ನಂಜನಗೂಡಿನಲ್ಲಿ ದರೋಡೆ ನೆಪದಲ್ಲಿ ಗಂಡನ ಕೊಲೆಗೆ ಹೆಂಡ್ತಿ  ಸ್ಕೆಚ್…ಇಷ್ಟಕ್ಕೂ ಆಗಿದ್ದೇನು ಗೊತ್ತಾ?

ಬದಲಾದ ಕಾಲಘಟ್ಟದಲ್ಲಿ ದಾಂಪತ್ಯಗಳು ಚಿಕ್ಕಪುಟ್ಟ ವಿಚಾರಕ್ಕೆ  ಮುರಿದು ಬೀಳುತ್ತಿವೆ. ಅಷ್ಟೇ ಆಗಿದ್ದರೆ ಪರ್ವಾಗಿರಲಿಲ್ಲ ಇನ್ನೊಂದು ಹೆಜ್ಜೆ ಮುಂದೆ ಹೋಗಿ ಗಂಡನಿಗೆ ಹೆಂಡತಿ, ಹೆಂಡತಿಗೆ ಗಂಡನೇ ಮುಹೂರ್ತ ಫಿಕ್ಸ್ ಮಾಡುವ ಕಲಿಕಾಲ ಶುರುವಾಗಿದೆ. ಇನ್ನೊಬ್ಬರನ್ನು ಕೊಂದು ತಾವು ಸುಖವಾಗಿರುತ್ತೇವೆ ಎಂಬ ಭ್ರಮೆಯಲ್ಲಿ ಬಹುಜನ ಕೊಲೆಯನ್ನು ಮಾಡುತ್ತಿದ್ದಾರೆ. ಆದರೆ  ಕಾನೂನು ಮತ್ತು ಕರ್ಮದಿಂದ ತಪ್ಪಿಸಿಕೊಳ್ಳಲು ಸಾಧ್ಯವಾಗದೆ ಜೈಲ್ ಸೇರುತ್ತಿದ್ದಾರೆ. ಇಂತಹ ಘಟನೆಗಳು ಸಾವಿರಾರು ನಮ್ಮ ಮುಂದೆ ನಡೆಯುತ್ತಿದ್ದರೂ ಅದನ್ನು ನೋಡಿ ತಿದ್ದಿಕೊಳ್ಳದೆ ಚಿಕ್ಕಪುಟ್ಟ ವಿಚಾರಕ್ಕೆ ಕಿರಿಕ್ ಮಾಡಿಕೊಂಡ ಹೆಂಡತಿ ಗಂಡನನ್ನು ಮುಗಿಸುವ ಫ್ಲಾನ್ ಮಾಡಿ ಅಂದರ್ ಆಗಿರುವ ಘಟನೆ ಮೈಸೂರಿನಲ್ಲಿ ನಡೆದಿದೆ.

ಮೈಸೂರು ಜಿಲ್ಲೆಯ ನಂಜನಗೂಡು ಪಟ್ಟಣದಲ್ಲಿ ಹೆಂಡತಿಯಿಂದಲೇ ಗಂಡನ ಹತ್ಯೆಗೆ ಸಂಚು ರೂಪಿಸಿದ ಘಟನೆ ಇದೀಗ ಬಯಲಾಗಿದ್ದು, ಈ ಘಟನೆಯಿಂದ ಜನ ಬೆಚ್ಚಿ ಬಿದ್ದಿದ್ದಾರೆ. ಇಷ್ಟು ಚಿಕ್ಕ ವಿಚಾರಕ್ಕೆ ಕೊಲೆ ಮಾಡಲು ಆಕೆ ಮುಂದಾದಳಾ? ಎಂದು ಜನ ಮಾತಾಡಿಕೊಳ್ಳುತ್ತಿದ್ದಾರೆ. ಗಂಡನ ಜತೆಗೆ ತುಂಬಾ ಚೆನ್ನಾಗಿ ಇರುವಂತೆ ನಾಟಕವಾಡುತ್ತಲೇ ಆತನ ಬೆನ್ನಿಗೆ ಚೂರಿ ಇರಿಯುವ ಮಟ್ಟಕ್ಕೆ ಹೋಗಿರುವ ಆಕೆಯ ದುರ್ಬುದ್ದಿಗೆ ಜನ ಹಿಡಿಶಾಪ ಹಾಕುತ್ತಿದ್ದಾರೆ. ಆತ ಅದೃಷ್ಟವಶಾತ್ ಬದುಕಿ ಉಳಿದಿದ್ದಾನೆ. ಇವತ್ತಲ್ಲ ನಾಳೆ ಆಸ್ಪತ್ರೆಯಿಂದ ಚಿಕಿತ್ಸೆ ಪಡೆದು ಚೇತರಿಸಿಕೊಳ್ಳಬಹುದು. ಆದರೆ ಜೈಲ್ ಸೇರಿರುವ ಆಕೆ ಯಾವಾತ್ತಾದರೂ ಜೈಲಿನಿಂದ ಮರಳಿದರೂ ನೆಮ್ಮದಿಯಾಗಿ ಬದುಕೋಕೆ ಸಾಧ್ಯನಾ?

