ಶಂಕರಮಂಚಿ ಟಿ.ಜಾನಕಿ ಸಿನಿಮಾ ರಂಗದಲ್ಲಿ ಸಾಹುಕಾರ್ ಜಾನಕಿ ಆಗಿ ಮಿಂಚಿದ್ದು ಹೇಗೆ? ನೀವರಿಯದ ಮಾಹಿತಿ..

ದಕ್ಷಿಣ ಭಾರತದಲ್ಲಿ ಹಲವು ನಟಿಯರು ತಮ್ಮದೇ ನಟನೆಯ ಮೂಲಕ ಗಮನಸೆಳೆದಿದ್ದಾರೆ. ಇಂತಹ ದಿಗ್ಗಜ ನಟಿಯರ ಪೈಕಿ ಬಹಳಷ್ಟು ನಟಿಯರು ಕನ್ನಡ, ತಮಿಳು, ತೆಲುಗು ಹೀಗೆ ವಿವಿಧ ಭಾಷೆಗಳ ಸಿನಿಮಾಗಳಲ್ಲಿ ನಟಿಸಿ ಬಹುಭಾಷಾ ತಾರೆಯರಾಗಿ ಮೆರೆದಿದ್ದಾರೆ. ಇಂತಹ  ಹಿರಿಯ ನಟಿಯರನ್ನು ನೆನಪಿಸಿಕೊಳ್ಳುವಾಗಲೆಲ್ಲ ಸಾಹುಕಾರ್ ಜಾನಕಿ ಅವರ ಹೆಸರು ನಮ್ಮ ಮುಂದೆ ಹಾದು ಹೋಗುತ್ತದೆ… ಇಂತಹ ಹಿರಿಯ ನಟಿಯ ಬಗ್ಗೆ ಈ ಬಾರಿ ಕುಮಾರಕವಿ ನಟರಾಜ ಅವರು ಇಲ್ಲಿ ವಿವರಿಸಿದ್ದಾರೆ.

ಕ್ರಿ.ಶ.12ನೇ ಡಿಸೆಂಬರ್ 1931ರಂದು ಅಂದಿನ ಬ್ರಿಟಿಷ್ ಕಾಲದ ಮದ್ರಾಸ್ ಪ್ರೆಸಿಡೆನ್ಸಿ(ಇಂದಿನ ಆಂಧ್ರ) ಮೂಲದ ರಾಜಮಂಡ್ರಿಯ ಮಧ್ಯಮ ವರ್ಗದ ಸುಸಂಸ್ಕೃತ ಮಾಧ್ವಬ್ರಾಹ್ಮಣ ಕುಟುಂಬದಲ್ಲಿ ಜನಿಸಿದರು. ವೆಂಕೋಜಿರಾವ್ ಮತ್ತು ಸಚೀದೇವಿ ದಂಪತಿಯ ಮಗಳಾದ ಈಕೆಗೆ ತಾಯಿತಂದೆ ಇಟ್ಟಹೆಸರು ಶಂಕರಮಂಚಿ ಟಿ.ಜಾನಕಿ! ಅಂದಿನ ಅವಿಭಜಿತ ಬಂಗಾಳ ರಾಜ್ಯದಲ್ಲಿ ನೌಕರಿ ಯಲ್ಲಿದ್ದ ಈಕೆಯ ತಂದೆ ಅನಿರೀಕ್ಷಿತವಾಗಿ ವರ್ಗಾವಣೆಗೊಂಡು ಆಂಧ್ರಕ್ಕೆ ಬರಬೇಕಾಯ್ತು ಬಯಸದೇ ಬಂದ ಭಾಗ್ಯ ಎಂಬಂತೆ ಆಶ್ಚರ್ಯಕರ ರೀತಿಯಲ್ಲಿ ಆಕಸ್ಮಿಕವಾಗಿ ದೊರೆತ ಅವಕಾಶದಿಂದ ಸಿನಿಮಾಲೋಕ ಸೇರಿದರು.

