ಸ್ನೇಹಕ್ಕೆ, ಪ್ರೀತಿಗೆ, ವಿಶ್ವಾಸಕ್ಕೆ, ತ್ಯಾಗಕ್ಕೆ, ಹೆಸರಾದ, ಮಂಡ್ಯದ ಗಂಡು ರೆಬಲ್ ಸ್ಟಾರ್ ಡಾ.ಅಂಬರೀಶ್
ಸ್ನೇಹಕ್ಕೆ, ಪ್ರೀತಿಗೆ, ವಿಶ್ವಾಸಕ್ಕೆ, ತ್ಯಾಗಕ್ಕೆ, ಮನುಷ್ಯತ್ವಕ್ಕೆ ಹೆಸರಾದ, ಮಂಡ್ಯದ ಗಂಡು, ರೆಬಲ್ ಸ್ಟಾರ್ ಡಾ.ಅಂಬರೀಶ್ ಅವರು ನಿಧನರಾಗಿ ನ.24ಕ್ಕೆ 7 ವರ್ಷವಾಗುತ್ತಿದೆ. ಅವರ ಸಿನಿಮಾ ಬದುಕು ಮಾತ್ರವಲ್ಲದೆ ಅದರಾಚೆಗೆ ಅವರು ಹೇಗಿದ್ದರು? ಕಷ್ಟಕ್ಕೆ ಹೇಗೆ ಮಿಡಿಯುತ್ತಿದ್ದರು ಎಂಬದರ ಬಗ್ಗೆ ಒಂದಷ್ಟು ನಿದರ್ಶನಗಳನ್ನು ಹಿರಿಯ ಬರಹಗಾರರು, ಪತ್ರಕರ್ತರೂ ಆಗಿರುವ ಬನ್ನೂರು ಕೆ.ರಾಜು ಅವರು ಇಲ್ಲಿ ತೆರೆದಿಟ್ಟಿದ್ದಾರೆ.
ಅಸಾಮಾನ್ಯ ತಾರೆಯಾಗಿದ್ದರೂ, ಸಾಮಾನ್ಯ ವ್ಯಕ್ತಿಯೊಬ್ಬ ಅಯ್ಯೋ ಅವ್ರನ್ನ ನಿಜವಾಗಿ ನಾನು ನೋಡ್ಲಿಕ್ಕೆ ಸಾಧ್ಯನಾ? ಎನ್ನುವಷ್ಟರ ಮಟ್ಟಿಗೆ ಡಾ. ಅಂಬರೀಶ್ ಗಗನತಾರೆಯಾಗಿ ಬದುಕಲಿಲ್ಲ. ಸಾಮಾನ್ಯರಲ್ಲಿ ಸಾಮಾನ್ಯರಾಗಿ ಬೆರೆತರು. ಧನಕನಕಾದಿಗಳು ಕಾಲಬುಡದಲ್ಲೇ ಬಂದು ಬಿದ್ದಿದ್ದರೂ ತಾವೊಬ್ಬರೇ ಗಂಟು ಮಾಡಿಕೊಳ್ಳುವ ಸ್ವಾರ್ಥವನ್ನು ರೂಢಿಸಿಕೊಳ್ಳಲಿಲ್ಲ. ಬದಲಿಗೆ ತಮ್ಮೆಲ್ಲಾ ಸಂಪತ್ತನ್ನೂ ಎಲ್ಲರಿಗೂ ಹಂಚಿ ಅದರಲ್ಲೇ ಮಹದಾನಂದ ಕಂಡರು. ಕರ್ಣನ ಪುನರಾವತಾರವೇ ಆದರು. ಇಂಥ ಕರ್ಣನ ಸಂಪತ್ತು ಹಂಚಿಹೋದ ಪರಿಯನ್ನು ಹೇಳ ಹೊರಟರೆ ಅದೇ ಒಂದು ಅಂಬರೀಶಾಯಣ ಅದೀತು.