ಇಷ್ಟಕ್ಕೂ ಗಂಡನ ಕೊಲೆಗೆ ಫ್ಲಾನ್ ಮಾಡಿದ್ದಾದರೂ ಏಕೆ? ಎಂಬುದನ್ನು ನೋಡುತ್ತಾ ಹೋದರೆ ಮೇಲ್ನೋಟಕ್ಕೆ ಕೊಲೆಗೆ ಹೇಳಿಕೊಳ್ಳುವ ಗಂಭೀರ ಕಾರಣಗಳು ಕಾಣುತ್ತಿಲ್ಲ. ಹಾಗಾದರೆ ಚಿಕ್ಕಪುಟ್ಟ ಕಾರಣಕ್ಕೆ ಕೊಲೆ ಮಾಡಲು ಮುಂದಾಗಿ ಬಿಟ್ಟಳಾ ಎಂಬ ಪ್ರಶ್ನೆಗಳು ಕಾಡಲಾರಂಭಿಸಿವೆ. ಈ ಪ್ರಕರಣದ ಪ್ರಮುಖ ಆರೋಪಿ ನಂಜನಗೂಡು ನಿವಾಸಿ ಸಂಗೀತಾ… ಈಕೆ ಕಂಪ್ಯೂಟರ್ ಆಪರೇಟರ್ ಆಗಿದ್ದು ರಾಜೇಂದ್ರ ಎಂಬಾತನನ್ನು  ಮದುವೆಯಾಗಿ ಸಂಸಾರ ನಡೆಸಿಕೊಂಡು ಹೋಗುತ್ತಿದ್ದಳು.

ಗಂಡ ರಾಜೇಂದ್ರ ಫೈಬರ್ ಡೋರ್ ಗಳನ್ನು ಫಿಟ್ ಮಾಡುವ ಕೆಲಸ ಜತೆಗೆ ಕಾರ್ಪೆಂಟರ್ ಕೆಲಸ ಮಾಡಿಕೊಂಡಿದ್ದನು. ಇವರ ಸಂಸಾರ ಚೆನ್ನಾಗಿ ನಡೆದುಕೊಂಡು ಹೋಗುತ್ತಿತ್ತು. ಮೊದಲಿಗೆ ಎಲ್ಲವೂ ಚೆನ್ನಾಗಿಯೇ ಇತ್ತು ಎಂಬುದಕ್ಕೆ ಅವರು ತೆಗೆಸಿಕೊಂಡಿರುವ ಫೋಟೋಗಳೇ ಸಾಕ್ಷಿಯಾಗಿವೆ.

