ಸಮಯ ಎಲ್ಲರಿಗೂ ಒಂದೇ ಆಗಿರುತ್ತದೆ… ಆದರೆ ಅದನ್ನು ಹೇಗೆ ಬಳಸುತ್ತೀರ ಎಂಬುದರ ಮೇಲೆ ನಿಮ್ಮ ಬದುಕು ನಿಂತಿರುತ್ತದೆ.. ನಿತ್ಯದ ಜಂಜಾಟದಲ್ಲಿ ಸಮಯದ ಸದುಪಯೋಗದ ಬಗ್ಗೆ ಮತ್ತು ಗುರಿಯ ಕಡೆಗೆ ನಾವು ಹೇಗೆ ಸಾಗಬೇಕು? ಎಂಬುದರ ಕುರಿತಂತೆ ಉಪನ್ಯಾಸಕರು, ಬರಹಗಾರರೂ ಆಗಿರುವ ಪರಮೇಶ ಕೆ.ಉತ್ತನಹಳ್ಳಿ ಅವರು ಇಲ್ಲಿ ಹೇಳುತ್ತಾ ಹೋಗಿದ್ದಾರೆ….
ಇದನ್ನೂ ಓದಿ: ಕೌಶಲತೆ ನಿಮ್ಮಲ್ಲಿದ್ದರೆ ಕೆಲಸ ಸಿಕ್ಕೇ ಸಿಗುತ್ತದೆ… ಮೊದಲು ಕೆಲಸ ಸಂಪಾದಿಸಿ…
ಬೆಳಕನ್ನು ಹಾದು ಬೆಳಕಲ್ಲಿ ನಡೆದು ಬೆಳಕಿನ ಭವನದಲ್ಲಿ ಬೆಳಕಾಗಿ ಅರಳಿ ನಗುವ ನಿಮ್ಮ ಮುಗ್ಧ ನಗುವಿನ ಅಲೆಯು ಹೀಗೆ ಚಿರ ನೂತನವಾಗಿರಲಿ, ಸಂಭ್ರಮದ ಹೊಂಗಿರಣವು, ಅನನ್ಯವಾಗಿರಲಿ, ಈ ದಿನ ನಿಮ್ಮದೇ ನಿಮ್ಮ ಈ ಸಂತೋಷದ ದಿನವನ್ನು ಅತ್ಯಂತ ಸಂಭ್ರಮದಿಂದ ಅನುಭವಿಸಿ, ಸಂಬಂಧಿಗಳ ಒಡನಾಟದ ಅನ್ಯೋನ್ಯ ಬಾಂಧವ್ಯ ಅತ್ಯಂತ ಮಧುರವಾಗಿರಲಿ. ನಿಮ್ಮ ಪಯಣ ಹಿತಕರವಾಗಿರಲಿ, ಸಂತಸದಾಯಕವಾಗಿರಲಿ, ಒಳ್ಳೆಯದಾಗಲಿ.
“ಕುಂಟು ನೆಪಗಳನ್ನು ಬಿಟ್ಟು ಕಾರ್ಯನಿಷ್ಠರಾಗೋಣ” ಎಂಬ ಮಾತು ಜೀವನದ ಯಶಸ್ಸಿಗೆ ಅತ್ಯಂತ ಮಹತ್ವದ ಸಂದೇಶವನ್ನು ನೀಡುತ್ತದೆ. ಮಾನವನ ಜೀವನದಲ್ಲಿ ಸಾಧನೆ ಮಾಡಲು ಬಯಸಿದರೆ, ನೆಪಗಳನ್ನು ಹುಡುಕುವುದು ಅಲ್ಲ, ಕೆಲಸವನ್ನು ನೆರವೇರಿಸುವ ಮನೋಭಾವ ಮುಖ್ಯವಾಗುತ್ತದೆ. ಹಲವಾರು ಸಂದರ್ಭಗಳಲ್ಲಿ ನಾವು ಸಮಯದ ಕೊರತೆ, ಪರಿಸ್ಥಿತಿಯ ಅಸಹಕಾರ, ಅಥವಾ ಸೌಕರ್ಯದ ಅಭಾವವನ್ನು ಕಾರಣವನ್ನಾಗಿ ಮಾಡಿಕೊಂಡು ನಮ್ಮ ಕರ್ತವ್ಯಗಳಿಂದ ದೂರವಾಗುತ್ತೇವೆ. ಆದರೆ ನಿಜವಾದ ಸಾಧಕರು ಯಾವ ಅಡೆತಡೆಗಳನ್ನೂ ಪರಿಗಣಿಸದೇ ತಮ್ಮ ಗುರಿಯ ಕಡೆಗೆ ನಿರಂತರವಾಗಿ ಪ್ರಯತ್ನಿಸುತ್ತಾರೆ. ಆದ್ದರಿಂದ, ಕುಂಟು ನೆಪಗಳನ್ನು ಬಿಟ್ಟು, ಶ್ರದ್ಧೆ, ಪರಿಶ್ರಮ ಮತ್ತು ನಿಷ್ಠೆಯಿಂದ ಕೆಲಸ ಮಾಡುವ ಗುಣವನ್ನು ಬೆಳೆಸಿಕೊಳ್ಳುವುದು ಜೀವನದ ಯಶಸ್ಸಿನ ಮೊದಲ ಹೆಜ್ಜೆಯಾಗಿದೆ.
