ಮೈಸೂರು: ಜಿಲ್ಲೆಯ ಸರಗೂರು ತಾಲೂಕು ವ್ಯಾಪ್ತಿಯ ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶದ ವ್ಯಾಪ್ತಿಯಲ್ಲಿರುವ ಬೇಲದಕುಪ್ಪೆ ಶ್ರೀ ಮಹದೇಶ್ವರ ಸ್ವಾಮಿ ದೇವಸ್ಥಾನದಲ್ಲಿ ಕಾರ್ತಿಕ ಮಾಸದ ಜಾತ್ರಾ ಮಹೋತ್ಸವ ಸಡಗರ ಸಂಭ್ರಮದೊಂದಿಗೆ ಸಂಪ್ರದಾಯಬದ್ಧವಾಗಿ ನಡೆಯಿತು. ಈ ವೇಳೆ ಹಾಲರವಿ ಸೇವೆ ಹಾಗೂ ಕೊಂಡೋತ್ಸವವು ವಿಜೃಂಭಣೆಯಿಂದ ಜರುಗಿತು. ಭಕ್ತರು ದೇವರಿಗೆ ಪೂಜೆ ಸಲ್ಲಿಸಿ ಅವರ ಇಷ್ಟಾರ್ಥಗಳನ್ನು ಬೇಡಿಕೊಂಡರು.
ಆದರೆ ಜಾತ್ರೆಯಲ್ಲಿನ ಅವ್ಯವಸ್ಥೆಗೆ ಭಕ್ತರು ತಮ್ಮ ಆಕ್ರೋಶವನ್ನು ಹೊರ ಹಾಕುತ್ತಿದ್ದ ದೃಶ್ಯಗಳು ಕಂಡು ಬಂದವು. ಪ್ರತಿವರ್ಷೂ ಜಾತ್ರೆ ನಡೆಯುತ್ತಿದ್ದು, ಉತ್ತಮ ವ್ಯವಸ್ಥೆಯೊಂದಿಗೆ ನಡೆಯುತ್ತಿತ್ತು. ಆದರೆ ಈ ದೇವಸ್ಥಾನ ಎರಡು ವರ್ಷಗಳ ಹಿಂದೆ ಮುಜರಾಯಿ ಇಲಾಖೆಗೆ ಸೇರಿಕೊಂಡ ಬಳಿಕ ಜಾತ್ರಾ ಸಿದ್ಧತೆ ಹಾಗೂ ವ್ಯವಸ್ಥೆಯನ್ನು ಒದಗಿಸುವಲ್ಲಿ ಲೋಪದೋಷಗಳು ಕಂಡು ಬರುತ್ತಿದ್ದು, ಭಕ್ತರು ಪರದಾಡುವಂತಾಗಿದೆ.
ಈ ಹಿಂದೆ ಜಾತ್ರಾ ಕಮಿಟಿಯ ಅಧ್ಯಕ್ಷರು ಮತ್ತು ಪದಾಧಿಕಾರಿಗಳ ನೇತೃತ್ವದಲ್ಲಿ ಅರಣ್ಯ ಇಲಾಖೆ, ತಾಲೂಕು ಆಡಳಿತ ಮತ್ತು ಬೇರೆ ಸರ್ಕಾರಿ ಘಟಕಗಳ ಸಹಕಾರದಿಂದ ಜಾತ್ರೆಯನ್ನು ಯಶಸ್ವಿಯಾಗಿ ನಡೆಸಲಾಗುತ್ತಿತ್ತು. ವರ್ಷಕ್ಕೆ ಸರಾಸರಿ 50 ಸಾವಿರಕ್ಕೂ ಹೆಚ್ಚು ಭಕ್ತರು ಭಾಗವಹಿಸುವ ಈ ಜಾತ್ರೆಯಲ್ಲಿ ಮೂರು ದಿನಗಳ ಕಾಲ ಅನ್ನದಾಸೋಹ, ಉಚಿತ ಪ್ರಸಾದದ ಬಟ್ಟೆ ಚೀಲ ವಿತರಣೆ, ಭದ್ರತೆ ಮತ್ತು ಸ್ವಚ್ಛತೆ ಸೇರಿದಂತೆ ಎಲ್ಲಾ ವ್ಯವಸ್ಥೆಗಳು ಸಮರ್ಪಕವಾಗಿದ್ದವು. ಆದರೆ ಈ ಬಾರಿ ಮುಜರಾಯಿ ಇಲಾಖೆ ನೇರವಾಗಿ ಜವಾಬ್ದಾರಿ ಹೊತ್ತಿದ್ದರೂ ಮೂಲಭೂತ ವ್ಯವಸ್ಥೆಗಳಲ್ಲೇ ದೊಡ್ಡ ಮಟ್ಟದ ಲೋಪಗಳು ಕಂಡು ಬಂದಿವೆ.