ಸಂಗೀತಾ ಮತ್ತು ರಾಜೇಂದ್ರ ನಡುವೆ ಇತ್ತೀಚೆಗಿನ ದಿನಗಳಲ್ಲಿ ಭಿನ್ನಾಭಿಪ್ರಾಯ ಶುರುವಾಗಿತ್ತು ಎನ್ನಲಾಗಿದೆ. ಈ ನಡುವೆ ಸಂಗೀತ ತನ್ನ ಸಹೋದರ  ಸಂಜಯ್ ಗೆ ಕಾರು ತೆಗೆದುಕೊಡಲು ಸಹಾಯ ಮಾಡಿದ್ದಳು ಎನ್ನಲಾಗುತ್ತಿದ್ದು, ಈ ವಿಚಾರದಲ್ಲಿ ಗಂಡ ರಾಜೇಂದ್ರ ಗರಂ ಆಗಿದ್ದನು. ಇದು ಸಂಸಾರದಲ್ಲಿ ಇನ್ನಷ್ಟು ಬಿರುಕು ಮೂಡಲು ಕಾರಣವಾಯಿತು ಎನ್ನಲಾಗುತ್ತಿದೆ.  ಗಂಡ ಹೆಂಡಿರು ಜಗಳವನ್ನು ತಾವೇ ಸರಿಪಡಿಸಿಕೊಳ್ಳದೆ ರಾಡಿ ಮಾಡಿಕೊಂಡಿದ್ದರು. ಇದೆಲ್ಲದರ ನಡುವೆ ಸಂಗೀತಾಳಿಗೆ ಗಂಡ ರಾಜೇಂದ್ರನನ್ನು ಮುಗಿಸುವ ಮಟ್ಟಿಗೆ ಕೋಪ ಬಂದು ಬಿಟ್ಟಿತು.

ಭಿನ್ನಾಭಿಪ್ರಾಯಗಳು ತಾರಕಕ್ಕೇರಿ ಒಳಗೊಳಗೆ ದ್ವೇಷ ಹೋಗೆಯಾಡುತ್ತಿತ್ತು. ರಾಜೇಂದ್ರ ಜಗಳವಾಡುತ್ತಿದ್ದನಾದರೂ ಹೆಂಡತಿಯನ್ನು ಕೊಲೆ ಮಾಡುವ ಆಲೋಚನೆ ಆತ ಕನಸು ಮನಸಲ್ಲೂ ಯೋಚಿಸಿರಲಿಲ್ಲ. ಎಲ್ಲವೂ ಸರಿ ಹೋಗಿ ತಮ್ಮ ಬದುಕು ಸುಖಮಯವಾಗುತ್ತದೆ ಎಂದು ನಂಬಿದ್ದನು. ಆದರೆ ಸಂಗೀತ ತನ್ನ ಗಂಡ ರಾಜೇಂದ್ರನ ಬಗ್ಗೆ ಸಹೋದರ ಸಂಜಯ್ ಗೆ ಹೇಳಿದ್ದು, ಆತ ಅಕ್ಕನ ಸಂಸಾರವನ್ನು ನೆಟ್ಟಗೆ ಮಾಡುವ ಬದಲು ಬಾವನನ್ನೇ ಮುಗಿಸಲು ಅಕ್ಕನಿಗೆ ಬೆಂಗಾವಲಾಗಿ ನಿಂತು ಬಿಟ್ಟನು.

ತಮ್ಮನೇ ತನ್ನ ಸಹಾಯಕ್ಕೆ ನಿಂತ ಮೇಲೆ ಇನ್ನೇನಾಗಬೇಕು? ಅಕ್ಕ ಸಂಗೀತ ತನ್ನ ಗಂಡನ ಮುಗಿಸಲು ತಮ್ಮ ಸಂಜಯ್ ಗೆ ಗ್ರೀನ್ ಸಿಗ್ನಲ್ ನೀಡಿದ್ದಳು. ಆದರೆ ಕೊಲೆಯನ್ನು ಯಾರಿಗೂ ಗೊತ್ತಾಗದಂತೆ ಮತ್ತು ಅನುಮಾನ ಬಾರದಂತೆ ಮಾಡಲು ತಮ್ಮನೊಂದಿಗೆ ಫ್ಲಾನ್ ಮಾಡಿದ್ದಳು. ಈ ಕೊಲೆಯನ್ನು ಒಬ್ಬರಿಂದ ಮಾಡಲು ಸಾಧ್ಯವಿಲ್ಲದ ಕಾರಣದಿಂದ ಸಂಜಯ್ ಗೆಳೆಯನಾದ ವಿಘ್ನೇಶ್ ಹಾಗೂ ಮತ್ತೊಬ್ಬ ಅಪ್ರಾಪ್ತನನ್ನು ಸೇರಿಸಿಕೊಂಡಿದ್ದನು. ಹೀಗೆ ಮೂವರು ಹಾಗೂ ಸಂಗೀತ ಸೇರಿ ಕೊಲೆಗೆ ಸಂಚು ಮಾಡಿದ್ದರು.