ಕ್ರಮೇಣ ಹದಿಹರೆಯದ ಇವರು ಸಾಹುಕಾರ್ ತೆಲುಗು ಚಿತ್ರದ ಮೂಲಕ ಎಂಟ್ರಿ ಕೊಟ್ಟ ಕಾರಣವೋ ಅಥವಾ ದೊಡ್ಡಕಾರಲ್ಲಿ ಓಡಾಡುತ್ತಿದ್ದರೆಂಬ ಕಾರಣದಿಂದಲೋ ಎಲ್ಲರೂ ಇವರನ್ನು ಸಾಹುಕಾರ್ ಜಾನಕಿ ಎಂದು ಕರೆಯಲು ಪ್ರಾರಂಭಿಸಿದರು. ಅದೃಷ್ಟವಶಾತ್ ಈ ಹೊಸ ಹೆಸರು ಕ್ಲಿಕ್ ಆಗಿ ದೇಶದಾದ್ಯಂತ ಹೆಚ್ಚು ಜನಪ್ರಿಯತೆ ಗಳಿಸಿದರು. ಕನ್ನಡ ತೆಲುಗು ತಮಿಳು ಮಲಯಾಳಂ ಹಿಂದಿ ಬಂಗಾಲಿ; ಆರು ಭಾಷೆಯ ಚಲನಚಿತ್ರಗಳಲ್ಲೂ ಹೀರೋಯಿನ್ ಆಗಿ ಖ್ಯಾತರಾದರು! ಕಾಲ ಕಳೆದಂತೆ ಪೋಷಕ ನಟಿಯಾಗಿ ತಾಯಿ, ಅತ್ತೆ, ಪಾತ್ರದಲ್ಲಿ ಅಭಿನಯಿಸಿದರು.

ಇದನ್ನೂ ಓದಿ:  ಕನ್ನಡ ಕಲಾ ರಸಿಕರ ಮನದಲ್ಲಿ ಅಚ್ಚಳಿಯದ ಹಿರಿಯ ನಟ ಕಲ್ಯಾಣಕುಮಾರ್…

ಕನ್ನಡ ಭಾಷೆ ಚಿತ್ರಗಳು ಸೇರಿದಂತೆ ಬೇರೆ ಬೇರೆ ಭಾಷೆಯ 300ಕ್ಕು ಹೆಚ್ಚು ಸಿನಿಮಾಗಳಲ್ಲಿ ನಟಿಸಿದರು. ತಮ್ಮ ಶ್ರೇಷ್ಠ ಅಭಿನಯಕ್ಕೆ ವಿವಿಧ ರಾಜ್ಯಗಳ ಪ್ರಶಸ್ತಿ, ರಾಷ್ಟ್ರಪ್ರಶಸ್ತಿ, ಫಿಲಂಫೇರ್ ಅವಾರ್ಡ್, ಸೈಮಾಅವಾರ್ಡ್,ತಮಿಳುನಾಡಿನ ಕಲೈಮಾಮಣಿ ಪುರಸ್ಕಾರ, ಶಿವಾಜಿಗಣೇಶನ್ ಸ್ಮರಣಾರ್ಥ ಅವಾರ್ಡ್, ಕರ್ನಾಟಕ ಸರ್ಕಾರದ ರಾಜ್ಯೋತ್ಸವ ಪ್ರಶಸ್ತಿ, ಆಂಧ್ರಪ್ರದೇಶದ ನಂದಿ ಅವಾರ್ಡ್, ಮಹಾನಟಿ ಸಾವಿತ್ರಿ ಅವಾರ್ಡ್, ಅಕ್ಕಿನೇನಿ ನಾಗೇಶ್ವರರಾವ್ ಸ್ಮರಣಾರ್ಥ ಅವಾರ್ಡ್, ಇಂಡಿಯನ್ ಎಕ್ಸ್ಪ್ರೆಸ್ ಡಯೊನರ ಗೋಲ್ಡನ್ ಅವಾರ್ಡ್ ಸೇರಿದಂತೆ ಜೀವಮಾನ ಸಾಧನೆಗೆ ಕೊಡಮಾಡುವ ಹತ್ತಾರು ಉನ್ನತ ಪ್ರಶಸ್ತಿ ಬಹುಮಾನ ಬಿರುದು ಸನ್ಮಾನಗಳನ್ನು ಪಡೆದಿದ್ದಾರೆ.