ಯಾರು ಯಾರಿಗೋ ಸಹಾಯ ಮಾಡಿದರು. ಮುಳುಗಿ ಹೋಗುತ್ತಿದ್ದ ಅದೆಷ್ಟೋ ಮಂದಿಯನ್ನು ಮೇಲೆತ್ತಿ ಉದ್ಧರಿಸಿದರು. ಎಂತೆಂಥವರ ಮೇಲಿದ್ದ ಸಾಲದ ನೊಗವನ್ನು ಎತ್ತಿ ಬಿಸಾಕಿದರು. ಕೆಳಗಿದ್ದ ಅದೆಷ್ಟೋ ಮಂದಿಗೆ ಮೇಲೇಣಿಯಾದರು. ಅಕ್ಷರಶಃ ಕರ್ಣನಂತೆಯೇ ಬದುಕಿದರು. ಇವತ್ತಿಗೂ ಗಾಂಧಿನಗರದಿಂದ ಇವರಿಗೆ ಬರಬೇಕಾದ ಬಾಕಿ ಹಣ ಬಹಳ ಬಹಳ. ಅವರ ಸಿನಿಮಾದುನಿಯಾನೆ ಅಂಥಾದ್ದು. ಈಗಲೂ ಇವರು ಬದುಕಿದ್ದು, ಬಾಕಿ ವಸೂಲಿಗೆ ನಿಂತಿದ್ದರೆ ಗಾಂಧಿನಗರದಿಂದ ಇವರಿಗೆ ಅದೆಷ್ಟು ಕೋಟಿ ರೂಪಾಯಿಗಳು ಬಂದು ಬಿಡುತ್ತಿತ್ತೋ ಏನೋ! ಬೌನ್ಸ್ ಆಗಿದ್ದ ಚೆಕ್ಕುಗಳನ್ನು ಕೊಟ್ಟವರಿಗೇ ವಾಪಸ್ ಕೊಟ್ಟು ‘ಬದಿಕ್ಕಳಿ ಹೋಗಿ’ ಎಂದ ದಾನಶೂರರಿವರು.
ಸ್ನೇಹಕ್ಕೆ, ಪ್ರೀತಿಗೆ, ವಿಶ್ವಾಸಕ್ಕೆ, ತ್ಯಾಗಕ್ಕೆ, ಮನುಷ್ಯತ್ವಕ್ಕೆ ಹೆಸರಾದ ಡಾ. ಅಂಬರೀಶ್ ಅವರದು ಜಿನ, ಬುದ್ಧ, ಯೇಸು, ಬಸವ, ಪೈಗಂಬರ್, ಗಾಂಧಿ, ಅಂಬೇಡ್ಕರ್‌ರಂತಹವರ ಮಾನವೀಯ ಕಾಳಜಿಯ ಅಮೃತದಲ್ಲಿ ಅದ್ದಿತೆಗೆದಂತಹ ಮಹಾ ವ್ಯಕ್ತಿತ್ವ. ದಾನ-ಧರ್ಮದಲ್ಲಂತೂ ಅವರಿಗವರೇ ಸಾಟಿ. ಬಾಲಿವುಡ್ ಬಾದ್‌ಷಾ ಅಮಿತಾಬ್ ಬಚ್ಚನ್, ಇಂಡಿಯನ್ ಕ್ರಿಕೆಟ್ ತಾರೆ ಮಹೇಂದ್ರಸಿಂಗ್ ದೋನಿ ಅವರುಗಳಂಥವರೂ ಅಂಬರೀಶ್‌ರ ಋಣದಲ್ಲಿದ್ದಾರೆಂದರೆ ಯಾರಿಗೇ ಆದರೂ ಅರ್ಥವಾಗುತ್ತದೆ ಅಂಬಿಯ ಕೊಡುಗೈಗುಣದ ಮೇರು ವ್ಯಕ್ತಿತ್ವದ ಮಹಿಮೆ. ಅದನ್ನು ಹೇಳ ಹೊರಟರೆ ಅಂಬಿಯ ವಿಶಾಲ ಹೃದಯದಂತೆಯೇ ಅದೂ ಸಹ ವಿಶಾಲವಾಗಿ ತೆರೆದುಕೊಳ್ಳುತ್ತಾ ಹೋಗುತ್ತದೆ……