ಅತ್ತ ಗಂಡನ ಕೊಲೆಗೆ ತಮ್ಮನಿಗೆ ಸಾಥ್ ನೀಡಿದ ಸಂಗೀತ ಇತ್ತ ಗಂಡನೊಂದಿಗೆ ಇದ್ದುಕೊಂಡೇ ಆತನ ಚಲನವಲನದ ಬಗ್ಗೆ ತಮ್ಮನಿಗೆ ಮಾಹಿತಿ ನೀಡಲಾರಂಭಿಸಿದ್ದಳು. ಅಷ್ಟೇ ಅಲ್ಲದೆ ಗಂಡನಿಗಾಗಲೀ ಪೊಲೀಸರಿಗೆ ಅನುಮಾನ ಬಾರದಂತೆ ಕೊಲೆ ಮಾಡಲು ನಾಲ್ಕು ಮಂದಿ ಸಂಚು ರೂಪಿಸಿದ್ದರು. ಅದು ಏನೆಂದರೆ  ಎಂದಿನಂತೆ ಸಂಗೀತಳನ್ನು ಬೈಕ್ ನಲ್ಲಿ ಕರೆದುಕೊಂಡು ರಾಜೇಂದ್ರ ಹೋಗುವ ವೇಳೆ ಅವರನ್ನು ಅಡ್ಡಗಟ್ಟಿ ದರೋಡೆ ಮಾಡುವ ನಾಟಕವಾಡಿ ಸಂಗೀತಳ ಕತ್ತಿನಿಂದ ಸರವನ್ನು ಕಿತ್ತುಕೊಳ್ಳುವುದು ಈ ವೇಳೆ ಅಡ್ಡ ಬರುವ ರಾಜೇಂದ್ರನನ್ನು ಹತ್ಯೆಗೈದು ಪರಾರಿಯಾಗುವುದು ಅವರ ಉದ್ದೇಶವಾಗಿತ್ತು. ಹೀಗೆ ಮಾಡುವುದರಿಂದ  ಯಾರೋ ದರೋಡೆಕೋರರು ಕೃತ್ಯ ಎಸಗಿರಬಹುದೆಂದುಕೊಳ್ಳುತ್ತಾರೆ. ತಾವು ಸಿಕ್ಕಿ ಬೀಳದೆ ತಪ್ಪಿಸಿಕೊಳ್ಳಬಹುದು ಎಂಬುದು ಅವರ ಆಲೋಚನೆಯಾಗಿತ್ತು.

ಇತ್ತ ರಾಜೇಂದ್ರನಿಗೆ ಮನೆಯಲ್ಲಿಯೇ ಹಂತಕಿ ತನ್ನ ಬಲಿಗಾಗಿ ಕಾಯುತ್ತಿದ್ದಾಳೆ ಎಂಬ ಚಿಕ್ಕ ಅನುಮಾನವೂ ಬಂದಿರಲಿಲ್ಲ.  ಆದರೆ ಹೆಂಡತಿ ಸಂಗೀತಾ ಮಾತ್ರ ಗಂಡನ ಅಂತಿಮ ದಿನಗಳನ್ನು ಎಣಿಸುತ್ತಾ ಕಾಲ ಕಳೆಯುತ್ತಿದ್ದಳು. ಕೊನೆಗೂ ಆ ದಿನ ಬಂದೇ ಬಿಟ್ಟಿತ್ತು. ಸಂಗೀತಾಳ ತಮ್ಮ ಸಂಜಯ್ ಗೆಳೆಯರೊಂದಿಗೆ ಸೇರಿ ಬಾವ ರಾಜೇಂದ್ರನನ್ನು ಮುಗಿಸಲು ತಯಾರಿ ನಡೆಸಿದ್ದನು. ಅದಕ್ಕಾಗಿ ಬಾಡಿಗೆ ಕಾರನ್ನು ಪಡೆದುಕೊಂಡಿದ್ದನು. ಎಲ್ಲವೂ ಅಂದುಕೊಂಡಂತೆ ಆಗಿದ್ದರಿಂದ ಅಕ್ಟೋಬರ್ 25ರಂದು ಮುಹೂರ್ತ ಫಿಕ್ಸ್ ಮಾಡಲಾಯಿತು.