ಭಾರತದ 4ನೇ ಅತ್ಯುನ್ನತ ನಾಗರಿಕ ಪುರಸ್ಕಾರ ಪದ್ಮಶ್ರೀ ಗೌರವವೂ ಲಭಿಸಿರುವ ಈ ಅದ್ಭುತ ಅಭಿನೇತ್ರಿ ಸಾಹುಕಾರ್ ಜಾನಕಿ, ಭಾರತದ ಸಿನಿಮಾರಂಗದಲ್ಲಿ ಸುಧೀರ್ಘ 70 ವರ್ಷ ಅಮೋಘಸೇವೆ ಸಲ್ಲಿಸಿರುವ ಅಶೋಕ್‍ ಕುಮಾರ್, ದೇವಾನಂದ್, ಧರ್ಮೇಂದ್ರ, ಪ್ರಾಣ್, ಎ.ನಾಗೇಶ್ವರರಾವ್, ಕಾಮಿನಿ ಕೌಶಲ್, ಎಂ.ಲೀಲಾವತಿ ರವರಂಥ ದಿಗ್ಗಜ ನಟನಟಿಯರ ಸಾಲಿಗೆ ಸೇರಿದರು. ಅಲ್ಲದೆ ಈ ಅಪರೂಪ ಕಲಾವಿದೆ 1985ರಲ್ಲಿ ಅಮೆರಿಕ ದೇಶದ ಅರಿಜೋನ ವಿಶ್ವವಿದ್ಯಾಲಯದಿಂದ ಪ್ರತಿಷ್ಠಿತ ಗೌರವ ಡಾಕ್ಟರೇಟ್ ಸ್ವೀಕರಿಸಿದ ಭಾರತೀಯ ಚಿತ್ರರಂಗದ ಪ್ರಪ್ರಥಮ ಹಾಗೂ ಏಕೈಕ ಹೀರೋಯಿನ್!

ಇದನ್ನೂ ಓದಿ:  ರಿಯಲ್ ಹೀರೋ ಮೈಸೂರಿನ ಕೆಂಪರಾಜ ಅರಸು…

ಸಾಹುಕಾರ್ ಜಾನಕಿ ತಮ್ಮ ಹದಿವಯಸ್ಸಿನ ಪ್ರಾರಂಭ ಕಾಲದಲ್ಲಿ ನೂರಾರು ನಾಟಕಗಳಲ್ಲಿ ಪಾತ್ರ ವಹಿಸಿದ ನಂತರ ಸಿನಿಮಾ ಕ್ಷೇತ್ರಕ್ಕೆ ಬರುವ ಮುನ್ನವೆ ಕೇವಲ 14 ವರ್ಷದ ಹುಡುಗಿ ಇದ್ದಾಗ ಆಕಾಶವಾಣಿ ಮದ್ರಾಸ್ ರೇಡಿಯೋ ಕಲಾವಿದೆಯಾಗಿ ಕೆಲವರ್ಷ ಸೇವೆ ಸಲ್ಲಿಸಿದ್ದರು ಸಾವಕಾಶವಾಗಿ ನಾಟಕ-ಸಿನಿಮಾ ಎರಡೂ ರಂಗದಲ್ಲಿ ಉತ್ತಮ ನಟಿಯಾಗಿ ಗುರ್ತಿಸಿಕೊಂಡರು. ದ.ಭಾರತದ ಅತಿರಥ ಮಹಾರಥ ಹೀರೋಗಳಾದ ರಾಜಕುಮಾರ್, ಎಂ.ಜಿ.ಆರ್., ಎನ್.ಟಿ.ರಾಮರಾವ್, ಶಿವಾಜಿಗಣೇಶನ್, ಜೆಮಿನಿಗಣೇಶನ್, ಶ್ರೀಕಾಂತ್, ಮುಮ್ಮುಟ್ಟಿ, ಕೃಷ್ಣ, ರವಿಶಂಕರ್ ಮುಂತಾದ ದಿಗ್ಗಜರ ಚಿತ್ರಗಳಲ್ಲಿ ನಟಿಸಿ ಅತ್ಯುನ್ನತ ಮಟ್ಟಕ್ಕೇರಿದರು.