‘ಟೈಗರ್’ ಎಂದರೆ ಸಾಕಷ್ಟೆ. ಮುಂದಕ್ಕೆ ಆ ನಟನ ಹೆಸರು ಹೇಳಲೇಬೇಕಾಗಿರಲಿಲ್ಲ. ಆತ ಯಾರೆಂಬುದನ್ನು ಎಂತಹವರೂ ಸುಲಭವಾಗಿ ಊಹಿಸಿಬಿಡುತ್ತಿದ್ದರು. ಒಂದು ಕಾಲದಲ್ಲಿ ಬೆಳ್ಳಿತೆರೆ ಮೇಲೆ ಹುಲಿಯಂತೆ ಮೆರೆದ ಇಂಥ ನಟ ಅನಾರೋಗ್ಯಪೀಡಿತನಾಗಿ ಬೆಂಗಳೂರಿನ ಮಲ್ಯ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದ ಸಂದರ್ಭವದು. ಅದುವರೆಗೂ ಆಗಿರುವ ಆಸ್ಪತ್ರೆಯ ಖರ್ಚಿನ ಬಿಲ್ ಪಾವತಿಸದ ಹೊರತು ಶವವನ್ನು ಹೊರತರಲಾರದ ದುಸ್ಥಿತಿ ಅಲ್ಲಿಯದು. ಹುಲಿಯಂತೆ ಘರ್ಜಿಸುತ್ತಿದ್ದ ಆ ನಟನ ದೇಹ ಅಂದು ಎಲ್ಲರೂ ಇದ್ದರೂ ಯಾರೂ ಇಲ್ಲದ ಅನಾಥ ಸ್ಥಿತಿಯಲ್ಲಿ ಸದ್ದಿಲ್ಲದೆ ಶವವಾಗಿ ಬಿದ್ದಿದೆ. ವಿಷಯ ಅಂಬರೀಶ್ ಕಿವಿ ಮುಟ್ಟುತ್ತದೆ. ಟೈಗರ್ ಖ್ಯಾತಿಯ ತನ್ನ ಸಮಕಾಲೀನ ನಟನೊಬ್ಬನ ದುರಂತ ಸಾವಿಗೆ ಅವರ ಕಣ್ಣಾಲಿಗಳು ಒದ್ದೆಯಾಗುತ್ತದೆ. ಅವರ ಒಂದು ಕೈ ಕಂಬನಿಯನ್ನು ಒರೆಸಿಕೊಳ್ಳುತ್ತಿದ್ದಂತೆಯೇ ಮತ್ತೊಂದು ಕೈ ಆಸ್ಪತ್ರೆಯಿಂದ ಆ ನಟನ ಶವವನ್ನು ಹೊರತರುವತ್ತ ಕೊಡುಗೈಯಾಗಿ ಸ್ಪಂದಿಸುತ್ತದೆ. ಅಲ್ಲಿಂದೀಚೆಗೆ ಎಲ್ಲವೂ ಸಲೀಸಾಗಿ ಆ ನಟನ ಅಂತಿಮ ಯಾತ್ರೆ ನಡೆಯುತ್ತದೆ. ಅದು ಯಾವುದೋ ಅಂಬರೀಶ್ ಅಭಿನಯದ ಸಿನಿಮಾ ದೃಶ್ಯವಲ್ಲ. ಅಂಬರೀಶ್‌ರ ನಿಜ ಬದುಕಿನ ನಿಜ ನಡೆಯಿದು. ಅವರ ನುಡಿಯೂ ಅದೇ! ಅಂದಹಾಗೆ ಅಂದು ನಿಧನಹೊಂದಿದ ನಟ ಟೈಗರ್ ಪ್ರಭಾಕರ್.