ಅವತ್ತು ಡ್ಯೂಟಿ ಮುಗಿಸಿದ ಸಂಗೀತಾಳನ್ನು ಮನೆಗೆ ಕರೆದುಕೊಂಡು ಹೋಗಲು ಎಂದಿನಂತೆ ಗಂಡ ರಾಜೇಂದ್ರ ಬಂದಿದ್ದಾನೆ. ಅವಳನ್ನು ತನ್ನ ಸ್ಕೂಟರ್ ನಲ್ಲಿ ಕೂರಿಸಿಕೊಂಡು ಮನೆಯತ್ತ ಹೊರಟಿದ್ದಾನೆ. ಆಗ ರಾತ್ರಿ 7.30ರ ಸಮಯವಾಗಿದ್ದು, ನಂಜನಗೂಡು ಪಟ್ಟಣದ ಹುಂಡುವಿನಹಳ್ಳಿ ಬಡಾವಣೆಯ ಮುಡಾ ಲೇಔಟ್ ಬಳಿ ಹೋಗುತ್ತಿದ್ದಾಗಲೇ ಮೊದಲೇ ಹೊಂಚು ಹಾಕಿ ಕೂತಿದ್ದ ಸಂಜಯ್, ವಿಘ್ನೇಶ್ ಮತ್ತು ಅಪ್ರಾಪ್ತ ಬಾಲಕ ಬಿಳಿಕಾರಿನಲ್ಲಿ ಅವರನ್ನು ಹಿಂಬಾಲಿಸಿ ಬೈಕ್ ನ್ನು ಅಡ್ಡಗಟ್ಟಿದ್ದಾರೆ. ರಾಜೇಂದ್ರನಿಗೆ ಏನಾಗುತ್ತಿದೆ ಎಂಬುದು ಗೊತ್ತೇ ಆಗಿಲ್ಲ. ಅಷ್ಟರಲ್ಲಿಯೇ ಕಾರಿನಿಂದ ಇಳಿದು ಹೋಗಿ ಒಬ್ಬ ಸಂಗೀತಳ ಬಳಿ ಸರ ಕೊಡುವಂತೆ ಅವಾಜ್ ಹಾಕಿದರೆ ಮತ್ತಿಬ್ಬರು ನೇರವಾಗಿ ಹೋಗಿ ರಾಜೇಂದ್ರನ ಬಳಿ ಜಗಳ ತೆಗೆದು ಆತನಿಗೆ ಡ್ರ್ಯಾಗನ್ ನಿಂದ ಚುಚ್ಚಿದ್ದಾರೆ. ಆತನಿಗೆ ಮತ್ತೆ ಚುಚ್ಚಬೇಕೆನ್ನುವ ವೇಳೆ ಅದೇ ಮಾರ್ಗವಾಗಿ ವಾಹನವೊಂದು ಬಂದಿದ್ದರಿಂದ ಹೆದರಿದ ಅವರು ಅಲ್ಲಿಂದ ಓಡಿ ಹೋಗಿದ್ದಾರೆ. ಅದೃಷ್ಟವಶಾತ್ ರಾಜೇಂದ್ರನ ಪ್ರಾಣ ಉಳಿದಿದೆ. ವಿಷಯ ತಿಳಿಯುತ್ತಿದ್ದಂತೆಯೇ ನಂಜನಗೂಡು ಪೊಲೀಸರು ಸ್ಥಳಕ್ಕೆ ಬಂದಿದ್ದು ಗಾಯಾಳು ರಾಜೇಂದ್ರನನ್ನು ಮೈಸೂರಿನ ಖಾಸಗಿ ಆಸ್ಪತ್ರೆಗೆ ಸೇರಿಸಿ ಚಿಕಿತ್ಸೆಗೆ ದಾಖಲಿಸಲಾಯಿತು.