1954ರಲ್ಲಿ ದೇವಕನ್ನಿಕಾ ಕನ್ನಡ ಚಿತ್ರದ ಮೂಲಕ ಚಂದನವನಕ್ಕೆ ಎಂಟ್ರಿ ಕೊಟ್ಟರು. ಈಕೆ ನಟಿಸಿದ ಕಟ್ಟಕಡೆಯ ಕನ್ನಡ ಸಿನಿಮ 2014ರಲ್ಲಿ ರಿಲೀಸಾದ ಪುಂಗೀದಾಸ! ಹೀರೋ ಯಾರೇ ಆಗಿರಲಿ, ಹೀರೋಯಿನ್ ಸಾ.ಜಾನಕಿ ಇದ್ದರೆ ಮಾತ್ರ ಸಿನಿಮಾ ನೋಡುವಂಥ ಅಭಿಮಾನಿಗಳು ಆಗಿನ ಕಾಲದಲ್ಲೂ ಇದ್ದರೆಂಬುದು ಅಚ್ಚರಿ ಸಂಗತಿ! ವಿಶೇಷತೆ ಎಂದರೆ ಭಾರತದ ಮತ್ತೊಬ್ಬ ಜನಪ್ರಿಯ ನಟಿ ಕೃಷ್ಣಕುಮಾರಿ ಈಕೆಯ ಸೋದರಿ. ಈ ಸರಣಿಯಲ್ಲಿ ಮೊಟ್ಟ ಮೊದಲಿಗರು ಕಮಲಬಾಯಿ-ಲಕ್ಷ್ಮೀಬಾಯಿ, ನಂತರ ಪಂಡರಿಬಾಯಿ-ಮೈನಾವತಿ ಆ ನಂತರವೇ ಕೃಷ್ಣಕುಮಾರಿ-ಸಾಹುಕಾರ್ ಜಾನಕಿ ಜೋಡಿ ನಟೀಮಣಿಯರು.

ಇದನ್ನೂ ಓದಿ:  ಆಗಿನ ಕಾಲದಲ್ಲೆ ಬಾಲಿವುಡ್ ನಲ್ಲಿ ಕನ್ನಡಬಾವುಟ ಹಾರಿಸಿದ್ದ ಆರ್.ನಾಗೇಂದ್ರರಾವ್…

ಇವತ್ತಿಗೂ ಸಹ 93 ವಯಸ್ಸಿನ ಹಿರಿಯ ನಟಿ ಸಾಹುಕಾರ್ ಜಾನಕಿ ಚೆನ್ನೈನಲ್ಲಿ ತಮ್ಮ ಕುಟುಂಬದೊಡನೆ ಜೀವನ ಸಾಗಿಸುತ್ತಿದ್ದಾರೆ. ಇವರ ಮೊಮ್ಮಗಳು ವೈಷ್ಣವಿ ಅರವಿಂದ್ ಕನ್ನಡ ತಮಿಳು ತೆಲುಗು ಚಿತ್ರಗಳ ಜನಪ್ರಿಯ ಹೀರೋಯಿನ್! ಸಾಹುಕಾರ್ ಜಾನಕಿ ನಟಿಸಿದ ಫಿಲಮ್ಸ್: ದೇವಕನ್ನಿಕ, ಭಾಗ್ಯಚಕ್ರ, ಸದಾರಮೆ, ಸತಿಶಕ್ತಿ, ಮಹಿಷಸುರಮರ್ಧಿನಿ, ಕನ್ಯಾರತ್ನ, ಗೌರಿ, ಭಾಗ್ಯೋದಯ, ರತ್ನಗಿರಿರಹಸ್ಯ, ಆದರ್ಶಸತಿ,  ಮಲ್ಲಿಮದುವೆ, ಸಾಕುಮಗಳು, ನವಕೋಟಿ ನಾರಾಯಣ, ಅರುಣೋದಯ, ಮನಸ್ಸಾಕ್ಷಿ, ನಿರಪರಾಧಿ, ತಾಯಿಗೆತಕ್ಕಮಗ, ಆರದಗಾಯ, ಗೀತಾ, ಶಭ್ದವೇದಿ, ಕುಲಪುತ್ರ, ಒಂದೇಗುರಿ, ಅಭಿ, ಸೈ, ಪುಂಗಿದಾಸ…