ಹಾಗೆಯೇ ಕನ್ನಡ ಚಿತ್ರರಂಗದ ಸುಧೀರ ವ್ಯಕ್ತಿತ್ವದ ಖ್ಯಾತ ಖಳನಟನೊಬ್ಬ ತನ್ನ ಬದುಕಿಗಾಗಿ ಮನೆಯೊಂದನ್ನು ಕಟ್ಟಿಕೊಳ್ಳುವ ಕನಸು ಕಾಣುತ್ತಾನೆ. ಆದರೆ ಅವನು ಅದುವರೆಗೆ ಚಿತ್ರರಂಗದಲ್ಲಿ ದುಡಿದು ಕೂಡಿಟ್ಟ ಹಣ ಮನೆ ಕಟ್ಟಲು ಸಾಲದಾಗುತ್ತದೆ. ಉಳಿಕೆ ಹಣಕ್ಕಾಗಿ ಆತ ಅಂಬರೀಶ್ ಮುಂದೆ ಸಾಲಕ್ಕಾಗಿ ಕೈ ಚಾಚುತ್ತಾನೆ. ಆಗ ಚಾಚಿದ ಆ ಖಳನಟನ ಎರಡೂ ಕೈ ತುಂಬಾ ಹಣವಿತ್ತು, ಅಂಬರೀಶ್ ಹೇಳುತ್ತಾರೆ. ಇದು ಸಾಲವಲ್ಲ, ನೀನು ಮನೆಕಟ್ಟಲು ನಿನ್ನ ಸ್ನೇಹಿತನಾಗಿ ನಿನಗೆ ನಾನು ನೀಡುತ್ತಿರುವ ಸಣ್ಣ ಗಿಫ್ಟ್ ಅಷ್ಟೆ ಎಂದು. ಹಣ ಪಡೆದ ಆ ಖಳನಟನ ಹೃದಯ ತುಂಬಿ ಬರುತ್ತದೆ. ಮುಂದೆ ತಾನು ಕಟ್ಟಿದ ತನ್ನ ಮನೆಗೆ ಅಂಬಿ ನಿಲಯವೆಂದೇ ಆ ಖಳನಟ ಹೆಸರಿಡುತ್ತಾನೆ.
ಇದೂ ಅಷ್ಟೆ, ಅಂಬರೀಶ್ ನಟನೆಯ ಯಾವುದೋ ಚಲನಚಿತ್ರದ ಸೀನಲ್ಲ. ಅಂಬರೀಶ್‌ರ ನೈಜ ಜೀವನದ ನಡವಳಿಕೆಯ ರೀತಿಯಿದು. ಅವರ ನಿಜ ನೀತಿಯೂ ಇದೆ! ಅಂದಹಾಗೆ ಅಂದು ಅಂಬಿಯ ನೆರವಿನಿಂದ ಮನೆಕಟ್ಟಿ ಆ ಮನೆಗೆ ಅಂಬಿಯ ಹೆಸರನ್ನೇ ಇಟ್ಟು ಕೃತಜ್ಞತೆ ತೋರಿದ ಆ ನಟ ಬೇರಾರೂ ಅಲ್ಲ, ಒಂದು ಕಾಲದಲ್ಲಿ ಕನ್ನಡ ಚಿತ್ರರಂಗದಲ್ಲಿ ಖಳನಟನಾಗಿ ಮೆರೆದ ಸಜ್ಜನ ಕಲಾವಿದ ಸುಧೀರ್.
ಆತ ಬಾಲಿವುಡ್‌ನ ಮಹಾತಾರೆ, ಭಾರತೀಯರೆಲ್ಲರ ಮನಗೆದ್ದ ಅಮಿತಾದ್ಭುತನಟ. ಇಂಥ ಮಹಾನ್ ನಟ ಒಮ್ಮೆ ಸದುದ್ದೇಶವೊಂದಕ್ಕೆ ಹಣ ಸಂಗ್ರಹಿಸಲು ಕರ್ನಾಟಕದ ರಾಜಧಾನಿ ಬೆಂಗಳೂರಿನಲ್ಲಿ ವಿಶ್ವಸುಂದರಿ ಸ್ಪರ್ಧೆ ನಡೆಸಿ ತೊಂದರೆಗೆ ಸಿಲುಕಿ ತೊಳಲಾಡತೊಡಗುತ್ತಾನೆ. ಬೆರಳ ತುದಿಯಲ್ಲಿ ಬಾಲಿವುಡ್ ಆಳುತ್ತಿದ್ದ ಆ ಮಹಾನ್ ನಟನ ಅಂದಿನ ಕಷ್ಟಕ್ಕೆ ಯಾರೂ ಕ್ಯಾರೆ ಅನ್ನುವುದಿಲ್ಲ. ವಿಷಯ ತಿಳಿದ ಅಂಬರೀಶ್ ಕ್ಷಣಾರ್ಧದಲ್ಲಿ ಆಪದ್ಭಾಂದವನಾಗಿ ಧಾವಿಸಿ ಬಂದು ಬಾಲಿವುಡ್‌ನ ಆ ಮಹಾನ್ ನಟ ಪೊಲೀಸ್ ಇಲಾಖೆಗೆ ಕಟ್ಟಬೇಕಿದ್ದ ದೊಡ್ಡ ಮೊತ್ತದ ಹಣವನ್ನು ಹೊಂದಿಸಿಕೊಡುತ್ತಾರೆ. ಇದೂ ಸಹ ಅಂಬರೀಶ್ ಆಕ್ಟ್ ಮಾಡಿದ ಫಿಲ್ಮ್‌ವೊಂದರ ಘಟನೆಯಲ್ಲ. ಅಂಬರೀಶ್‌ರ ಸಹಜ ಬದುಕಿನ ಸಾರ್ಥಕ ಕಾರ್ಯವಿದು. ಅವರ ಬಾಳ್ವೆಯೇ ಹಾಗೆ. ಅಂದ ಹಾಗೆ ಅಂದು ಅಂಥ ಸಂಕಷ್ಟಕ್ಕೆ ಸಿಲುಕಿಕೊಂಡು ಅಂಬಿಯಿಂದ ನೆರವು ಪಡೆದ ನಟ ಬಾಲಿವುಡ್‌ನ ಮಹಾನ್ ನಟ ಅಮಿತಾಬ್ ಬಚ್ಚನ್ ಎಂದರೆ ಆಶ್ಚರ್ಯವಾಗುತ್ತದಲ್ಲವೆ?
