷಿಸುವ ಸಾಧನವಾಗಿದ್ದವು. ಹೀಗಾಗಿ ಅವುಗಳಿಗೆ ಪೂಜೆ ಸಲ್ಲಿಸಿ ದುಷ್ಠರ ಸಂಹಾರಕ್ಕೆ ಅಭಯ ನೀಡೆಂದು ಬೇಡಿಕೊಳ್ಳಲಾಗುತ್ತಿತ್ತು.

ಇವತ್ತಿನ ಪ್ರಜಾಪ್ರಭುತ್ವ ಕಾಲದಲ್ಲಿಯೂ ಯುದ್ಧ ನಿಂತಿಲ್ಲ  ಅದು ಮುಂದುವೆರೆದಿದೆ. ನಮ್ಮ ಭಾರತ ಯಾವತ್ತೂ ಯಾರ ಮೇಲೆಯೂ ದಂಡೆತ್ತಿ ಹೋಗಿಲ್ಲ. ಆದರೆ ನಮ್ಮ ಮೇಲೆ ದಂಡೆತ್ತಿ ಬಂದವನ್ನು ಬೆಂಡೆತ್ತಿ ಕಳುಹಿಸುವುದರಲ್ಲಿ ಹಿಂದೆ ಬಿದ್ದಿಲ್ಲ. ಇದೆಲ್ಲದರ ನಡುವೆ ನಾವು ನೀವು ಎಲ್ಲರೂ ನಿತ್ಯವೂ ಬದುಕಿಗಾಗಿ ಹೋರಾಡ ಬೇಕಾಗಿದೆ. ಈ ಹೋರಾಟಕ್ಕೆ ನಾವು ನಮ್ಮದೇ ಆದ ಆಯುಧಗಳನ್ನು ಬಳಸುತ್ತಿದ್ದೇವೆ. ಎಲ್ಲವನ್ನೂ ಪೂಜಿಸುವ  ಈ ಕ್ಷಣಗಳು ಎಲ್ಲರಿಗೂ ಒಳಿತಾಗಲಿ…

ಇಷ್ಟಕ್ಕೂ ನವರಾತ್ರಿ, ಆಯುಧಪೂಜೆ, ವಿಜಯದಶಮಿ ಎಲ್ಲದಕ್ಕೂ ತನ್ನದೇ ಆದ ವಿಶೇಷತೆಯಿದೆ.. ಅದರ ಹಿಂದೆ ಪೌರಾಣಿಕ ಐತಿಹಾಸಿಕ ಚರಿತ್ರೆಯಿದೆ. ಆಯುಧಪೂಜೆ ಮತ್ತು ದಸರಾ ಪ್ರತಿಯೊಬ್ಬರ ಕಣ್ಣುಗಳಿಗೂ ವಿಭಿನ್ನವಾಗಿ ಗೋಚರಿಸುತ್ತದೆ. ನೋಡುವ ಮನಸ್ಸು ನಮ್ಮದಾಗಬೇಕಷ್ಟೆ…  ಕವಿಯೂ ಆಗಿರುವ ಕುಮಾರಕವಿ ನಟರಾಜ ಅವರಿಗೆ ನವರಾತ್ರಿ ಗೋಚರಿಸಿದ್ದೇಗೆ? ಇಲ್ಲಿದೆ ಓದಿಬಿಡಿ…

ದಸರ ಹಬ್ಬದ ಹತ್ತನೇ ದಿನ ವಿಜಯದಶಮಿ

ಇದಕ್ಕು ಮುನ್ನ 9ನೇ ದಿನವು ಮಹಾನವಮಿ

ಆಯುಧ ಪೂಜೆಯ ಭವ್ಯದ ಮಹಾಸುದಿನ

ಸಿದ್ಧಿಧಾತ್ರಿ ನವದುರ್ಗೆಯ ನವರಾತ್ರಿ ಕಾರಣ

ಲೋಹಕಲ್ಲುಮಣ್ಣುಮರ ಮುಂತಾದ ಸಾಧನ

ಕತ್ತಿಗುರಾಣಿ ರಥತೇರು ಚಾಕುಚೂರಿ ಚಕ್ರವಾಹನ

ಪ್ರತಿಯೊಂದು ಆಯುಧ ಸಲಕರಣೆ ಸಾಮಾನ

ಎಲೆಕ್ಟ್ರಿಕಲ್ ಎಲೆಕ್ಟ್ರಾನಿಕ್ಸ್ ಇತ್ಯಾದಿ ಉಪಕರಣ

ಮೊಳೆಆಣಿ ಕತ್ತಿಸುತ್ತಿಗೆ ಮೊದಲಾದ ಸಲಕರಣ

ಅರಮನೆ ಕಿರುಮನೆ ಗುರುಮನೆ ಅಡುಗೆಮನೆ

ಪಂಚಲೋಹ ಪಿಂಗಾಣಿ ಬೆಳಗಿತೊಳ್ದು ತಂದಾನೆ

ಗಂಧಚಂದನ ಅರ್ಶಿನಕುಂಕುಮ ವಿಭುತಿಬಳ್ದಾನೆ

ತುಳಸೀಬಿಲ್ವಪತ್ರೆ ಧವನಮರುಗದಿಂದ ಸಿಂಗರಿಸಿ

ಗುಲಾಬಿಸೇವಂತಿಗೆ ಮಲ್ಲಿಗೆಸಂಪಿಗೆಹೂ ಮುಡಿಸಿ

ಗಂಧದಕಡ್ಡಿ ಸಾಮ್ರಾಣಿ ಕರ್ಪೂರದಾರತಿ ಬೆಳಗಿಸಿ

ಬೂದಗುಂಬ್ಳ ಇಳಿತೆಗೆದು ಈಡ್ಗಾಯಿ ನೆಲಕ್ಕೊಡೆಸಿ

ಬೆಲ್ಲತೆಂಗು ಬೂಂದಿಮಿಶ್ರಿತ ಕಡ್ಲೇಪುರಿ ಮುಕ್ಕಿಸಿ

ಇನಾಂ ಭಕ್ಷೀಸ್ ಕಾಣಿಕೆನೀಡಿ ಬಗೆಬಗೆಸಿಹಿ ತಿನಿಸಿ

ಬಡವ ಬಲ್ಲಿದ ಪಂಡಿತ ಪಾಮರ ಪ್ರಬುದ್ಧ

ಆಳರಸ ಆಳುಮಗ ಆಬಾಲವೃದ್ಧ ಸಬದ್ಧ

ಮಹಿಳೆ ಮಕ್ಕಳಾದಿಯಾಗಿ ಸರ್ವಜನಾಂಗದ

ಸಕಲ ಸಮುದಾಯದ ಸತ್ಸಂಪ್ರದಾಯದ

ಭೇದಭಾವವಿಲ್ಲದ ಭಾರತೀಯರೆಲ್ಲ ಆಚರಿಸೊ

ಉಲ್ಲಾಸ ಉತ್ಸಾಹ ಸಡಗರ ಸಂಭ್ರಮದ

ಮಹೋನ್ನತ ಮಹೋತ್ಸವ ನವರಾತ್ರಿ ಹಬ್ಬದ

ಹರ್ಷೋದ್ಗಾರದ ಬೊಂಬಾಟ್ ವಾರ್ಷಿಕೋತ್ಸವ

ಮಹಾನವಮಿ ಆಯುಧಪೂಜೆ ಭರ್ಜರಿ ಉತ್ಸವ!