ಪ್ರತಿ ದಿನ, ಪ್ರತಿ ಕ್ಷಣ ಕನ್ನಡದ ಡಿಂಡಿಮ ಕನ್ನಡಿಗರ ಮನದಲ್ಲಿ ಮೊಳಗಲಿ… ಕನ್ನಡವೇ ಸತ್ಯ.. ಕನ್ನಡವೇ ನಿತ್ಯ!

ಕರ್ನಾಟಕದಲ್ಲಿರುವ ಕನ್ನಡೇತರರಿಗೆ ನಾವು ಸ್ಪಂದಿಸುವಂತೆ, ಬೇರೆ ರಾಜ್ಯದಲ್ಲಿರುವ ಕನ್ನಡಿಗರಿಗಾಗಿ ಅಲ್ಲಿನ ಜನರು ಸ್ಪಂದಿಸುವುದಿಲ್ಲ ಏಕೆ? ಇನ್ನು ಮುಂದಾದರೂ ಸೌಹಾರ್ಧಯುತವಾಗಿ ನಡೆದುಕೊಳ್ಳಲಿ, ಮನಃಪರಿವರ್ತನೆ ಮಾಡಿಕೊಂಡು ಮನಸ್ಸು-ಹೃದಯದ ಪಕ್ವತೆಯೆಡೆಗೆ ಸಾಗಲಿ ಎಂದು ಪ್ರತಿಯೊಬ್ಬ ಕನ್ನಡಿಗನೂ ಭಾರತಾಂಬೆಯನ್ನು ಪ್ರಾರ್ಥಿಸುತ್ತೇವೆ! ನಮ್ಮ ರಾಜ್ಯದಲ್ಲಿ ಅನ್ಯಭಾಷಿಕರ ನೆಲೆಸುವಿಕೆಯಿಂದ ನಾವು ಸಂತಸ ಪಡುವಂತೇ ಅನ್ಯರಾಜ್ಯಗಳಲ್ಲಿ ಕನ್ನಡಿಗರು ನೆಲೆಸಿದಾಗ ಅಲ್ಲಿನವರು ಸೌಹಾರ್ಧತೆ ಕಾಪಾಡಲಿ.. ಕನ್ನಡದ ಬಳಕೆ ಮತ್ತು ಕನ್ನಡಕ್ಕೆ ಸಂಬಂಧಿಸಿದ ಆಚರಣೆಗಳು ಒಂದು ದಿನಕ್ಕೆ ಸೀಮಿತವಾಗದೆ ಪ್ರತಿ ದಿನ, ಪ್ರತಿ ಕ್ಷಣ ನಡೆಯುವಂತಾಗಲಿ…

ಕನ್ನಡ ಭಾಷಿಕರೆಲ್ಲರ ಒಂದು ರಾಜ್ಯದ ಉದಯವನ್ನು ನೆನಪಿಸುವ ಹಬ್ಬವೆ ರಾಜ್ಯೋತ್ಸವ!  ಆ ಕಾರಣಕ್ಕಾಗಿ ಇದು ಶೇ.100ರಷ್ಟು ಕರ್ನಾಟಕ ರಾಜ್ಯದ ಉತ್ಸವ! ಭಾಷಾ ಶಾಸ್ತ್ರಜ್ಞರ ಪ್ರಕಾರ ಕನ್ನಡ ರಾಜ್ಯೋತ್ಸವ ಎಂದರೆ ಕನ್ನಡ+ ರಾಜ್ಯದ+ ಉತ್ಸವ ಎಂಬರ್ಥ-ತಾತ್ಪರ್ಯ? ಕರ್ನಾಟಕವಷ್ಟೇ ಕನ್ನಡ ರಾಜ್ಯ ಎಂದು ಸೀಮಿತ ಗೊಳಿಸುವುದು ತರವಲ್ಲ.  ಐತಿಹಾಸಿಕವಾಗಿ ಸಾವಿರಾರು ವರ್ಷಕಾಲ ಇಡೀ ದಕ್ಷಿಣ ಭಾರತವೆ ಕನ್ನಡ (ಸಾಮ್) ರಾಜ್ಯವಾಗಿತ್ತು. ಇವತ್ತಿಗೂ ಕನ್ನಡಕುಲ- ಕನ್ನಡದಕಂಪು ಪ್ರಪಂಚದಾದ್ಯಂತ ಪಸರಿಸಿದೆ.