ಇದನ್ನೂ ಓದಿ: ಯಶಸ್ಸು ಪುಕ್ಕಟೆ ಸಿಗುವ ವಸ್ತುವಲ್ಲ.. ಅದು ನಿರಂತರ ಶ್ರಮದ ಫಲ…
ಇಂದಿನ ವೇಗದ ಯುಗದಲ್ಲಿ “ಸಮಯ ಇಲ್ಲ”, “ನಂತರ ಮಾಡ್ತೀನಿ”, “ಅವಕಾಶ ಸಿಗಲಿಲ್ಲ” ಎಂಬ ಮಾತುಗಳು ಯುವಕರ ಬಾಯಲ್ಲಿ ಸಾಮಾನ್ಯವಾಗಿವೆ. ಆದರೆ ನಿಜವಾಗಿ ಸಮಯದ ಕೊರತೆಯೇ ಕಾರಣವೇ? ಅಥವಾ ನಾವು ಸ್ವತಃ ನಮ್ಮ ಮೇಲೆ ಕಟ್ಟಿಕೊಂಡಿರುವ ಕುಂಟು ನೆಪಗಳೇ ಇದಕ್ಕೆ ಕಾರಣವೇ? ಈ ಪ್ರಶ್ನೆಗೆ ಪ್ರತಿಯೊಬ್ಬರೂ ಆತ್ಮಪರಿಶೀಲನೆ ಮಾಡಲೇಬೇಕಾದ ಸಮಯ ಇದು. ಏಕೆಂದರೆ ಜೀವನದಲ್ಲಿ ಯಶಸ್ಸು ಸಾಧಿಸುವವರನ್ನೂ, ವಿಫಲರಾಗುವವರನ್ನೂ ಬೇರ್ಪಡಿಸುವ ಪ್ರಮುಖ ಅಂಶವೇ ಸಮಯದ ಸದ್ಬಳಕೆ ಮತ್ತು ಜಾಗೃತಾದ ನೆಲೆಯಲ್ಲಿ ಕೈಗೊಳ್ಳಬೇಕಾದ ಕಾರ್ಯಪ್ರವೃತ್ತಿ.
ಮೊದಲು “ಕುಂಟು ನೆಪ” ಎಂದರೆ ಏನು ಎಂಬುದನ್ನು ಅರ್ಥಮಾಡಿಕೊಳ್ಳಬೇಕು. ನಾವು ಮಾಡುವ ಕೆಲಸವನ್ನು ಮುಂದೂಡಲು ಅಥವಾ ತಪ್ಪಿಸಲು ಕೊಡುವ ಕಾರಣವೇ ಕುಂಟು ನೆಪ. ಉದಾಹರಣೆಗೆ “ಇನ್ನೂ ಸಮಯ ಇದೆ”, “ನಾನು ಇಷ್ಟೊಂದು ಒತ್ತಡದಲ್ಲಿದ್ದೇನೆ”, “ನಾಳೆಯಿಂದ ಶುರು ಮಾಡ್ತೀನಿ” ಎಂಬ ಮಾತುಗಳು ನಿಜವಾದ ಕಾರಣಗಳಲ್ಲ, ಅವು ಕೇವಲ ನಮ್ಮ ಮನಸ್ಸಿಗೆ ಕೊಡುವ ಸುಳ್ಳು ಸಮಾಧಾನ. ಈ ನೆಪಗಳು ನಿಧಾನವಾಗಿ ನಮ್ಮ ಜೀವನವನ್ನು ಹಿಂದುಳಿಸುತ್ತದೆ.
ಇದನ್ನೂ ಓದಿ: ಕಾಯಕವೇ ಕೈಲಾಸ…. ನಾವು ನಮಗಾಗಿ ಕೆಲಸ ಮಾಡುವುದನ್ನು ಕಲಿಯೋಣ
ಇಂದು ನಮ್ಮ ಸುತ್ತಲೂ ಅನೇಕ ಸೌಲಭ್ಯಗಳಿವೆ —ಜಂಗಮವಾಣಿ, ಅಂತರ್ಜಾಲ, ವಾಹನಗಳು, ತಂತ್ರಜ್ಞಾನ ಇತ್ಯಾದಿಗಳು ಇವುಗಳೆಲ್ಲಾ ನಮ್ಮ ಸಮಯವನ್ನು ಉಳಿಸಲು ನಿರ್ಮಿಸಲ್ಪಟ್ಟವು. ಆದರೆ ವಾಸ್ತವದಲ್ಲಿ ಇವೇ ನಮ್ಮ ಸಮಯವನ್ನು ಹೆಚ್ಚು ಕಳೆಯುತ್ತಿರುವುದನ್ನು ಗಮನಿಸುತ್ತಿಲ್ಲ. ಸೋಷಿಯಲ್ ಮೀಡಿಯಾದಲ್ಲಿ ಗಂಟೆಗಟ್ಟಲೆ ಕಾಲಹರಣ ಮಾಡುತ್ತೇವೆ, ಆದರೆ ಓದಲು ಅಥವಾ ನಮ್ಮ ಗುರಿಯ ಕಡೆಗೆ ಕೆಲಸ ಮಾಡಲು ಸಮಯವಿಲ್ಲವೆಂದು ಹೇಳುತ್ತೇವೆ. ಅಂದರೆ ಸಮಸ್ಯೆ ಸಮಯದ ಕೊರತೆಯಲ್ಲಿ ಇಲ್ಲ, ಸಮಯದ ದುರುಪಯೋಗದಲ್ಲಿ ಇದೆ..