ಚೈನ್‌ಗೇಟ್‌ನಿಂದ ದೇವಸ್ಥಾನದವರೆಗೆ 100 ಕ್ಕೂ ಹೆಚ್ಚು ಕೆಎಸ್‌ ಆರ್‌ ಟಿಸಿ ಬಸ್‌ಗಳು ಸಂಚಾರ ನಡೆಸಿದರೂ, ರಸ್ತೆಗಳಲ್ಲಿ ನೀರಿನ ಸಿಂಪಡಣೆ ಸಮರ್ಪಕವಾಗಿ ಮಾಡದ ಕಾರಣ ಭಕ್ತರು ಕೆಂಪುಮಣ್ಣಿನ ಧೂಳಿನಲ್ಲಿ ಸ್ನಾನ ಮಾಡುವಂತಾಯಿತು. ಖಾಸಗಿ ವಾಹನಗಳಿಗೆ ಪ್ರವೇಶ ನಿಷೇಧಿಸಿದ್ದರೂ, ಧೂಳು ನಿಯಂತ್ರಣಕ್ಕೆ ತೆಗೆದುಕೊಂಡ ಕ್ರಮಗಳು ಅಲ್ಪಮಟ್ಟದಲ್ಲಿದ್ದವು. ಈ ರಸ್ತೆಗೆ ಸುಮಾರು 10 ಕ್ಕೂ ಹೆಚ್ಚಿನ ನೀರಿನ ಟ್ಯಾಂಕರ್ ನ ವ್ಯವಸ್ಥೆ ಮಾಡ ಬೇಕಿತ್ತು ಆದರೆ ಕೇವಲ ಎರಡು ಟ್ಯಾಂಕರ್ ನಲ್ಲಿ ಬೇಕಾ ಬಿಟ್ಟಿ ನೀರು ಹಾಕಿದ್ದಾರೆ. ಈ ಸಂಬಂಧ ಮೈಸೂರಿನ ಮುಜರಾಯಿ ಇಲಾಖೆಯ ತಹಶೀಲ್ದಾರ್ ಶುಭ ರವರಿಗೆ ದೂರವಾಣಿ ಮುಖಾಂತರ ಮಾಧ್ಯಮದವರು ಸಂಪರ್ಕಿಸಿ ಅವ್ಯವಸ್ಥೆ ಬಗ್ಗೆ ತಿಳಿಸಿದರೂ ಪ್ರಯೋಜನವಾಗಲಿಲ್ಲ.
ಜಾತ್ರೆಗೆ ಬರುವ ಭಕ್ತಾದಿಗಳಿಗೆ ದೇವಸ್ಥಾನದ ಹತ್ತಿರ ಕೇವಲ ಮೂರು ಶೌಚಾಲಯ ಮತ್ತು ಚೈನ್ ಗೇಟ್ ಬಳಿ ಮೂರು ಶೌಚಾಲಯಗಳು ಸುಮಾರು ಅಂದಾಜು 35 ರಿಂದ 40 ಸಾವಿರ ಮಂದಿಗೆ ಈ ರೀತಿಯ ವ್ಯವಸ್ಥೆ ಸಾಕಾಗದೆ ಸಂಕಷ್ಟ ಪಡುವಂತಾಯಿತು. ಇನ್ನು ಊಟದ ವ್ಯವಸ್ಥೆಯೂ ಅವ್ಯವಸ್ಥೆಯಿಂದ ಕೂಡಿತ್ತು. ಒಟ್ಟಾರೆ ಜಾತ್ರೆಯಲ್ಲಿ ಕಂಡು ಬಂದ ಗೊಂದಲಗಳಿಗೆ ಸಂಬಂಧಿಸಿದಂತೆ ಇಲಾಖೆ ಸ್ಪಷ್ಟನೆ ನೀಡಬೇಕು ಮತ್ತು ಮುಂದಿನ ವರ್ಷ ಉತ್ತಮ ವ್ಯವಸ್ಥೆ ರೂಪಿಸಬೇಕು ಎಂಬ ಒತ್ತಾಯವೂ ಭಕ್ತವೃಂದದಿಂದ ಕೇಳಿ ಬಂದಿದೆ.
Tags:beladakuppe jaatre