ಹೀಗೆ ಇತರರ ಸಾವು-ನೋವಿಗೆ, ಬದುಕು-ಬೆಳಕಿಗೆ ಸದಾ ಉದಾರಶೀಲನಾಗಿ ಸ್ಪಂದಿಸುತ್ತಾ ನೆರವನ್ನೀಯುವ ಅಂಬರೀಶ್‌ರ ಹಿಂದೆ ಇಂತಹ ಅಸಂಖ್ಯಾತ ಘಟನೆಗಳು, ದೃಶ್ಯಗಳಿವೆ. ಇಂಥ ಒಂದೊಂದು ದೃಶ್ಯಗಳೂ, ಒಂದೊಂದು ಕಥೆಗಳೂ ಯಾವ ಸಿನಿಮಾಕ್ಕೂ ಕಡಿಮೆ ಏನಿಲ್ಲ! ತನ್ನ ಚಿತ್ರ ತೆಗೆದು ನಷ್ಟಕ್ಕೀಡಾದ ನಿರ್ಮಾಪಕನಿಗೆ ಆತನ ಮತ್ತೊಂದು ಚಿತ್ರದಲ್ಲಿ ಫ್ರೀಯಾಗಿ ನಟಿಸಿ ಅವನಿಗೆ ಲಾಭ ಮಾಡಿಕೊಡುವುದು, ಕಷ್ಟದಲ್ಲಿರುವ ಸಹ ನಟ-ನಟಿಯರಿಗೆ ತಮ್ಮ ಕೈಲಾದ ಸಹಾಯ ಮಾಡುವುದರಿಂದ ಹಿಡಿದು ಕತ್ತಲಲ್ಲಿರುವ ಬಡ ಲೈಟ್ ಬಾಯ್‌ಗಳ ಕಷ್ಟ ಕಳೆವ ತನಕ ಅಂಬರೀಶ್‌ರ ಹೃದಯ ವೈಶಾಲ್ಯತೆಯ ಘಟನೆಗಳು ಪುಂಖಾನುಪುಂಖವಾಗಿ ಬರುತ್ತಲೇ ಇರುತ್ತವೆ!