ಯಶಸ್ವಿ ವ್ಯಕ್ತಿಗಳ ಜೀವನವನ್ನು ನೋಡಿದರೆ ಅವರು ಸಮಯದ ಕೊರತೆಯನ್ನು ಎಂದಿಗೂ ಕಾರಣವನ್ನಾಗಿಸಿಕೊಳ್ಳುವುದಿಲ್ಲ. ಅವರಿಗೂ 24 ಗಂಟೆಗಳೇ ಇವೆ. ಆದರೆ ಅವರು ಪ್ರತಿಯೊಂದು ಕ್ಷಣವನ್ನೂ ಗುರಿಯ ಕಡೆಗೆ ಬಳಸುತ್ತಾರೆ. ಇದರಿಂದ ನಮಗೆ ಒಂದು ಸ್ಪಷ್ಟ ಪಾಠ ಸಿಗುತ್ತದೆ — “ಸಮಯ ಎಲ್ಲರಿಗೂ ಸಮಾನ, ಆದರೆ ಅದರ ಬಳಕೆ ಮಾತ್ರ ವಿಭಿನ್ನ”.
ಇದನ್ನೂ ಓದಿ: ಒತ್ತಡದ ಬದುಕಿನಲ್ಲಿ ಮರೀಚಿಕೆಯಾಗುತ್ತಿರುವ ಮಾನಸಿಕ ನೆಮ್ಮದಿ…
ವಿದ್ಯಾರ್ಥಿಗಳ ದೃಷ್ಟಿಯಿಂದ ನೋಡಿದರೆ ಸಮಯದ ಮೌಲ್ಯ ಇನ್ನಷ್ಟು ಮಹತ್ವದ್ದು. ವಿದ್ಯಾರ್ಥಿ ಜೀವನವೇ ಭವಿಷ್ಯದ ಬುನಾದಿ. ಈ ಅವಧಿಯಲ್ಲಿ ಮಾಡಿದ ಪರಿಶ್ರಮ ಜೀವನಪೂರ್ಣ ಫಲ ನೀಡುತ್ತದೆ. ಆದರೆ ಈ ಸಮಯದಲ್ಲಿ ಕುಂಟು ನೆಪಗಳನ್ನು ಹಿಡಿದುಕೊಂಡು ಕಾಲಹರಣ ಮಾಡಿದರೆ ನಂತರ ಪಶ್ಚಾತ್ತಾಪವಷ್ಟೇ ಉಳಿಯುತ್ತದೆ. ಪರೀಕ್ಷೆ ಹತ್ತಿರವಾದಾಗ “ಇನ್ನೂ ಸಮಯ ಇದ್ದಾಗ ಓದಿದ್ದರೆ ಚೆನ್ನಾಗಿತ್ತು” ಎಂದು ವಿಷಾದಿಸುವುದು ಸಾಮಾನ್ಯ. ಆದರೆ ಅದರಿಂದ ಪ್ರಯೋಜನವಿಲ್ಲ. ಆದ್ದರಿಂದ ಪ್ರಾರಂಭದಲ್ಲೇ ಸಮಯವನ್ನು ಯೋಜನೆ ಮಾಡಿಕೊಂಡು ಬಳಸಬೇಕು.
ಕುಂಟು ನೆಪಗಳನ್ನು ತ್ಯಜಿಸಲು ಅನುಸರಿಸಬೇಕಾದ ಕೆಲವು ಮಾರ್ಗಸೂಚಿಗಳನ್ನು ನಮಗೆ ನಾವೇ ಅಳವಡಿಸಿಕೊಂಡರೆ ಸಮಯವನ್ನು ಸದುಪಯೋಗಿಸಿಕೊಂಡು ಗುರಿಯ ಕಡೆಗೆ ಬದುಕನ್ನು ಕೊಂಡೊಯ್ಯಲು ಸಾಧ್ಯವಾಗುತ್ತದೆ. ಹಾಗಾದರೆ ಆ ಮಾರ್ಗ ಸೂಚಿಗಳು ಹೇಗಿರಬೇಕೆಂಬ ಆಲೋಚನೆಗಳು ಬಾರದಿರದು. ಇಲ್ಲಿದೆ ನೋಡಿ ಆ ಮಾರ್ಗಸೂಚಿಗಳು..
ಗುರಿಯ ಸ್ಪಷ್ಟ ಕಲ್ಪನೆ: ಗುರಿ ಸ್ಪಷ್ಟವಾಗಿರಬೇಕು. ಗುರಿ ಇದ್ದಾಗ ಮಾತ್ರ ಸಮಯದ ಮೌಲ್ಯ ಅರಿವಾಗುತ್ತದೆ. ಗುರಿಯಿಲ್ಲದವನಿಗೆ ಸಮಯ ಹೆಚ್ಚಿದ್ದರೂ ಪ್ರಯೋಜನವಿಲ್ಲ. ಗುರಿ ಇಲ್ಲವೆಂದರೆ ಬದುಕಿಗೆ ಗರಿ ಮೂಡಲಾಗದು. ಜೀವನದಲ್ಲಿ ಇರಿಸಿಕೊಂಡಿರುವ ಗುರಿಗಳನ್ನು ತಲುಪಲು ಮುಖ್ಯವಾಗಿ ಗುರಿಯು ನಿಶ್ಚಿತವಾಗಿರಬೇಕು. ಗುರಿಯ ಸ್ಪಷ್ಟ ಕಲ್ಪನೆ ಎಂಬುದು ಜೀವನದಲ್ಲಿ ಯಶಸ್ಸು ಸಾಧಿಸಲು ಅತ್ಯಂತ ಮುಖ್ಯವಾದ ಅಂಶವಾಗಿದೆ.
ಇದನ್ನೂ ಓದಿ: ನಿಮಗೆ ಗೊತ್ತಾ ನಿಮ್ಮ ಬಯಕೆಗಳೇ ನಿಮಗೆ ವೈರಿಯಂತೆ… ಅದು ಹೇಗೆ? ಏಕೆ?..
