ಸರಗೂರು ಅಂಚೆ ಕಚೇರಿಯಲ್ಲಿ ವಂಚನೆ… ಕ್ರಮದ ಭರವಸೆ ಮೇರೆಗೆ 4ದಿನಗಳ ಧರಣಿ ಅಂತ್ಯ

ಮೈಸೂರು: ಜಿಲ್ಲೆಯ ಸರಗೂರು  ಅಂಚೆ ಕಚೇರಿಯಲ್ಲಿ ನಡೆದಿರುವ ಭಾರೀ ಹಣ ವಂಚನೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಂಚೆ ಇಲಾಖೆಯ ಮೇಲ್ಪಟ್ಟ ಅಧಿಕಾರಿ ಪೋಸ್ಟ್ ಸೀನಿಯರ್ ಸೂಪರ್ ಡೆಂಟೆಂಟ್ ಹರೀಶ್  ಸ್ಥಳಕ್ಕಾಗಮಿಸಿ ಪರಿಸ್ಥಿತಿಯನ್ನು ಪರಿಶೀಲಿಸಿ, ಗ್ರಾಹಕರೊಂದಿಗೆ ಮಾತನಾಡಿ ಕ್ರಮದ ಭರವಸೆ ನೀಡಿದ ಬಳಿಕ  ಗ್ರಾಹಕರು ನಡೆಸುತ್ತಿದ್ದ ಪ್ರತಿಭಟನೆ ನಾಲ್ಕನೇ ದಿನಕ್ಕೆ ಗು ಅಂತ್ಯಗೊಂಡಿದೆ.

ಅಧಿಕಾರಿಗಳ ಪ್ರಾಥಮಿಕ ತನಿಖೆಯಲ್ಲಿ ಒಟ್ಟು 95 ಮಂದಿಯ ಠೇವಣಿ ಹಣ ಸೇರಿ ಸುಮಾರು ₹2 ಕೋಟಿ 28 ಲಕ್ಷ ದುರುಪಯೋಗಗೊಂಡಿರುವುದು ಬಹಿರಂಗವಾಗಿದೆ. ಇಲಾಖೆಯ ಎಲ್ಲಾ ಶಾಖೆಗಳಿಂದ ಬಂದಿರುವ ಪರಿಶೀಲನಾ ತಂಡಗಳು ದಾಖಲೆಗಳನ್ನು ಪರಿಶೀಲಿಸಿದ್ದು, ಈ ಹಣವನ್ನು ಹಂತ ಹಂತವಾಗಿ ಗ್ರಾಹಕರ ಖಾತೆಗೆ ಹಿಂತಿರುಗಿಸಲಾಗುವುದು ಎಂದು ಅಧಿಕಾರಿಗಳು ಭರವಸೆ ನೀಡಿದರು.

ಜಿಲ್ಲಾ ಪೋಸ್ಟಲ್ ಸೂಪರಿಂಟೆಂಡೆಂಟ್ ಹರೀಶ್ ಅವರು ಮಾತನಾಡಿ, ಯಾರೂ ಆತಂಕ ಪಡಬೇಡಿ. ಯಾರ ಹಣ ಕಳೆದುಹೋಗಿದೆಯೋ ಎಲ್ಲರಿಗೂ ವಾಪಸ್ ನೀಡಲಾಗುತ್ತದೆ. ಹಣ ಬರಲು ಪ್ರಾರಂಭವಾದಾಗ ನಿರಂತರವಾಗಿ ಖಾತೆಗಳಿಗೆ ಜಮಾ ಆಗುತ್ತದೆ  ಎಂದು ಸ್ಪಷ್ಟಪಡಿಸಿದರು.

ಇದೇ ಸಂದರ್ಭದಲ್ಲಿ ಠೇವಣಿದಾರರ ಕೆಲವು ಸಹಿಗಳನ್ನು ಸಿಬ್ಬಂದಿಯೊಬ್ಬರು ನಕಲು ಮಾಡಿ ಹಣ ಡ್ರಾ ಮಾಡಿದ ಅನುಮಾನ ವ್ಯಕ್ತವಾಗಿದ್ದು, ಈ ಸಂಬಂಧ ಕೆಲವು ದಾಖಲೆಗಳನ್ನು ಹೈದರಾಬಾದ್ ಬೆರಳಚ್ಚು ತಜ್ಞರಿಗೆ ಪರೀಕ್ಷೆಗೆ ಕಳುಹಿಸಲಾಗಿದೆ ಎಂದು ಅವರು ತಿಳಿಸಿದರು.