ಯಾವಾಗ- ಎಲ್ಲಿಬೇಕಾದರೂ ಕನ್ನಡೋತ್ಸವವನ್ನು ನಿತ್ಯೋತ್ಸವವನ್ನಾಗಿ ಆಚರಿಸಲು ಪ್ರತಿಯೊಬ್ಬ ಕನ್ನಡಿಗನಿಗೆ ಅವಕಾಶವಿದೆ ಸ್ವತಂತ್ರವೂ ಇದೆ.  ಆದರೆ, ಆಗಸ್ಟ್ 15ರಂದೇ ಸ್ವಾತಂತ್ರ್ಯೋತ್ಸವ ಮತ್ತು ಜನವರಿ 26ರಂದೇ ಗಣರಾಜ್ಯೋತ್ಸವ ಆಚರಿಸುವಂತೆ ನವೆಂಬರ್ 1ರಂದೇ ಕರ್ನಾಟಕ ರಾಜ್ಯೋತ್ಸವ ಆಚರಣೆ ನಡೆಯುತ್ತದೆ. ಆದರೆ ಇತ್ತೀಚೆಗಿನ ವರ್ಷಗಳಲ್ಲಿ ಇಡೀ ತಿಂಗಳು ರಾಜ್ಯೋತ್ಸವ ಆಚರಣೆಗಳು ಕಂಡು ಬರುತ್ತಿವೆ.

ಇತಿಹಾಸದ ಮೆಲುಕು ಹಾಕಿದರೆ, ಗಂಗ ಕದಂಬ ಚಾಲುಕ್ಯ ರಾಷ್ಟ್ರಕೂಟ ಹೊಯ್ಸಳ ಯಾದವ ಬಲ್ಲಾಳ ವಿಜಯನಗರ ಯವನರ ಕಾಲದ ಕರ್ನಾಟಕ ಸಾಮ್ರಾಜ್ಯ ಕಾಲ ಕ್ರಮೇಣ ಮೈಸೂರು ಸಂಸ್ಥಾನ ಆಯ್ತು.  ಡಚ್ಚ್- ಪೋರ್ಚುಗೀಸ್- ಫ್ರೆಂಚ್- ಬ್ರಿಟಿಷ್ ಆಳ್ವಿಕೆಯಲ್ಲಿ  ಮೈಸೂರು ಪ್ರಾಂತ್ಯ ಎಂದು ಕರೆಯಲ್ಪಟ್ಟಿತು. ಸ್ವಾತಂತ್ರ್ಯಾನಂತರ ರಾಜ್ಯ ಏಕೀಕರಣ ಹೋರಾಟದ ಪರಿಣಾಮವಾಗಿ ಬಾಂಬೆ- ಹೈದ್ರಾಬಾದ್-ಮದ್ರಾಸ್- ಕೇರಳ ಪ್ರಾಂತ್ಯದಲ್ಲಿದ್ದ ಕನ್ನಡಿಗರ ನಾಲ್ಕು ಭೂ-ಪ್ರದೇಶಗಳನ್ನು ಹಳೇ ಮೈಸೂರು ರಾಜ್ಯಕ್ಕೆ ಸೇರಿಸಲ್ಪಟ್ಟು ದಿನಾಂಕ 1.11.1956ರಿಂದ ವಿಶಾಲ ಮೈಸೂರು ರಾಜ್ಯ ಉದಯವಾಯಿತು.  17ವರ್ಷದ ನಂತರ 1973ರಲ್ಲಿ ದಿ. ಡಿ.ದೇವರಾಜಅರಸು ಮುಖ್ಯಮಂತ್ರಿ ಆಗಿದ್ದಾಗ  ಕರ್ನಾಟಕ ರಾಜ್ಯವೆಂದು ಪುನರ್ ನಾಮಕರಣಗೊಂಡಿತು.

1956ರಿಂದ  ಕನ್ನಡ ರಾಜ್ಯೋತ್ಸವ  ಎಂದು ಆಚರಣೆಯಲ್ಲಿತ್ತು.  1973ರಿಂದ  ಕರ್ನಾಟಕ ರಾಜ್ಯೋತ್ಸವ ಎಂದು ಆಚರಿಸಲ್ಪಡುತ್ತಿದೆ.  ಆಗಿನ ಕಾಲದ ನಿಸ್ವಾರ್ಥ ಕನ್ನಡ ಚಳುವಳಿಗಾರರಾದ ಅ.ನ.ಕೃ. ತ.ರಾ.ಸು. ಹುಯಿಲುಗೋಳು ನಾರಾಯಣರಾವ್, ಮ.ರಾಮಮೂರ್ತಿ, ಕಟ್ಟೀಮನಿ, ಪಾ.ಪು, ಚಂ.ಪಾ, ನಾಡಗೌಡ, ಜಿ.ನಾರಾಯಣ, ಡಾ. ರಾಜ್‌ಕುಮಾರ್, ವಾಟಾಳ್‌ನಾಗರಾಜ್, ಮುಂತಾದವರು ಏಕೀಕರಣಕ್ಕಾಗಿ, ಆಡಳಿತ ಭಾಷೆಗಾಗಿ ಗೋಕಾಕ್ ವರದಿ ಜಾರಿಗಾಗಿ ಹೋರಾಟ ನಡೆಸಿದ್ದು ಅವಿಸ್ಮರಣೀಯ, ಅಜರಾಮರ!