ಗುರಿ ಸ್ಪಷ್ಟವಾಗಿದ್ದಾಗ ವ್ಯಕ್ತಿಗೆ ಯಾವ ದಾರಿಯಲ್ಲಿ ಸಾಗಬೇಕು ಎಂಬುದು ಸ್ಪಷ್ಟವಾಗುತ್ತದೆ ಮತ್ತು ಅವನು ತನ್ನ ಸಮಯ, ಶಕ್ತಿ ಹಾಗೂ ಸಂಪನ್ಮೂಲಗಳನ್ನು ಸರಿಯಾದ ದಿಕ್ಕಿನಲ್ಲಿ ಬಳಸಿಕೊಳ್ಳಲು ಸಾಧ್ಯವಾಗುತ್ತದೆ. ಗುರಿ ಅಸ್ಪಷ್ಟವಾಗಿದ್ದರೆ ಪ್ರಯತ್ನಗಳು ಚದುರಿ ಹೋಗುವ ಸಾಧ್ಯತೆ ಹೆಚ್ಚು, ಆದರೆ ಸ್ಪಷ್ಟ ಗುರಿ ಇದ್ದರೆ ಪ್ರತಿಯೊಂದು ಹೆಜ್ಜೆಯೂ ಉದ್ದೇಶಪೂರ್ಣವಾಗಿರುತ್ತದೆ. ಇದು ಮನಸ್ಸಿಗೆ ದೃಢತೆ, ಆತ್ಮವಿಶ್ವಾಸ ಹಾಗೂ ಪ್ರೇರಣೆಯನ್ನು ನೀಡುತ್ತದೆ. ಆದ್ದರಿಂದ ಜೀವನದಲ್ಲಿ ನಾವು ಸಾಧಿಸಬೇಕಾದುದನ್ನು ಸ್ಪಷ್ಟವಾಗಿ ನಿರ್ಧರಿಸಿಕೊಂಡರೆ ಯಶಸ್ಸಿನ ಮಾರ್ಗ ಸುಗಮವಾಗುತ್ತದೆ.
ಯೋಜನೆ ಮಾಡುವುದು : ಯೋಜನೆ ಮಾಡುವುದು ಅಗತ್ಯ. ದಿನದ ಕೆಲಸಗಳನ್ನು ಮುಂಚಿತವಾಗಿ ನಿಗದಿ ಮಾಡಿದರೆ ಅನಾವಶ್ಯಕ ವ್ಯತ್ಯಯಗಳು ಕಡಿಮೆಯಾಗುತ್ತವೆ. ಸಮಯವನ್ನು ಹೇಗೆ ಬಳಸಬೇಕು ಎಂಬುದು ಸ್ಪಷ್ಟವಾಗುತ್ತದೆ. ಯೋಜನೆ ಮಾಡುವುದು ಯಶಸ್ಸಿನ ದಾರಿಗೆ ದೀಪಸ್ತಂಭದಂತೆ ಕಾರ್ಯನಿರ್ವಹಿಸುತ್ತದೆ. ಯಾವುದೇ ಕೆಲಸವನ್ನು ಆರಂಭಿಸುವ ಮೊದಲು ಸರಿಯಾದ ಯೋಜನೆ ರೂಪಿಸಿಕೊಂಡರೆ ಸಮಯ, ಶ್ರಮ ಮತ್ತು ಸಂಪನ್ಮೂಲಗಳನ್ನು ಪರಿಣಾಮಕಾರಿಯಾಗಿ ಬಳಸಿಕೊಳ್ಳಬಹುದು.
ಯೋಜನೆಯಿಂದ ಗುರಿ ಸಾಧನೆಗೆ ಅಗತ್ಯವಾದ ಹಂತಗಳು ಸ್ಪಷ್ಟವಾಗುತ್ತವೆ ಹಾಗೂ ಸಾಧ್ಯವಿರುವ ಅಡಚಣೆಗಳನ್ನು ಮುಂಚಿತವಾಗಿ ಊಹಿಸಿ ಪರಿಹಾರಗಳನ್ನು ಕಂಡುಕೊಳ್ಳಲು ಸಹಾಯಕವಾಗುತ್ತದೆ. ಯೋಜನೆಯಿಲ್ಲದೆ ಮಾಡಿದ ಕೆಲಸದಲ್ಲಿ ಅಸಮರ್ಪಕತೆ ಮತ್ತು ವಿಫಲತೆಯ ಸಾಧ್ಯತೆ ಹೆಚ್ಚಾಗುತ್ತದೆ, ಆದರೆ ಸಮರ್ಪಕ ಯೋಜನೆಯೊಂದಿಗೆ ಕೈಗೊಂಡ ಕಾರ್ಯದಲ್ಲಿ ಯಶಸ್ಸಿನ ಸಾಧ್ಯತೆ ಹೆಚ್ಚುತ್ತದೆ. ಆದ್ದರಿಂದ, ಯಾವುದೇ ಕಾರ್ಯವನ್ನು ಕೈಗೊಳ್ಳುವಾಗ ಸೂಕ್ತ ಯೋಜನೆ ಮಾಡುವುದು ಅತ್ಯಾವಶ್ಯಕ.
ಇದನ್ನೂ ಓದಿ: ನಮ್ಮೊಳಗೆ ಸದಾ ಒಳ್ಳೆಯ ಕಲ್ಪನೆಗಳಿರಲಿ.. ಅದು ನಮ್ಮನ್ನು ಸುಖವಾಗಿಡುತ್ತದೆ..
