ವೈದ್ಯರ ವಿರುದ್ಧ ಸುಳ್ಳುದೂರು ಖಂಡಿಸಿ ಸರಕಾರಿ ವೈದ್ಯರ ಸಂಘದಿಂದ ಎಸ್ಪಿಗೆ ದೂರು… ಏನಿದು ಘಟನೆ?

ಮಡಿಕೇರಿ: ಸರ್ಕಾರದಿಂದ ನೀಡುವ 60ಸಾವಿರ ರೂಪಾಯಿಯ ಪರಿಹಾರದ ಬದಲಿಗೆ 10ಲಕ್ಷ ರೂಪಾಯಿ ನೀಡುವಂತೆ ವೈದ್ಯರ ಮೇಲೆ ಒತ್ತಡ ತಂದಿದ್ದಲ್ಲದೆ, ಅವರು ನಿರಾಕರಿಸಿದಾಗ ಅವರ ವಿರುದ್ಧವೇ ಲೈಂಗಿಕ ಕಿರುಕುಳ ಹಾಗೂ ಜಾತಿ ನಿಂದನೆ ಸುಳ್ಳು ದೂರು ನೀಡಿದ ಘಟನೆ ಕೊಡಗಿನ ಕುಶಾಲನಗರ ಸಮುದಾಯ ಆರೋಗ್ಯ ಕೇಂದ್ರದಲ್ಲಿ ನಡೆದಿದ್ದು, ಇದನ್ನು ಖಂಡಿಸಿ ಸರಕಾರಿ ವೈದ್ಯರ ಸಂಘವು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳಿಗೆ ದೂರು ಸಲ್ಲಿಸಿದ್ದಾರೆ.

ಕುಶಾಲನಗರ ಸಮುದಾಯ ಆರೋಗ್ಯ ಕೇಂದ್ರದ ಹಿರಿಯ ವೈದ್ಯ ಡಾ.ಎಂ.ಯು.ಚೇತನ್ ಅವರೇ ಪೊಲೀಸರಿಗೆ ದೂರು ನೀಡಿದವರಾಗಿದ್ದಾರೆ. ಇವರಿಗೆ ಪ್ರಖ್ಯಾತ್, ಚಿಕ್ಕ ಅಳುವಾರ ಗ್ರಾಮದ ರೇಣುಕಾ ಹಾಗೂ ಸೋಮಶೇಖರ್ ಕಿರುಕುಳ ನೀಡಿದವರಾಗಿದ್ದು, ಇವರ ಮೇಲೆ  ಬೆದರಿಸಿ ರೂ 10 ಲಕ್ಷಕ್ಕೆ ಬೇಡಿಕೆಯಿಟ್ಟು ಆರೋಪವಿದ್ದು, ಈ ಸಂಬಂಧ ಕಿರುಕುಳ ನೀಡಿದ ಮೂವರ ವಿರುದ್ದ ಸರಕಾರಿ ವೈದ್ಯರ ಸಂಘದಿಂದ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿಗಳಿಗೆ ದೂರು ಸಲ್ಲಿಸಲಾಗಿದೆ.

ರೇಣುಕಾ ಹಾಗೂ ಸೋಮಶೇಖರ್ ಕುಶಾಲನಗರ ಸರ್ಕಾರಿ ಆಸ್ಪತ್ರೆಯ ವೈದ್ಯಧಿಕಾರಿ ಡಾಕ್ಟರ್ ಚೇತನ್ ರವರ ಮೇಲೆ ಲೈಂಗಿಕ ಕಿರುಕುಳ ಹಾಗೂ ಜಾತಿ ನಿಂದನೆ ಸುಳ್ಳು ದೂರು ನೀಡಿದ್ದರು. ಇದನ್ನು ಖಂಡಿಸಿರುವ  ಜಿಲ್ಲೆಯ ಎಲ್ಲಾ ಸರ್ಕಾರಿ ಆರೋಗ್ಯ ಅಧಿಕಾರಿಗಳು  ಇಂತಹ ಘಟನೆಗಳಿಗೆ ಅವಕಾಶ ನೀಡಬಾರದು, ಸುಳ್ಳು ದೂರು ನೀಡಿ ವೈದ್ಯರ ಕರ್ತವ್ಯಕ್ಕೆ ಅಡ್ಡಿಪಡಿಸುವುದಲ್ಲದೆ, ಮಾನಸಿಕವಾಗಿ ಕುಗ್ಗಿಸುವ ಕೆಲಸ ಮಾಡಲಾಗುತ್ತಿದೆ ಎಂದು ವೈದ್ಯರು ಆರೋಪಿಸಿದ್ದಾರೆ.