ಈಗಲೂ ಇವರ ಹಾದಿಯಲ್ಲಿ ಸಾಗುತ್ತಿರುವವರು ಅಪಾರ ಸಂಖ್ಯೆಯಲ್ಲಿದ್ದಾರೆ. ಆದರೆ ಕೆಲವು ಕಿಡೆಗೇಡಿಗಳು ಅಗ್ರ- ವ್ಯಗ್ರ- ಉಗ್ರ ಚಳುವಳಿಗಾರರೆಂದು ತಾವೆ ಬೆನ್ನು ತಟ್ಟಿಕೊಂಡು ರಾಜ್ಯೋತ್ಸವದ ಹೆಸರಲ್ಲಿ ಸಾರ್ವಜನಿಕರ ಸುಲಿಗೆ- ಶೋಷಣೆ ಮಾಡುತ್ತ ಧನ- ಧಾನ್ಯ ಸಂಗ್ರಹಿಸಿ ಸ್ವಾರ್ಥಕ್ಕೆ ಉ(ದುರು)ಪಯೋಗಿಸಿಕೊಂಡು ಕನ್ನಡ ನಾಡು- ನುಡಿ- ಜನ- ಸಂಸ್ಕೃತಿ- ನಾಗರಿಕತೆ- ಸಂಸ್ಕಾರ-ಇತಿಹಾಸದ ಪವಿತ್ರತೆಗೆ ಮಸಿ ಬಳಿಯುತ್ತಿದ್ದಾರೆ. ಇಂಥವರನ್ನು ಪ್ರೋತ್ಸಾಹಿಸದೆ ಕಾನೂನು ರೀತ್ಯ ಶಿಕ್ಷೆಗೆ ಒಳಪಡಿಸಲು ದಿಟ ಕನ್ನಡ ವೀರರು ದಿಟ್ಟ ಹೆಜ್ಜೆ ಇಡಬೇಕು! ಹತ್ತು ವರ್ಷದಿಂದೀಚೆಗೆ ಪ್ರತಿರಾಜ್ಯೋತ್ಸವ ಆಚರಣೆಯು ಕನ್ನಡಿಗರನ್ನು ಸಶಕ್ತರನ್ನಾಗಿಸಿ ಎಚ್ಚೆತ್ತುಕೊಳ್ಳುವಂತೆ ಮಾಡುತ್ತಿದೆ.

ಭಾರತವನ್ನು ಒಗ್ಗೂಡಿಸಿದ ಉಕ್ಕಿನಮನುಷ್ಯ ಸರ್ದಾರ್ ವಲ್ಲಭ ಬಾಯಿ ಪಟೇಲ್ ಗೊಂದು ಸಲಾಮ್…

ಕನ್ನಡ ಅಭಿವೃದ್ಧಿ ಪ್ರಾಧಿಕಾರ, ಕನ್ನಡ ಪುಸ್ತಕ ಪ್ರಾಧಿಕಾರ, ಕನ್ನಡ-ಸಂಸ್ಕೃತಿಇಲಾಖೆ, ಸೇರಿದಂತೆ ಕನ್ನಡದ ಇನ್ನಿತರೆ ಶೈಕ್ಷಣಿಕ, ಸಾಮಾಜಿಕ ಇಲಾಖೆಯೊಡನೆ ಸಂಪರ್ಕ ಇಟ್ಟುಕೊಂಡು ಹಲವಾರು (ಉಪ)ಸಮಿತಿ ರಚಿಸಿಕೊಳ್ಳಬೇಕು. ಕನ್ನಡದ- ಕನ್ನಡಿಗರ ಸರ್ವತೋಮುಖ ಅಭಿವೃದ್ಧಿ ಬಗ್ಗೆ ಸಭೆಗಳಲ್ಲಿ ಗಂಭೀರ ಚರ್ಚೆ ನಡೆಸುವ ಮೂಲಕ ಕನ್ನಡ ಬಳಕೆ ಸಾಹಿತ್ಯ ಪ್ರಕಟಣೆ ಪುಸ್ತಕ ಪ್ರದರ್ಶನ ಸಂಸ್ಕೃತಿ- ಇತಿಹಾಸದ ವಸ್ತುಪ್ರದರ್ಶನ ಸಾಕ್ಷ್ಯಚಿತ್ರ ಪ್ರದರ್ಶನ ಮುಂತಾದ ಬಹೋಪಯೋಗಿ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಬೇಕು. ಕನ್ನಡವನ್ನು ವ್ಯವಹಾರ- ಆಡಳಿತ- ಜಾಹೀರಾತು ಭಾಷೆಯನ್ನಾಗಿ ಶೇ.100ರಷ್ಟು ಅನುಷ್ಟಾನಗೊಳಿಸಬೇಕು.