ಮೊದಲ ಆದ್ಯತೆ : ಪ್ರಾಥಮಿಕತೆ ಗುರುತಿಸಬೇಕು. ಯಾವ ಕೆಲಸ ಮುಖ್ಯ, ಯಾವುದು ಅಪ್ರಮುಖ ಎಂಬುದನ್ನು ತಿಳಿದುಕೊಂಡು ಸಮಯ ವ್ಯರ್ಥವಾಗುವುದಿಲ್ಲ. ಮೊದಲ ಆದ್ಯತೆ ನೀಡುವುದು ಜೀವನದಲ್ಲಿ ಯಶಸ್ಸನ್ನು ಸಾಧಿಸಲು ಅತ್ಯಂತ ಮುಖ್ಯವಾದ ಗುಣವಾಗಿದೆ. ಅನೇಕ ಕೆಲಸಗಳ ನಡುವೆ ಯಾವುದು ಅತ್ಯಾವಶ್ಯಕ ಮತ್ತು ಮುಖ್ಯ ಎಂಬುದನ್ನು ಗುರುತಿಸಿ ಅದಕ್ಕೆ ಮೊದಲ ಸ್ಥಾನ ನೀಡುವುದರಿಂದ ಸಮಯ ಮತ್ತು ಶ್ರಮವನ್ನು ಸರಿಯಾಗಿ ಬಳಕೆ ಮಾಡಬಹುದು.
ಆದ್ಯತೆ ನೀಡುವುದರಿಂದ ಅಲ್ಪಪ್ರಾಮುಖ್ಯ ಕೆಲಸಗಳಲ್ಲಿ ಸಮಯ ವ್ಯರ್ಥವಾಗುವುದನ್ನು ತಪ್ಪಿಸಿ ಗುರಿ ಸಾಧನೆಗೆ ಸಹಾಯವಾಗುತ್ತದೆ. ಇದು ಕಾರ್ಯಕ್ಷಮತೆಯನ್ನು ಹೆಚ್ಚಿಸುವುದರ ಜೊತೆಗೆ ಮನಸ್ಸಿಗೆ ಸ್ಪಷ್ಟತೆ ಮತ್ತು ನಿಯಂತ್ರಣ ನೀಡುತ್ತದೆ. ಆದ್ದರಿಂದ ಪ್ರತಿಯೊಬ್ಬರೂ ತಮ್ಮ ಕೆಲಸಗಳಲ್ಲಿ ಯಾವುದು ಮೊದಲು ಮಾಡಬೇಕು ಎಂಬುದನ್ನು ಸರಿಯಾಗಿ ನಿರ್ಧರಿಸಿ ಅದಕ್ಕೆ ಆದ್ಯತೆ ನೀಡುವುದು ಅತ್ಯಂತ ಅಗತ್ಯವಾಗಿದೆ.
ಶಿಸ್ತು ಮತ್ತು ನಿಯಮ ಪಾಲನೆ: ಶಿಸ್ತು ಮತ್ತು ನಿಯಮ ಪಾಲನೆ. ಕೆಲಸವನ್ನು ಸಮಯಕ್ಕೆ ಮಾಡುವುದು ಒಂದು ಅಭ್ಯಾಸವಾಗಬೇಕು. ಇದು ನಿಧಾನವಾಗಿ ವ್ಯಕ್ತಿತ್ವವನ್ನು ರೂಪಿಸುತ್ತದೆ. ಜೀವನ ಶಿಶ್ತು ಸಂಯಮದ ನಿಯಮವು ಬದುಕಿನಲ್ಲಿ ಇರಿಸಿಕೊಂಡಿರುವ ಗುರಿಯನ್ನು ತಲುಪಲು ಸಾಧ್ಯವಾಗುತ್ತದೆ. ಶಿಸ್ತ ಮತ್ತು ನಿಯಮ ಪಾಲನೆ ವ್ಯಕ್ತಿಯ ವ್ಯಕ್ತಿತ್ವವನ್ನು ನಿರ್ಮಿಸುವ ಪ್ರಮುಖ ಅಂಶಗಳಾಗಿವೆ. ಶಿಸ್ತಿನಿಂದ ಜೀವನ ನಡೆಸುವವರು ತಮ್ಮ ಕಾರ್ಯಗಳನ್ನು ಸಮಯಕ್ಕೆ ಸರಿಯಾಗಿ ಪೂರ್ಣಗೊಳಿಸಿ ವಿಶ್ವಾಸಾರ್ಹರಾಗುತ್ತಾರೆ.
ಇದನ್ನೂ ಓದಿ: ನಾವೆಲ್ಲರೂ ದೇಹದ ಆರೋಗ್ಯ ಮಾತ್ರವಲ್ಲ.. ಮನಸ್ಸಿನ ಆರೋಗ್ಯಕ್ಕೂ ಒತ್ತು ನೀಡಬೇಕು…
ನಿಯಮಗಳನ್ನು ಪಾಲಿಸುವುದು ಕೇವಲ ನಿಯಂತ್ರಣವಲ್ಲ, ಅದು ನಮ್ಮ ನಡೆ-ನುಡಿಗೆ ಸರಿಯಾದ ದಿಕ್ಕನ್ನು ನೀಡುತ್ತದೆ ಮತ್ತು ಸಮಾಜದಲ್ಲಿ ಗೌರವವನ್ನು ಹೆಚ್ಚಿಸುತ್ತದೆ. ಶಿಸ್ತಿನ ಜೀವನವು ಮನಸ್ಸಿಗೆ ಏಕಾಗ್ರತೆ, ಸಮತೋಲನ ಮತ್ತು ದೃಢತೆಯನ್ನು ನೀಡುತ್ತದೆ, ಇದು ಗುರಿ ಸಾಧನೆಗೆ ಅತ್ಯಂತ ಸಹಾಯಕವಾಗುತ್ತದೆ. ಆದ್ದರಿಂದ ಶಿಸ್ತ ಮತ್ತು ನಿಯಮ ಪಾಲನೆ ನಮ್ಮ ದಿನನಿತ್ಯದ ಬದುಕಿನಲ್ಲಿ ಅಳವಡಿಸಿಕೊಳ್ಳಬೇಕಾದ ಮಹತ್ವದ ಮೌಲ್ಯಗಳಾಗಿವೆ.
