ಬೆಂಗಳೂರು: ರವೀಂದ್ರ ಕಲಾಕ್ಷೇತ್ರದಲ್ಲಿ ಶಿವಲೀಲಾ ಕಲ್ಚರಲ್ ಮತ್ತು ಚಾರಿಟೇಬಲ್ ಟ್ರಸ್ಟ್ ನಿಂದ ಸಿರಿಗನ್ನಡಂ ಗೆಲ್ಗೆ ಶ್ರೀ ಗಂಧದ ನಾಡಿನ ಗತವೈಭವ ಸಾರುವ ನೃತ್ಯರೂಪಕ ಆಯೋಜಿಸಲಾಗಿತ್ತು.ಪ್ರಥಮವಾಗಿ ಕಟ್ಟಿದ ಮಯೂರ ವರ್ಮ ಕನ್ನಡ ನಾಡನ್ನು ಬಗೆ, ಗಂಗರ ಕಾಲ ಘಟ್ಟ, ವೈರಾಗ್ಯ ಮೂರ್ತಿಯ ಪ್ರತಿರೂಪವಾಗಿ ಹೊರಹೊಮ್ಮಿದ ಶ್ರವಣಬೆಳಗೊಳದ ಬಾಹುಬಲಿ, ಚಾಲುಕ್ಯ ದೊರೆ ಇಮ್ಮಡಿ ಪುಲಿಕೇಶಿಯ ಶೌರ್ಯ ಪರಾಕ್ರಮ, ಹೊಯ್ಸಳ ರಾಜ ವಿಷ್ಣುವರ್ಧನನಿಗೆ “ತಲಕಾಡುಗೊಂಡ” ಬಿರುದು ಬಂದದ್ದು, ಶರಣ ಸಂಸ್ಕೃತಿಯ ಬೀಡು ನಮ್ಮ ನಾಡು ಎಂಬ ರೂಪಕವನ್ನು ಕಲಾವಿದರು ಪರಿಣಾಮಕಾರಿಯಾಗಿ ಪ್ರತಿಬಿಂಬಿಸಿದರು.
ಮಾಜಿ ಸಚಿವೆ ರಾಣಿ ಸತೀಶ್ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿ, ರಾಜ್ಯದಲ್ಲಿ ಕಲೆ, ಸಂಸ್ಕೃತಿ, ರಂಗಭೂಮಿ ಚಟುವಟಿಕೆ ನಶಿಸುತ್ತಿದ್ದು, ಸರ್ಕಾರ ನಮ್ಮ ಕಲಾ ಪರಂಪರೆಯನ್ನು ಉಳಿಸಿ ಬೆಳೆಸಲು ಸೂಕ್ತ ರೀತಿಯಲ್ಲಿ ನೆರವಾಗೇಕು. ಕಲಾವಿದರಿಂದ ಕಲೆ ಉಳಿಯುತ್ತದೆ, ಬೆಳೆಯುತ್ತದೆ ಎಂದರು.
ಟ್ರಸ್ಟ್ ಅಧ್ಯಕ್ಷರಾದ ಎಂ.ಎಸ್. ಶಾಂತಲ ಮಾತನಾಡಿ, 2014ರಲ್ಲಿ ಪ್ರಾರಂಭವಾದ ಸಂಸ್ಥೆ ನೂರಾರು ಕಲಾವಿದರು ನಮ್ಮಲ್ಲಿ ತರಬೇತಿ ಪಡೆಯುತ್ತಿದ್ದಾರೆ. ನಮ್ಮ ಕಲೆ, ಸಂಸ್ಕೃತಿ ಉಳಿಸಲು ಪ್ರಯತ್ನಿಸುತ್ತಿದ್ದೇವೆ. ಸಿರಿಗನ್ನಡಂಗೆಲ್ಗೆ ಎಂಬ ನೃತ್ಯರೂಪಕ ಪ್ರದರ್ಶನಕ್ಕೆ ಇದಕ್ಕೆ ಉತ್ತಮ ಸ್ಪಂದನೆ ದೊರೆತಿದೆ ಎಂದರು.
ಖ್ಯಾತ ಚಿತ್ರ ಸಾಹಿತಿ ಸಿ.ವಿ ಶಿವಶಂಕರ್ ಸಾಹಿತ್ಯ ರಚಿಸಿದ್ದು, ಎರಡು ಗಂಟೆಗಳ ನೃತ್ಯರೂಪಕದಲ್ಲಿ ನೂರಾರು ಕಲಾವಿದರು ತಮ್ಮ ಕಲೆಯನ್ನು ಪ್ರಸ್ತುತಪಡಿಸಿದ್ದಾರೆ. ಮಯೂರವರ್ಮ, ಬಾಹುಬಲಿ, ನಾಡಪ್ರಭು ಕೆಂಪೇಗೌಡರು, ಮೈಸೂರು ಮಹಾರಾಜರು, ಕಿತ್ತೂರು ರಾಣಿ ಚೆನ್ನಮ್ಮ ಅವರ ಇತಿಹಾಸದ ಮೇಲೆ ಬೆಳಕು ಚಲ್ಲುವ ಗತವೈಭವ ಇದಾಗಿದೆ. ಇದರ ಜೊತೆಗೆ ಶ್ರೀರಾಮಚರಣಂ, ನೃತ್ಯಭಾರತ, ಪ್ರಕೃತಿ, ಸತ್ಯವೇ ಭಗವಂತ, ಸಿರಿಗನ್ನಡಂ ಗೆಲ್ಗೆ, ಶ್ರೀಕೃಷ್ಣಂ ಒಂದೇ ಜಗದ್ಗುರು, ಬುದ್ದಂ ಶರಣಂ ಗಚ್ಚಾಮಿ ಯಂತಹ ನೃತ್ಯರೂಪಕ ಪ್ರಸ್ತುತಪಡಿಸಿದ್ದೇವೆ ಎಂದು ಹೇಳಿದರು.
ಕಾರ್ಯದರ್ಶಿ ಪರಿಮಳ ಎಸ್. ಮಾತನಾಡಿ, ನಮ್ಮ ನೃತ್ಯರೂಪಕಗಳು ದೇಶ, ವಿದೇಶಗಳಲ್ಲಿ ಪ್ರದರ್ಶನ ಕಂಡಿದೆ. ನಾಡಿನ ಕಲೆ, ಸಂಸ್ಕೃತಿ ವಿಶ್ವ ಮಟ್ಟದಲ್ಲಿ ಪಸರಿಸಬೇಕು ಎಂಬ ಬಯಕೆ ಹೊಂದಿದ್ದೇವೆ. ಇಂದಿನ ಮಕ್ಕಳಿಗೆ ನಾಡಿನ ಇತಿಹಾಸದ ಅರಿವು ಮೂಡಿಸುವ ರೂಪಕ ಇದಾಗಿದೆ ಎಂದರು.
ಹಿರಿಯ ನಟ ಶ್ರೀನಾಥ್, ಅಧ್ಯಕ್ಷರಾದ ಎಂ.ಎಸ್. ಶಾಂತಲರವರು, ಕಾರ್ಯದರ್ಶಿ ಪರಿಮಳ ಎಸ್.ರವರು, ಗಾಯಕಿ ಲಕ್ಷ್ಮಿನಾಗರಾಜ್ ಉಪಸ್ಥಿತರಿದ್ದರು.
Tags:karnataka