ಈ ದಿಶೆಯಲ್ಲಿ ಆಗಾಗ್ಗೆ ಸರ್ಕಾರಿ ಆದೇಶ ಹೊರಡಿಸುತ್ತ ಕನ್ನಡವನ್ನು ಉಳಿಸಿ-ಬೆಳೆಸುವ ಕೈಂಕರ್ಯ ಪ್ರಾಮಾಣಿಕವಾಗಿ ಸಾಗಬೇಕು. ಹೊಸದಾಗಿ ಪ್ರಾರಂಭಿಸುವ ಕನ್ನಡ ದಿನಪತ್ರಿಕೆ- ನಿಯತಕಾಲಿಕೆಗಳಿಗೆ, ಕನ್ನಡಲೇಖಕ-ಪ್ರಕಾಶಕರಿಗೆ, ಆರ್ಥಿಕ- ಆಡಳಿತಾತ್ಮಕ ನೆರವು ನೀಡಬೇಕು. ಪ್ರತಿಘಳಿಗೆ ಕನ್ನಡ ನೆಲ- ಜಲ- ನಾಡು- ನುಡಿಯ ಏಳಿಗೆಗಾಗಿ ಒಗ್ಗಟ್ಟಿನಿಂದ ಶಾಂತಿಯುತವಾಗಿ ಕಾನೂನು-ಸುವ್ಯವಸ್ಥೆ ಚೌಕಟ್ಟಿನಲ್ಲಿ  ಸರೋಜಿನಿ ಮಹಿಷಿ ವರದಿ  ಜಾರಿಗೆ ಬ(ತ)ರುವಂತೆ ಹೋರಾಡುವವರನ್ನು ಹುರಿದುಂಬಿಸಬೇಕು.  ಜಾಗತಿಕ ಮಟ್ಟದ ಕನ್ನಡಿಗರ ಅಧಿಕಾರ (ವಿ) ಜ್ಞಾನ ಶ್ರಮ ಹಾಗೂ ಹಣ ಸದ್ವಿನಿಯೋಗ ಆಗುವಂತೆ ನೋಡಿಕೊಳ್ಳಬೇಕು.

ಕರ್ನಾಟಕದಲ್ಲಿರುವ ಕನ್ನಡೇತರರಿಗೆ ನಾವು ಸ್ಪಂದಿಸುವಂತೆ, ಬೇರೆ ರಾಜ್ಯದಲ್ಲಿರುವ ಕನ್ನಡಿಗರಿಗಾಗಿ ಅಲ್ಲಿನ ಜನರು ಸ್ಪಂದಿಸುವುದಿಲ್ಲ ಏಕೆ? ಇನ್ನು ಮುಂದಾದರೂ ಸೌಹಾರ್ಧಯುತವಾಗಿ ನಡೆದುಕೊಳ್ಳಲಿ, ಮನಃಪರಿವರ್ತನೆ ಮಾಡಿಕೊಂಡು ಮನಸ್ಸು-ಹೃದಯದ ಪಕ್ವತೆಯೆಡೆಗೆ ಸಾಗಲಿ ಎಂದು ಪ್ರತಿಯೊಬ್ಬ ಕನ್ನಡಿಗನೂ ಭಾರತಾಂಬೆಯನ್ನು ಪ್ರಾರ್ಥಿಸುತ್ತೇವೆ! ನಮ್ಮ ರಾಜ್ಯದಲ್ಲಿ ಅನ್ಯಭಾಷಿಕರ ನೆಲೆಸುವಿಕೆಯಿಂದ ನಾವು ಸಂತಸ ಪಡುವಂತೇ ಅನ್ಯರಾಜ್ಯಗಳಲ್ಲಿ ಕನ್ನಡಿಗರು ನೆಲೆಸಿದಾಗ ಅಲ್ಲಿನವರು ಸೌಹಾರ್ಧತೆ ಕಾಪಾಡಲಿ ಎಂಬುದೇ  ಕನ್ನಡಿಗರ ಕಳಕಳಿಯ ಮನವಿ.