ವಂಚನೆಗೆ ಒಳಗಾದವರು: ಮುಳ್ಳೂರು ಲೋಕೇಶ್, ಎಸ್.ಎನ್. ಮೋಹನ್ ಕುಮಾರ್, ಎಸ್.ಆರ್. ಮಹೇಶ್, ನಿವೃತ್ತ ಶಿಕ್ಷಕ ಶಾಂಭವಮೂರ್ತಿ, ನಿವೃತ್ತ ಅಂಚೆ ಪೋಸ್ಟ್ ಮಾಸ್ಟರ್ ದಾಸೇಗೌಡ, ಮೆಡಿಕಲ್ ನಿತಿನ್, ಸಿ. ನಾಗರಾಜು, ಸಿ. ಚೌಡಶೆಟ್ಟಿ, ವೆಂಕಟೇಶ್, ಸುಂದರಮ್ಮ, ಸರೋಜಮ್ಮ, ಸುಧಾ, ಜಯಮ್ಮ, ಜಿ.ಬಿ ಶಶಿಕಲಾ, ಜಗದೀಶ್, ಶಾಂತವೀರಮೂರ್ತಿ, ರಾಜೇಶ್, ಅನಂತಶೇಯನ, ಕರಿಯಪ್ಪ, ಸರಗೂರು ಲೋಕೇಶ್ ಸೇರಿದಂತೆ ತೊಂಬತೈದು ಮಂದಿಗೂ ಹೆಚ್ಚು ಇದ್ದಾರೆ.

ಇವರಲ್ಲಿ ಕೆಲವರು ₹35 ಲಕ್ಷ, ₹20 ಲಕ್ಷ, ₹15 ಲಕ್ಷ, ₹10 ಲಕ್ಷ, ₹5 ಲಕ್ಷ, ₹3 ಲಕ್ಷ, ₹2 ಲಕ್ಷ, ₹1 ಲಕ್ಷದಿಂದ ಹಿಡಿದು ₹50 ಸಾವಿರವರೆಗೆ ಠೇವಣಿ ಇಟ್ಟಿದ್ದು, ಬಹಳಷ್ಟು ಮಂದಿ ವಯೋವೃದ್ಧರು, ನಿವೃತ್ತ ನೌಕರರು ಮತ್ತು ಮಹಿಳೆಯರು—ತಮ್ಮ ಜೀವನೋಪಾಯಕ್ಕಾಗಿ ಸಂಗ್ರಹಿಸಿದ ಹಣ ವಂಚನೆಗೆ ಒಳಪಟ್ಟಿದ್ದಾರೆ. ಈ ದುರುಪಯೋಗ ಮಾಡಿದ ಸಿಬ್ಬಂದಿಯ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಬೇಕು ಎಂದು ಗ್ರಾಹಕರು ಆಗ್ರಹಿಸಿದರು. ಹಣ ಕಳೆದುಕೊಂಡು ಆರು ತಿಂಗಳು ಕಳೆದರೂ ನ್ಯಾಯ ಸಿಗದಿರುವುದರಿಂದ ಪ್ರತಿಭಟನೆ ನಡೆಸಲಾಗುತ್ತಿತ್ತು.

ಈ ವಿಷಯದಿಂದ ಪ್ರತಿಭಟನಾಕಾರರು ನಿಟ್ಟುಸಿರು ಬಿಟ್ಟರು ಈ ಸಂಬಂಧ ಕೆಲವರು ತಮ್ಮ ಅರೋಗ್ಯ ಬಗ್ಗೆ ಕ್ಯಾನ್ಸರ್ ಕಾಯಿಲೆ ಇನ್ನಿತರರು ನಾವು ಆಸ್ಪತ್ರೆಗೆ ಹೋಗಲು ಹಣವಿಲ್ಲ ನೀಡಿ ಎಂದರು. ಈ ವಿಷಯದ ಬಗ್ಗೆ ಠೇವಣಿದಾರ ಮೆಡಿಕಲ್ ನಿತೀನ್ ಮಾತನಾಡಿ ನಮ್ಮ ಹಣವನ್ನು ನಮಗೆ ಕೊಡಲು ಇವರನ್ನು ಯಾಕೆ ಅಂಗಲಾಚ ಬೇಕು ಎಂದರು. ಗುರುವಾರ ನಡೆದ ಮಾತುಕತೆಯ ನಂತರ ಧರಣಿ ಹಿಂತೆಗೆದುಕೊಳ್ಳಲಾಯಿತು. ಸ್ಥಳಕ್ಕೆ ಸರಗೂರು ಆರಕ್ಷಕ ಉಪ ನಿರೀಕ್ಷಕ ಕಿರಣ್, ಎಎಸ್‌ಐ ಗೋಪಾಲ್, ಇಮ್ರಾನ್, ಆನಂದ್ ಸೇರಿದಂತೆ ಪೊಲೀಸರು ಹೆಚ್ಚಿನ ಸಂಖ್ಯೆಯಲ್ಲಿ ನಿಯೋಜಿತರಾಗಿದ್ದರು.

-ದಾಸೇಗೌಡ