ಅನಗತ್ಯ ಸಂಗತಿಗಳ ತ್ಯಜಿಸಬೇಕು: ವಿಚಲನಗಳಿಂದ ದೂರವಿರಬೇಕು. ಮೊಬೈಲ್, ಅನಗತ್ಯ ಮಾತುಕತೆ, ವ್ಯರ್ಥ ಸಂಚಾರ — ಇವೆಲ್ಲವೂ ಸಮಯದ ಕಳ್ಳರು. ಇವುಗಳನ್ನು ನಿಯಂತ್ರಿಸಬೇಕು. ಅನಗತ್ಯ ಸಂಗತಿಗಳನ್ನು ತ್ಯಜಿಸುವುದು ಉತ್ತಮ ಜೀವನದತ್ತ ಸಾಗುವ ಮಹತ್ವದ ಹೆಜ್ಜೆಯಾಗಿದೆ. ನಮ್ಮ ಸಮಯ, ಶಕ್ತಿ ಮತ್ತು ಮನಸ್ಸನ್ನು ವ್ಯರ್ಥಗೊಳಿಸುವ ಚಟುವಟಿಕೆಗಳು, ಕೆಟ್ಟ ಅಭ್ಯಾಸಗಳು ಹಾಗೂ ನಿರರ್ಥಕ ವಿಚಾರಗಳನ್ನು ಬಿಟ್ಟುಬಿಡುವುದರಿಂದ ನಾವು ಹೆಚ್ಚು ಉತ್ಪಾದಕವಾಗಲು ಸಾಧ್ಯವಾಗುತ್ತದೆ.
ಅನಗತ್ಯ ಸಂಗತಿಗಳಲ್ಲಿ ತೊಡಗಿಕೊಂಡರೆ ಗುರಿ ಸಾಧನೆಗೆ ಅಡ್ಡಿಯಾಗುತ್ತದೆ, ಆದರೆ ಅವನ್ನು ತ್ಯಜಿಸಿದರೆ ಮನಸ್ಸಿಗೆ ಸ್ಪಷ್ಟತೆ, ಶಾಂತಿ ಮತ್ತು ಏಕಾಗ್ರತೆ ದೊರಕುತ್ತದೆ. ಇದು ನಮ್ಮ ಜೀವನದಲ್ಲಿ ಉತ್ತಮ ಚಿಂತನೆ ಮತ್ತು ಸಕಾರಾತ್ಮಕ ಅಭ್ಯಾಸಗಳನ್ನು ಬೆಳೆಸಲು ಸಹಾಯ ಮಾಡುತ್ತದೆ. ಆದ್ದರಿಂದ, ಅಗತ್ಯವಿಲ್ಲದ ಸಂಗತಿಗಳನ್ನು ಗುರುತಿಸಿ ಅವನ್ನು ದೂರವಿಟ್ಟು, ನಮ್ಮ ಗುರಿಯತ್ತ ದೃಢವಾಗಿ ಸಾಗುವುದು ಅತ್ಯಂತ ಅಗತ್ಯವಾಗಿದೆ.
ಇದನ್ನೂ ಓದಿ: ಮರ್ಕಟದಂತಹ ಮನಸ್ಸನ್ನು ಏಕಾಗ್ರತೆಯ ಗೂಟಕ್ಕೆ ಕಟ್ಟಿ ಹಾಕುವುದು ಹೇಗೆ..?
ಸ್ವಯಂ ಪರಿಶೀಲನೆ ಅಗತ್ಯ : ಕೊನೆಯದಾಗಿ, ಸ್ವಯಂ ಪರಿಶೀಲನೆ ಅತ್ಯಗತ್ಯ. ದಿನದ ಕೊನೆಯಲ್ಲಿ “ಇಂದು ನಾನು ಸಮಯವನ್ನು ಹೇಗೆ ಬಳಸಿದೆ?” ಎಂದು ಪ್ರಶ್ನಿಸಿಕೊಳ್ಳಬೇಕು. ಇದರಿಂದ ತಪ್ಪುಗಳು ತಿಳಿದು ಮುಂದೆ ಸರಿಪಡಿಸಬಹುದು. ಸ್ವಯಂ ಪರಿಶೀಲನೆ ವ್ಯಕ್ತಿಯ ಬೆಳವಣಿಗೆಗೆ ಅತ್ಯಂತ ಅಗತ್ಯವಾದ ಪ್ರಕ್ರಿಯೆಯಾಗಿದೆ. ನಮ್ಮ ನಡೆ-ನುಡಿ, ಆಲೋಚನೆಗಳು ಮತ್ತು ಕಾರ್ಯಗಳನ್ನು ಕಾಲಕಾಲಕ್ಕೆ ವಿಮರ್ಶೆ ಮಾಡಿಕೊಳ್ಳುವುದರಿಂದ ನಮ್ಮ ಶಕ್ತಿಗಳು ಮತ್ತು ದೌರ್ಬಲ್ಯಗಳನ್ನು ಅರಿತುಕೊಳ್ಳಲು ಸಾಧ್ಯವಾಗುತ್ತದೆ. ಇದು ತಪ್ಪುಗಳನ್ನು ಸರಿಪಡಿಸಲು, ಉತ್ತಮ ಅಭ್ಯಾಸಗಳನ್ನು ಬೆಳೆಸಿಕೊಳ್ಳಲು ಮತ್ತು ಜೀವನದ ದಿಕ್ಕನ್ನು ಸರಿಯಾಗಿ ಹೊಂದಿಸಲು ಸಹಾಯಕವಾಗುತ್ತದೆ.