ಇನ್ನು ಏನಿದು ಘಟನೆ ಎಂಬುದನ್ನು ನೋಡಿದ್ದೇ ಆದರೆ  2020ರಲ್ಲಿ ಹೆಬ್ಬಾಲೆ ಗ್ರಾಮದಲ್ಲಿ ನಡೆದ‌ ಕ್ಯಾಂಪ್ ನಲ್ಲಿ ಚಿಕ್ಕ ಅಳುವಾರದ ಸೋಮಶೇಖರ್ ಅವರ ಪತ್ನಿ ರೇಣುಕಾ ಕುಟುಂಬ ಕಲ್ಯಾಣ ಶಸ್ತ್ರ ಚಿಕಿತ್ಸೆ(ಟ್ಯೂಬೆಕ್ಟಮಿ)ಗೆ ಒಳಗಾಗಿದ್ದರು. ಆದರೆ  ಟ್ಯೂಬೆಕ್ಟಮಿ ನಡೆಸಿದ್ದರೂ ಆ ನಂತರ 2025 ರಲ್ಲಿ ಮತ್ತೆ ಗರ್ಭವತಿ ಆಗಿದ್ದರು.  ಈ ಸಂಬಂಧ ಸರ್ಕಾರದಿಂದ ಇಂತಹ ಪ್ರಕರಣಗಳಲ್ಲಿ ರೂ 60,000 ಪರಿಹಾರ ನೀಡುವ ನಿಯಮ ಇದ್ದು  ಈ ಸಂಬಂಧ ವೈದ್ಯಾಧಿಕಾರಿಗಳು ಸರ್ಕಾರಕ್ಕೆ ಪತ್ರವನ್ನು ಬರೆದಿದ್ದರು.

ಆದರೆ ಗರ್ಭವತಿಯಾದ ರೇಣುಕ ಕುಟುಂಬದವರು ವೈದ್ಯಾಧಿಕಾರಿಗಳನ್ನು 10 ಲಕ್ಷ ಪರಿಹಾರ ನೀಡುವಂತೆ ಒತ್ತಾಯಿಸುತ್ತಿದ್ದರು. ಸರ್ಕಾರಕ್ಕೆ ತಾನು ಪತ್ರ ಬರೆದಿದ್ದು ಹಣ ಬಂದ ನಂತರ ಕೂಡಲೇ ಪರಿಹಾರ ಮೊತ್ತವನ್ನು ವಿತರಿಸುವುದಾಗಿ ಅವರು ಹೇಳಿದರೂ ಅದಕ್ಕೆ ಒಪ್ಪದೆ ತಾವೇ ಸ್ವತಃ  ಹಣ ನೀಡುವಂತೆ ಅವರು ಒತ್ತಾಯಿಸ್ತಿದ್ದರು. ಇದನ್ನು ನಿರಾಕರಿಸಿದ ಹಿನ್ನಲೆಯಲ್ಲಿ ವೈದ್ಯರಾದ ಚೇತನ್ ರವರ ಮೇಲೆ ಲೈಂಗಿಕ ಕಿರುಕುಳ ಹಾಗೂ ಜಾತಿ ನಿಂದನೆ ದೂರು ನೀಡಿದ್ದರು. ಇದರಿಂದ ನೊಂದ ವೈದ್ಯ ಚೇತನ್ ಅವರು ಸರಕಾರಿ ವೈದ್ಯರ ಸಂಘದ ಗಮನಕ್ಕೆ ತಂದಿದ್ದು, ಸರಕಾರಿ ವೈದ್ಯರ ಸಂಘವು ಎಸ್ಪಿಗೆ ದೂರು ನೀಡಿ ಕ್ರಮಕ್ಕೆ ಒತ್ತಾಯಿಸಿದ್ದಾರೆ ಅಲ್ಲದೆ, ಸುಳ್ಳು ದೂರು ನೀಡುವ ಮೂಲಕ ನಮಗೆ ಮಾನಸಿಕ ಹಿಂಸೆ ನೀಡುವುದರಿಂದ ವೈದ್ಯ ವೃತ್ತಿಯನ್ನು ಸುಗಮವಾಗಿ ನಡೆಸಿಕೊಂಡು ಹೋಗಲು ಸಾಧ್ಯವಾಗುತ್ತಿಲ್ಲ ಎಂದು ಮನವಿಯಲ್ಲಿ  ಹೇಳಿದ್ದಾರೆ.