ಇದೆಲ್ಲಾ ಒತ್ತಟ್ಟಿಗಿರಲಿ, ನಮ್ಮ ಸಾಹಸಸಿಂಹ ಡಾ. ವಿಷ್ಣುವರ್ಧನ್ ನಿಧನರಾದ ಸಂದರ್ಭದಲ್ಲಿ ತಮ್ಮ ಆಪ್ತಮಿತ್ರನ ಅಗಲಿಕೆಯ ಮಹಾದುಃಖದಲ್ಲೂ ವಿಷ್ಣುವಿನ ಉಸಿರು ನಿಂತಗಳಿಗೆಯಿಂದ ಅವರ ಅಂತ್ಯಕ್ರಿಯೆ ಮುಗಿಯುವವರೆಗೂ ತನ್ನ ಜೀವದ ಗೆಳೆಯ ವಿಷ್ಣುವಿನ ಸಾವಿಗೊಂದು ಮಹಾಗೌರವ ದೊರಕಿಸಿಕೊಡಲು ಅಂಬರೀಶ್ ಅವರು ಸ್ಪಂದಿಸಿದ ರೀತಿಯನ್ನು ಇಡೀ ನಾಡಿಗೆ ನಾಡೇ ಕೊಂಡಾಡಿದ್ದು ಇನ್ನೂ ನಮ್ಮ ಕಣ್ಮುಂದೆಯೇ ಇದೆ. ಸ್ನೇಹಕ್ಕೊಂದು ಹೊಸ ಭಾಷ್ಯವನ್ನು ಬರೆದು ತಮ್ಮ ಆಪ್ತಮಿತ್ರ ಡಾ. ವಿಷ್ಣುವರ್ಧನ್ ಅವರ ಸಾವನ್ನು ಅಭಿಮಾನ್ ಸ್ಟುಡಿಯೋದಲ್ಲಿ ಚರಿತ್ರೆಯಾಗಿಸಿ ಎಳೆ ಮಗುವಿನಂತೆ ಗಳಗಳನೆ ಅತ್ತ ಅಂಬರೀಶ್ ವ್ಯಕ್ತಿತ್ವ ಎಷ್ಟು ಎತ್ತರದ್ದೆಂದು ಆವತ್ತು ಜಗಜ್ಜಾಹೀರಾಗಿತ್ತು. ಸರ್ಕಾರದ ಮಟ್ಟದಲ್ಲಿ ಕೆಲಸಗಳು ಸಲೀಸಾಗಿ ನಡೆದು ಅಭಿಮಾನ್ ಸ್ಟುಡಿಯೋನಲ್ಲಿ ವಿಷ್ಣು ಐಕ್ಯವಾಗಿ ಇವತ್ತು ಅನೇಕ ಎಡುರು ತೊಡರುಗಳ ನಡುವೆಯೂ ನಿಧಾನವಾದರು ವಿಷ್ಣು ಸ್ಮಾರಕವನ್ನು ಸರ್ಕಾರ ನಿರ್ಮಿಸುತ್ತಿದೆಯೆಂದರೆ ಇದಕ್ಕೆ ಬಹುಪಾಲು ಅಂಬರೀಶ್ ಅವರೇ ಕಾರಣವೆಂಬುದನ್ನು ಇಂದು ಒಂದು ಸಣ್ಣ ಮಗು ಕೂಡ ಹೇಳಬಲ್ಲದು.
ಹಾಗಂತ ಬರೀ ಚಿತ್ರರಂಗದಲ್ಲಿ ಅರ್ಥಾತ್ ಚಿತ್ರರಂಗದವರಿಗೆ ಮಾತ್ರ ಅಂಬರೀಶ್ ಕೊಡುಗೈ ದೊರೆಯಾಗಿಲ್ಲ. ಚಿತ್ರರಂಗದಿಂದಾಚೆಗೂ ಇವರ ನೆರವಿನ ಹಸ್ತ ಚಾಚಿಕೊಂಡಿದೆ. ಇವತ್ತು ಇಂಡಿಯನ್ ಕ್ರಿಕೆಟ್ ಟೀಂನಲ್ಲಿ ನಾಯಕನಾಗಿ ವಿಜೃಂಭಿಸುತ್ತಿರುವ ಮಹೇಂದ್ರಸಿಂಗ್ ಧೋನಿ ಅವರು ತಮ್ಮ ಕ್ರಿಕೆಟ್ ಜೀವನದ ಆರಂಭ ಕಾಲದಲ್ಲಿ ಕಷ್ಟದಲ್ಲಿದ್ದುದನ್ನು ಅರಿತ ಅಂಬರೀಶ್ ಧೋನಿ ಕ್ರಿಕೆಟ್ ಪಂದ್ಯ ಆಡಲು ಮೊದಲ ಬಾರಿಗೆ ಬೆಂಗಳೂರಿಗೆ ಬಂದಿದ್ದಾಗ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲೇ ಅವರಿಗೆ ದೊಡ್ಡ ಮೊತ್ತದ ಹಣ ನೀಡಿದ್ದರು. ಅಷ್ಟೇ ಅಲ್ಲ ಅವರ ಕ್ರಿಕೆಟ್ ಜೀವನದ ಮುಂದಿನ ದಿನಗಳು ಇನ್ನೂ ಯಶಸ್ವಿಯಾಗಲೆಂದು ಅಭಿನಂದಿಸಿದ್ದರು.