ಸ್ವಯಂ ಪರಿಶೀಲನೆ ಮನಸ್ಸಿಗೆ ಸ್ಪಷ್ಟತೆ ನೀಡುವುದರ ಜೊತೆಗೆ ಆತ್ಮವಿಶ್ವಾಸವನ್ನು ಹೆಚ್ಚಿಸುತ್ತದೆ ಮತ್ತು ನಿರಂತರ ಪ್ರಗತಿಯತ್ತ ನಮ್ಮನ್ನು ಮುನ್ನಡೆಸುತ್ತದೆ. ಆದ್ದರಿಂದ ಪ್ರತಿಯೊಬ್ಬರೂ ತಮ್ಮ ಜೀವನದಲ್ಲಿ ಸ್ವಯಂ ಪರಿಶೀಲನೆಯನ್ನು ಅಳವಡಿಸಿಕೊಳ್ಳುವುದು ಅತ್ಯಂತ ಅಗತ್ಯವಾಗಿದೆ.
ಇಲ್ಲಿ ನಾವು ಗಮನಿಸಬೇಕಾದ ಮತ್ತೊಂದು ಪ್ರಮುಖ ಸಂಗತಿ ಏನೆಂದರೆ, “ಸಮಯ ಇಲ್ಲ” ಎಂಬುದು ಬಹುತೇಕ ಸಂದರ್ಭಗಳಲ್ಲಿ ಒಂದು ಸುಂದರವಾದ ಸುಳ್ಳು ನೆಪ. ನಮಗೆ ಇಷ್ಟವಾದ ಕೆಲಸಗಳಿಗೆ ನಾವು ಯಾವಾಗಲೂ ಸಮಯ ಕಂಡುಕೊಳ್ಳುತ್ತೇವೆ. ಆದರೆ ಕಷ್ಟದ ಕೆಲಸಗಳನ್ನು ತಪ್ಪಿಸಲು ಮಾತ್ರ ಸಮಯದ ಕೊರತೆಯನ್ನು ಕಾರಣವನ್ನಾಗಿಸುತ್ತೇವೆ. ಇದು ನಮ್ಮ ಮನಸ್ಸಿನ ದುರ್ಬಲತೆ.
ಇದನ್ನೂ ಓದಿ: ಜನರು ಹೊಟ್ಟೆಗಾಗಿ- ಗೇಣುಬಟ್ಟೆಗಾಗಿ ಮಾತ್ರ ದುಡಿಯುತ್ತಿಲ್ಲ… ಮತ್ತೆ?
ಈ ಮೇಲಿನ ವಿಚಾರಗಳ ವಿಭಾಗಗಳಿಂದ ಅರಿಯಬೇಕಾದ ಅಗತ್ಯದ ಅರಿವೆಂದರೆ ಸಾಧನೆಯ ಹಾದಿಯಲ್ಲಿ ಸಾಗುವಾಗ ಅಗತ್ಯವಾಗಿ ಮಾತ್ರವಲ್ಲ ಅವಶ್ಯವಾಗಿ ಅನುಸರಿಸಬೇಕಾದ ಸೂತ್ರಗಳನ್ನು ಇಲ್ಲಿ ಒದಗಿಸಲಾಗಿದೆ. ಇದಕ್ಕೂ ಮಿಗಿಲಾಗಿ ಇನ್ನಷ್ಟು ಮತ್ತಷ್ಟು ಸಂಗತಿಗಳು ಅವರವರ ಅರಿವಿಗೆ ದಕ್ಕಿದರೆ ಕುಂಟು ನೆಪಗಳು ಸಕಾರ್ಯದಲ್ಲಿ ಆಗಬೇಕಾದ ಕಾರ್ಯಗಳನ್ನು ಕುಂಟಲು ಬಿಡದೆ, ಸಮಯದ ಪರಿಮಿತಿಯೊಳಗೆ ಪೂರ್ಣಗೊಳಿಸಿಕೊಳ್ಳಲು ಸಾಧ್ಯವಾಗುತ್ತದೆ.
ಅದಕ್ಕೆ ಬಲ್ಲವರು ಹೇಳಿದ್ದು ನಾಳೆ ಮಾಡುವುದನ್ನು ಇಂದು ಮಾಡು, ಇಂದು ಮಾಡುವುದನ್ನು ಈಗಲೇ ಮಾಡು ಎಂದು ಅಷ್ಟೇ ಅಲ್ಲ ಶುಭಸ್ಯ ಶೀಘ್ರಂ ಅಂದರೆ ಒಳ್ಳೆಯದಾಗೋದಾದ್ರೆ ಶೀಘ್ರದಲ್ಲೇ ಆಗಲಿ. ಒಳ್ಳೆಯ ಕೆಲಸಗಳನ್ನು ಮಾಡಲು ಯಾವುದೇ ರೀತಿಯಲ್ಲೂ ಸಮಯವನ್ನು ಕಾಯುವ ಅಗತ್ಯವಿಲ್ಲ. ಅದಕ್ಕಾಗಿಯೇ ಬಸವಣ್ಣನವರು ತಮ್ಮ ವಚನವೊಂದರಲ್ಲಿ ಈ ಬಗೆಯಾಗಿ ತಿಳಿಸಿದ್ದಾರೆ.
