ಕರ್ನಾಟಕವನ್ನು ಅತಿ ಹೆಚ್ಚು ದಿನ ಆಳಿದ ಸಿಎಂ ಸಿದ್ದರಾಮಯ್ಯ… ಇದೇ ನಂಬರ್ ಅಂಡ್ ನವಂಬರ್ ಕ್ರಾಂತಿ

ಕರ್ನಾಟಕದಲ್ಲಿ ಈ ವರ್ಷದ ಅತ್ಯಂತ ಜನಪ್ರಿಯ ಜೋಕ್ ಅಂದ್ರೆ ನವಂಬರ್ ಕ್ರಾಂತಿ! ಹೌದು ಕಣ್ರೀ‌. ಅದು ಎಲ್ಲಾ ಮುಂಚೂಣಿ ಪತ್ರಿಕೆಗಳ ಟಿ ಆರ್ ಪಿ ಚಾನೆಲ್ಗಳ ಸ್ಲೋಗನ್ ಅಂದ್ರು ನಡೆದೀತು. ಆದ್ರೆ ಅದು ನಿಜಾ ಕಣ್ರೀ.  ಹೌದು, ಯಾಕಂದ್ರೆ ಆ ನವಂಬರ್ ಕ್ರಾಂತಿಯ ನಂಬರ್ ಗೇಮ್ ಈಗ ಸಿದ್ದರಾಮಯ್ಯನವರ ಹೆಸರಿಗೇ ಇದೆ. ಎರಡು ಬಾರಿಯ ಅಧಿಕಾರದಿಂದ ಅವರು ಇದುವರೆಗೆ ಅಂದರೆ ಇಂದಿನ ನವಂಬರ್ 30ರವರೆಗೆ 7 ವರ್ಷ 6 ತಿಂಗಳು 14 ದಿನಗಳನ್ನು ಪೂರೈಸಿದ್ದಾರೆ. ಅಂದರೆ, ಅವರ ಒಟ್ಟಾರೆ ಆಳ್ವಿಕೆಯ ದಿನಗಳ ಸಂಖ್ಯೆ 2749!

ಇದೊಂದು ಕರ್ನಾಟಕದ ಮಟ್ಟಿಗೆ ಸಂಭ್ರಮದ ಬೆಳವಣಿಗೆ. ಈ ಸಂಭ್ರಮವನ್ನು ಸಿದ್ದರಾಮಯ್ಯ ಅವರು ಸುಮಾರು 356 ದಿನಗಳ ಹಿಂದೆಯೇ ಆಚರಿಸಿಕೊಳ್ಳಬೇಕಿತ್ತು. ಆದರೆ, ಅಂಥ ಆಚರಣೆಗೆ ತೊಡಕು ಮತ್ತು ಎಡವಟ್ಟು ಗೂಗಲ್ ನಲ್ಲಿ ಈಗಲೂ ತೋರಿಸುತ್ತಿರುವ ಡಿ. ದೇವರಾಜ ಅರಸು ಅವರು 7 ವರ್ಷ 7 ತಿಂಗಳ ಕಾಲ ಅಧಿಕಾರದಲ್ಲಿದ್ದರು ಎಂಬ ತಪ್ಪು ಮಾಹಿತಿ. ನಾವೆಲ್ಲ ಇಂದಿನ ಜನಾಂಗ ಅಷ್ಟೇ ಏಕೆ ಪತ್ರಿಕೋದ್ಯಮ ಹೆಸರಿನ ಮುದ್ರಣ ಮತ್ತು ವಿದ್ಯುನ್ಮಾನ ಮಾಧ್ಯಮಗಳೆಲ್ಲವೂ ಇನ್ನೂ ಈ ಬಗ್ಗೆ ತಮ್ಮ ತಲೆಯನ್ನು ಬಳಸದಿರುವುದು ದುರಂತ.

ಹಾಗೆ ನೋಡಿದರೆ ಅತ್ಯಂತ ಹೆಚ್ಚು ದಿನ ಮುಖ್ಯಮಂತ್ರಿ ಅಧಿಕಾರ ಸ್ಥಾನದಲ್ಲಿರುವುದು ಸಿದ್ದರಾಮಯ್ಯನವರನ್ನು ಬಿಟ್ಟರೆ ಅರಸು ಅವರಲ್ಲ; ಎಸ್. ನಿಜಲಿಂಗಪ್ಪ ಅವರು. ಎಸ್ ಅವರೇ. ಅವರು 1.11.1956ರಿಂದ 16.5.1958ರ ಮೊದಲ ಅವಧಿ ಮತ್ತು 21.6.1962ರಿಂದ 28.5. 1968ರವರೆಗಿನ ಎರಡು ಅವಧಿಯನ್ನು ಸೇರಿಸಿ ಒಟ್ಟು 7 ವರ್ಷ 5 ತಿಂಗಳು 26 ದಿನ ಅಧಿಕಾರ ನಡೆಸಿದ್ದಾರೆ. ಅಂದರೆ ಅದು ದಿನಗಳಲ್ಲಿ 2731 ದಿನಗಳಾಗುತ್ತದೆ.