ಇವತ್ತು ಅಂಬರೀಶ್ ಇನ್ನೂರಕ್ಕೂ ಹೆಚ್ಚು ಚಿತ್ರಗಳಲ್ಲಿ ಅಭಿನಯಿಸಿ ‘ದ್ವಿಶತಚಿತ್ರನಟ’ ರಾಗಿರಬಹುದು, ನಟ ಸಾರ್ವಭೌಮ ಡಾ. ರಾಜ್‌ಕುಮಾರ್ ನಂತರ ಮೊದಲಿಗೆ ಈ ಸಾಧನೆ ಮಾಡಿದ ಮತ್ತೊಬ್ಬ ನಾಯಕ ನಟನೆಂಬ ಹಿರಿಮೆಯನ್ನು ಗಳಿಸಿರಬಹುದು, ವಿಲನ್ ಆಗಿ ಬಂದ ನಟನೊಬ್ಬ ನಾಯಕ ನಟನಾಗಿ ಇಂಥ ಸಾಧನೆಗೈದ ಪ್ರಪ್ರಥಮ ನಟನೆಂಬ ಗರಿಮೆಯನ್ನೂ ಹೊಂದಿರಬಹುದು. ಸಂಸದರಾಗಿ ಲೋಕಸಭೆ ಪ್ರವೇಶಿಸಿದ ಕನ್ನಡ ಚಿತ್ರರಂಗದ ಮೊದಲ ಕಲಾವಿದನೆಂಬ ಕೀರ್ತಿವಂತನೂ ಆಗಿರಬಹುದು, ಭಾರತೀಯ ಚಿತ್ರರಂಗದ ಇತಿಹಾಸದಲ್ಲೇ ಸತತವಾಗಿ ಮೂರು ಬಾರಿ ಲೋಕಸಭಾ ಚುನಾವಣೆಯಲ್ಲಿ ಗೆದ್ದು ಹ್ಯಾಟ್ರಿಕ್ ಗಳಿಸಿದ ಏಕೈಕ ನಟನೆಂಬ ಇತಿಹಾಸ ನಿರ್ಮಿಸಿರಬಹುದು. ಕೇಂದ್ರ ಸಚಿವ ಸ್ಥಾನಕ್ಕೇರಿದ ಮೊಟ್ಟಮೊದಲ ಕನ್ನಡ ಕಲಾವಿದನೆಂಬ ದಾಖಲೆ ಇವರದ್ದಾಗಿರಬಹುದು. ಶಾಸಕರಾಗಿ ಆಯ್ಕೆಯಾದ ಪ್ರಥಮದಲ್ಲೇ ಸಂಪುಟ ದರ್ಜೆಯ ಮಂತ್ರಿಯಾದ ಮೊದಲ ಸಿನಿಮಾತಾರೆ ಎಂಬ ಚರಿತ್ರೆ ಬರೆದ ಹಿರಿಮೆ ಕೂಡ ಇವರಿಗಿರಬಹುದು. ಆದರೆ ಇಂಥ ದಾಖಲೆಯ ಒಳ್ಳೆ ನಟ ಎನ್ನುವುದಕ್ಕಿಂತಲೂ ಹೆಚ್ಚಾಗಿ ಸಾಟಿಯಿಲ್ಲದ ಒಳ್ಳೆ ಮನುಷ್ಯನೆಂದೇ ಇವರು ಕನ್ನಡಿಗರೆದೆ ಪುಟಗಳಲ್ಲಿ ದಾಖಲಾಗಿದ್ದಾರೆ. ಅದಕ್ಕೇನೆ ಅಂಬರೀಶ್ ಎಂದರೆ ಸಾಕು ಓ! ಗುಣವಂತ ಓ! ಗುಣವಂತ ನಿನ್ನಾ ಗುಣಗಾನ ಮಾಡಲು ಪದಗಳು ಸಿಗುತ್ತಿಲ್ಲ ... ಎಂಬ ಅವರದೇ ಚಲನಚಿತ್ರವೊಂದರ ಗೀತೆಯೊಂದು ಕಿವಿಯಲ್ಲಿ ತೇಲಿ ಬಂದು ಹೃದಯವನ್ನು ತುಂಬಿಕೊಳ್ಳುತ್ತದೆ.
Tags:Ambarish