ಎಮ್ಮವರು ಬೆಸಗೊಂಡರೆ ಶುಭಲಗ್ನವೆನ್ನಿರಯ್ಯಾ;
ರಾಶಿ ಕೂಟ ಋಣಸಂಬಂಧವುಂಟೆಂದು ಹೇಳಿರಯ್ಯಾ;
ಚಂದ್ರಬಲ ತಾರಾಬಲವುಂಟೆಂದು ಹೇಳಿರಯ್ಯಾ;
ನಾಳಿನ ದಿನಕಿಂದಿನ ದಿನ ಲೇಸೆಂದು ಹೇಳಿರಯ್ಯಾ;
ಕೂಡಲಸಂಗಮದೇವನ ಪೂಜಿಸಿದ ಫಲ ನಿಮ್ಮದಯ್ಯಾ!
ಜೀವನದಲ್ಲಿ ಸಾಧನೆ ಮಾಡಬೇಕೆಂದರೆ ಕುಂಟು ನೆಪಗಳನ್ನು ಬಿಟ್ಟು ಕ್ರಿಯಾಶೀಲರಾಗಬೇಕು. ಯೋಜನೆಗಳು ಮಾತ್ರ ಇದ್ದರೆ ಸಾಕಾಗುವುದಿಲ್ಲ; ಅವು ಕಾರ್ಯರೂಪಕ್ಕೆ ಬರಬೇಕು. ಸಣ್ಣ ಸಣ್ಣ ಹೆಜ್ಜೆಗಳು ದೊಡ್ಡ ಯಶಸ್ಸಿಗೆ ದಾರಿ ಮಾಡುತ್ತವೆ. “ಇಂದು ಮಾಡಬೇಕಾದುದನ್ನು ನಾಳೆಗೆ ಮುಂದೂಡಬೇಡಿ” ಎಂಬ ತತ್ವವನ್ನು ಅಳವಡಿಸಿಕೊಂಡರೆ ಜೀವನದಲ್ಲಿ ಮಹತ್ತರ ಬದಲಾವಣೆ ಕಾಣಬಹುದು.
ಸಮಯವು ಜೀವನದ ಅತ್ಯಮೂಲ್ಯ ಸಂಪತ್ತು. ಅದನ್ನು ಮರಳಿ ಪಡೆಯಲು ಸಾಧ್ಯವಿಲ್ಲ. ಆದ್ದರಿಂದ ಕುಂಟು ನೆಪಗಳನ್ನು ಬಿಟ್ಟು ಪ್ರತಿಯೊಂದು ಕ್ಷಣವನ್ನೂ ಸದುಪಯೋಗಪಡಿಸಿಕೊಳ್ಳಬೇಕು. ನೆಪಗಳನ್ನು ಹೇಳುವವರು ಅವಕಾಶಗಳನ್ನು ಕಳೆದುಕೊಳ್ಳುತ್ತಾರೆ; ಕಾರ್ಯನಿಷ್ಠರು ಮಾತ್ರ ಯಶಸ್ಸನ್ನು ಸಾಧಿಸುತ್ತಾರೆ. ಹೀಗಾಗಿ ನಾವು ಯಾವ ವರ್ಗದಲ್ಲಿ ಇರಬೇಕು ಎಂಬುದನ್ನು ನಾವು ತೀರ್ಮಾನಿಸಬೇಕು. “ಸಮಯ ಇಲ್ಲ” ಎನ್ನುವುದನ್ನು ಬಿಟ್ಟು “ಸಮಯವನ್ನು ನಿರ್ಮಿಸಿಕೊಳ್ಳುತ್ತೇನೆ” ಎಂಬ ಮನೋಭಾವ ಬೆಳೆಸಿದಾಗಲೇ ನಿಜವಾದ ಯಶಸ್ಸು ನಮ್ಮದಾಗುತ್ತದೆ.
ಇದನ್ನೂ ಓದಿ: ಹೃದಯಾಘಾತಕ್ಕೆ ಬದಲಾದ ಜೀವನ ಶೈಲಿ ಕಾರಣವೇ..?
ಕುಂಟು ನೆಪಗಳು ನಮ್ಮನ್ನು ಕ್ಷಣಿಕವಾಗಿ ಸಮಾಧಾನಪಡಿಸಬಹುದು, ಆದರೆ ಅವು ನಮ್ಮ ಬೆಳವಣಿಗೆಗೆ ದೊಡ್ಡ ಅಡ್ಡಿಯಾಗುತ್ತವೆ. ಜೀವನದಲ್ಲಿ ಸಾಧನೆ ಮಾಡಬೇಕೆಂದರೆ ನೆಪಗಳನ್ನು ಬಿಟ್ಟು ಕಾರ್ಯನಿಷ್ಠತೆಯನ್ನು ಅಳವಡಿಸಿಕೊಳ್ಳಬೇಕು. ಪ್ರತಿ ಕ್ಷಣವನ್ನು ಸದುಪಯೋಗಪಡಿಸಿಕೊಂಡು ನಮ್ಮ ಕರ್ತವ್ಯವನ್ನು ಪ್ರಾಮಾಣಿಕವಾಗಿ ನಿರ್ವಹಿಸಿದಾಗ ಮಾತ್ರ ಯಶಸ್ಸು ನಮ್ಮನ್ನು ಸೇರುತ್ತದೆ. ನೆಪಗಳ ಹಿಂದೆ ಅಡಗುವುದಕ್ಕಿಂತ, ಸವಾಲುಗಳನ್ನು ಸ್ವೀಕರಿಸಿ ಪರಿಶ್ರಮದ ಮೂಲಕ ಮುನ್ನಡೆಯುವ ಮನೋಭಾವ ಬೆಳೆಸಿಕೊಳ್ಳೋಣ. ಹೀಗಾದಾಗ ನಮ್ಮ ಜೀವನವು ಅರ್ಥಪೂರ್ಣವಾಗುತ್ತದೆ ಮತ್ತು ನಾವು ಇತರರಿಗೆ ಮಾದರಿಯಾಗುತ್ತೇವೆ.