ಪ್ರಕರಣವನ್ನು ಗಂಭೀರವಾಗಿ ಪರಿಗಣಿಸಿದ ಎಸ್ಪಿ ವಿಷ್ಣುವರ್ಧನ್ ಅವರು ಅಡಿಷನಲ್ ಎಸ್ಪಿ ಮಲ್ಲಿಕ್ ಹಾಗೂ ನಾಗೇಶ್, ಡಿವೈಎಸ್ಪಿ ರಘು ರವರ ಮಾರ್ಗದರ್ಶನದಲ್ಲಿ ಹಾಗೂ ಇನ್ಸ್ ಪೆಕ್ಟರ್ ರವೀಂದ್ರ, ಪಿಎಸ್ ಐಗಳಾದ  ಕೃಷ್ಣಕಾಂತ ಕೋಳಿ ಮಂಜುನಾಥ್, ಎಎಸ್ ಐ ದೇವರಾಜಯ್ಯ ನೇತೃತ್ವದಲ್ಲಿ ಸಿಬ್ಬಂದಿಗಳಾದ ಕೃಷ್ಣ,ಶಿವಕುಮಾರ್, ತಿಮ್ಮಯ್ಯ, ಮಹೇಶ್, ಚೇತನ್, ನವೀನ್ ಕುಮಾರ್, ಪೀರಪ್ಪ ಹಾದಿಮನಿ, ರವಿಕುಮಾರ್, ಮಹಿಳಾ ಸಿಬ್ಬಂದಿಗಳಾದ ಸರಿತಾ, ಸಹನ ಹಾಗೂ ಚಾಲಕ ಕೃಷ್ಣ ರವರನ್ನೊಳಗೊಂಡ ತಂಡ ರಚಿಸಿದ್ದಾರೆ.

ಪ್ರಕರಣದ ತನಿಖೆಗೆ ಮುಂದಾದ ತಂಡವು  ಘಟನೆ ನಡೆದ ಸ್ಥಳ, ಸಿಸಿ ಕ್ಯಾಮರಾ ನೆರವು ಹಾಗೂ ವೈಜ್ಞಾನಿಕ ಅಂಶಗಳ ನೆರವಿನಿಂದ ತನಿಖೆ ಆರಂಭಿಸಿದಾಗ  ಪತ್ನಿ ಸಂಗೀತಾ  ಮೇಲೆಯೇ ಸಂಶಯ ಬರಲಾರಂಭಿಸಿತ್ತು. ಆಕೆಯ ವಿಚಾರಣೆ ನಡೆಸಿದಾಗ ಆಕೆ ನೀಡುತ್ತಿದ್ದ ಮಾಹಿತಿಯೂ ಆಕೆ ಮೇಲೆ ಸಂಶಯ ಪಡುವಂತೆ ಮಾಡಿತ್ತು. ಹೀಗಾಗಿ ಪೊಲೀಸರು ತಮ್ಮದೇ ಸ್ಟೈಲ್ ನಲ್ಲಿ ವಿಚಾರಣೆ ನಡೆಸಿದಾಗ ಆಕೆ ನಿಜ ವಿಷಯವನ್ನು ಬಾಯಿ ಬಿಟ್ಟಿದ್ದಾಳೆ. ಹೀಗಾಗಿ ಹತ್ಯೆಗೆ ಯತ್ನಿಸಿ ಸಂಗೀತಾ, ತಮ್ಮ ಸಂಜಯ್, ಗೆಳೆಯ ವಿಘ್ನೇಶ್ ಮತ್ತು ಅಪ್ರಾಪ್ತ ಬಾಲಕನನ್ನು ಬಂಧಿಸಿ ಜೈಲಿಗೆ ಅಟ್ಟಿದ್ದಾರೆ. ದರೋಡೆ ಸನ್ನಿವೇಶ ಸೃಷ್ಟಿಸಿ ಪತಿಯನ್ನು ಹತ್ಯೆ ಮಾಡಲು ಯತ್ನಿಸಿದ ಪತ್ನಿ ಸಂಗೀತ ಮತ್ತು ಸಹಚರರ ಸಂಚು ಭೇದಿಸಿದ ನಂಜನಗೂಡು ಪೊಲೀಸರ ಕಾರ್ಯಕ್ಷಮತೆಗೆ ಸಾರ್ವಜನಿಕ ವಲಯದಲ್ಲಿ ಮೆಚ್ಚುಗೆ ವ್ಯಕ್ತವಾಗಿದೆ.