ಇದನ್ನು ಬಿಟ್ಟು ಹೆಚ್ಚಿನ ಅಧಿಕಾರ ನಡೆಸಿದವರು ಎಂದು ಅರಸು ಅವರನ್ನು ಬೊಟ್ಟು ಮಾಡುತ್ತಿರುವುದಕ್ಕೆ ಕಾರಣ ಎಸ್. ನಿಜಲಿಂಗಪ್ಪ ಅವರದು ಮೈಸೂರು ಸಂಸ್ಥಾನದ ಆಳ್ವಿಕೆ ಎಂಬುದೂ ಇರಬಹುದು. ಏನಾದರೂ ಆಗಲಿ ಮುಖ್ಯಮಂತ್ರಿ ಎಂದು ತೆಗೆದುಕೊಂಡರೆ ಸಿದ್ದರಾಮಯ್ಯ ಅವರನ್ನು ಹೊರತುಪಡಿಸಿದರೆ ಎರಡನೆಯ ದಾಖಲೆ ನಿಜಲಿಂಗಪ್ಪ ಅವರಿಗೆ ಸಲ್ಲಬೇಕು. ಇಂದಿಗೆ ಸಿದ್ದರಾಮಯ್ಯ ಅವರು ನಿಜಲಿಂಗಪ್ಪ ಅವರ ಹೆಸರಿನಲ್ಲಿದ್ದ ದಾಖಲೆಯನ್ನು ಮುರಿದು 18 ದಿನಗಳು ತುಂಬಿವೆ.

ಇನ್ನು ನವೆಂಬರ್ ಕ್ರಾಂತಿಯ ನಡುವೆ ಹೆಚ್ಚು ಅಧಿಕಾರಾವಧಿ ಪೂರೈಸಿದ ದಾಖಲೆಯನ್ನು ಸಿದ್ದರಾಮಯ್ಯನವರ ಹೆಸರಿಗೆ ಬರೆಯಲು ಗೂಗಲ್ ನ ಮಾಹಿತಿಯನ್ನು ಮೊರೆ ಹೋಗುವುದನ್ನು ಬಿಟ್ಟು ನಾವು ಅರಸು ಅವರ ಅಧಿಕಾರಾವಧಿಯ ದಾಖಲೆಗಳನ್ನು ಪರಿಶೀಲಿಸಬೇಕು. 20.03.1972ರಿಂದ 31.12.1977ರವರೆಗೆ ಮೊದಲ ಅವಧಿಯಾದರೆ ಎರಡನೆಯ ಅವಧಿ 28.02.1978ರಿಂದ 7.1.1980ರವರೆಗೆ. ಅಂದರೆ 6 ವರ್ಷ 6 ತಿಂಗಳು 23 ದಿನ. ಇದನ್ನೇ ದಿನಗಳಲ್ಲಿ ಹೇಳುವುದಾದರೆ 2393 ದಿನಗಳ ಆಳ್ವಿಕೆ ಅರಸು ಅವರ ಹೆಸರಿನಲ್ಲಿದೆ.

ಈ ದಾಖಲೆಯನ್ನು ಸಿದ್ದರಾಮಯ್ಯ ಅವರು ಮುರಿದು ಇಂದಿಗೆ 356 ದಿನಗಳಾದವು‌. ಇನ್ನು 9 ದಿನಗಳು ಕಳೆದರೆ ಸಿದ್ದರಾಮಯ್ಯ ಅರಸು ಅವರಿಗಿಂತ 1 ವರ್ಷ ಹೆಚ್ಚಿಗೆ ಈ ರಾಜ್ಯವನ್ನು ಆಳಿದ ಮುಖ್ಯಮಂತ್ರಿ ಎಂಬ ಖ್ಯಾತಿ ಪಡೆಯುತ್ತಾರೆ. ಇದುವರೆಗೆ ರಾಜ್ಯವನ್ನು ಆಳಿದ ಮುಖ್ಯಮಂತ್ರಿಗಳ ಸಂಖ್ಯೆ 31. ಇದರಲ್ಲಿ 4 ಮಂದಿ ಎರಡೆರಡು ಬಾರಿ ಅಧಿಕಾರಕ್ಕೆ ಬಂದಿದ್ದರೆ ಬಿ.ಎಸ್. ಯಡಿಯೂರಪ್ಪನವರು ಮಾತ್ರ 4 ಬಾರಿ ಅಧಿಕಾರದ ಗದ್ದುಗೆ ಏರಿ ದಾಖಲೆ ಬರೆದಿದ್ದಾರೆ.

ಹೀಗಾಗಿ ಅವರ ಅಧಿಕಾರ ಅವಧಿ ಮಾತ್ರ ಖ್ಯಾತಿಯಲ್ಲಿದೆ. ಆದರೆ, ಇವರು 4 ಬಾರಿ ಅಧಿಕಾರಕ್ಕೆ ಬಂದರೂ ಕೇವಲ 5 ವರ್ಷ 2 ತಿಂಗಳು 15 ದಿನಗಳ ಕಾಲ ಮಾತ್ರ ಅಧಿಕಾರ ನಡೆಸಿದ್ದಾರೆ. ಯಡಿಯೂರಪ್ಪನವರು ಅಧಿಕಾರ ನಡೆಸಿದ ದಿನಗಳ ಸಂಖ್ಯೆ 1900. ಮೊದಲ ಬಾರಿ: 12.11.2018ರಿಂದ 19.11.2007, ಎರಡನೇ ಬಾರಿ: 30.5.2018ರಿಂದ 4.8.2011, ಮೂರನೇ ಬಾರಿ: 17.5.2018ರಿಂದ 19.5.2018, ನಾಲ್ಕನೇ ಬಾರಿ: 26.7.2019ರಿಂದ 26.7. 2021.

ಹತ್ತನೇ ಚಾಮರಾಜ ಒಡೆಯರಿಂದ ನಾಮಕರಣ ಮಾಡಿಸಿಕೊಂಡ ನಾನು ಹೊಸ-ಅಗ್ರಹಾರ…!