ಕನ್ನಡ ಮಾತನಾಡಲು ಕೀಳರಿಮೆ ಬೇಡ: ವಿದ್ಯಾರ್ಥಿಗಳಿಗೆ ಮುಖ್ಯ ಶಿಕ್ಷಕ ಎಚ್.ಎಸ್.ತಿಪ್ಪೇಸ್ವಾಮಿ ಸಲಹೆ

ಮೈಸೂರು: ಕನ್ನಡ ಭಾಷೆ ಕಲಿಯಲು ಹಾಗೂ ಮಾತನಾಡಲು ಕೀಳರಿಮೆ ಎಂದಗೂ ಬೇಡ ಎಂದು ನಗರದ ಡಿ.ಬನುಮಯ್ಯ ಬಾಲಕಿಯರ ಪ್ರೌಢಶಾಲೆಯ ಮುಖ್ಯಶಿಕ್ಷಕ ಎಚ್.ಎಸ್.ತಿಪ್ಪೇಸ್ವಾಮಿ ಸಲಹೆ ನೀಡಿದರು.

ಡಿ.ಬನುಮಯ್ಯ ಬಾಲಕಿಯರ ಶಾಲೆಯಲ್ಲಿ ಹಿರಣ್ಮಯಿ ಪ್ರತಿಷ್ಠಾನ, ಕಾವೇರಿ ಬಳಗ ಹಾಗೂ ಡಿ.ಬನುಮಯ್ಯ ಬಾಲಕಿಯರ ಶಾಲೆ ಆಶ್ರಯದಲ್ಲಿ ಏರ್ಪಡಿಸಿದ್ದ ‘ಹಚ್ಚೇವು ಕನ್ನಡದ ದೀಪ’ ಕನ್ನಡ ರಾಜ್ಯೋತ್ಸವ ಕಾರ್ಯಕ್ರ‌ಮದಲ್ಲಿ ಅಧ್ಯಕ್ಷತೆ ವಹಿಸಿ ಮಾತನಾಡಿದರು. ಎಲ್ಲಾದರೂ ಇರಿ, ಹೇಗಾದರೂ ಇರಿ ಕನ್ನಡವನ್ನು ಎಂದೆಂದಿಗೂ ಮರೆಯ ಬೇಡಿ, ಪರಭಾಷೆ ವ್ಯಾಮೋಹ ಬಿಟ್ಟು ಕನ್ನಡವನ್ನು ಹೆಚ್ಚಾಗಿ ಬಳಸಿ, ಕನ್ನಡವನ್ನು ಉಳಿಸಿ ಎಂದರು. ಜಗತ್ತಿನ ಭಾಷೆಗಳಲ್ಲಿ ಸುಂದರ ಭಾಷೆ ಕನ್ನಡ, ಸುಲಿದ ಬಾಳೆ ಹಣ್ಣಿನಂತಿರುವ ಭಾಷೆಯನ್ನು ಚನ್ನಾಗಿ ಕಲಿತು ಇತರರಿಗೂ ಕಲಿಸೋಣ ಎಂದರು.

ಹಿರಿಯ ಪತ್ರಕರ್ತ ದೊಡ್ಡನಹುಂಡಿ ರಾಜಣ್ಣ ಮಾತನಾಡಿ, ನಾಡು, ನುಡಿ ಹಾಗೂ ನಾವು ದಿನನಿತ್ಯ ಬಳಸುವ ತಪ್ಪು ಕನ್ನಡ ಪದಗಳನ್ನು ತಿಳಿಸಿಕೊಟ್ಟರು. ಇದೇ ಸಂದರ್ಭದಲ್ಲಿ ವಕೀಲ ಹಾಗೂ ಲೇಖಕ ಕೆ.ವಿ.ವಾಸು, ವನಿತಾ ಸದನ ಪ್ರೌಢಶಾಲೆಯ ಮುಖ್ಯಶಿಕ್ಷಕಿ ಟಿ.ಶಿವಮ್ಮ ಅವರಿಗೆ ‘ಜೀವನದಿ ಕಾವೇರಿ ಪ್ರಶಸ್ತಿ’ ನೀಡಿ ಗೌರವಿಸಲಾಯಿತು. ಕನ್ನಡ ರಾಜ್ಯೋತ್ಸವ ಪ್ರಯುಕ್ತ ಹಮ್ಮಿಕೊಂಡಿದ್ದ ವಿವಿಧ ಸ್ಪರ್ಧೆಗಳಲ್ಲಿ ವಿಜೇತರಾದ ವಿದ್ಯಾರ್ಥಿನಿಯರಿಗೆ ಲೇಖನ ಸಾಮಗ್ರಿಗಳನ್ನು ಬಹುಮಾನವಾಗಿ ವಿತರಿಸಲಾಯಿತು.

ಹಿರಣ್ಮಯಿ ಪ್ರತಿಷ್ಠಾನದ ಅಧ್ಯಕ್ಷ ಎ.ಸಂಗಪ್ಪ ಪ್ರಾಸ್ತಾವಿಕ ನುಡಿಗಳನ್ನಾಡಿದರು. ಕಾವೇರಿ ಬಳಗದ ಅಧ್ಯಕ್ಷೆ ಎನ್.ಕೆ.ಕಾವೇರಿಯಮ್ಮ, ಶಿಕ್ಷಕರಾದ ಹರೀಶ್, ಮಂಗಳಗೌರಮ್ಮ, ಶ್ರೀನಿವಾಸಮೂರ್ತಿ, ಎಂ.ಎಸ್.ಸತೀಶ್, ಶಿವು, ಚೇತನ್ ಹಾಗೂ ಸಿಬ್ಬಂದಿ ರೋಹಿತ್, ರಮೇಶ್ ಮತ್ತಿತರರು ಹಾಜರಿದ್ದರು.