ಕೊಡಗಿನ ಗುಂಡಿಬಿದ್ದ ರಸ್ತೆಗಳಲ್ಲಿ ಸಂಚರಿಸಿದ ಮೇಲೆ ‘ಅಯ್ಯೋ ನನ್ನ ಸೊಂಟ’ ಎನ್ನದೆ ಬೇರೆ ದಾರಿಯಿಲ್ಲ!
ಗುಂಡಿ ಬಿದ್ದ ರಸ್ತೆಗಳು ಕೊಡಗಿಗೆ ಮಾರಕವಾಗಿವೆ.. ಅವುಗಳ ಪರಿಣಾಮಗಳು ಒಂದೆರಡಲ್ಲ… ಇದರ ಫಲಾನುಭವಿಗಳು ಕೇವಲ ಕೊಡಗಿನವರು ಮಾತ್ರವಲ್ಲ, ಇಲ್ಲಿಗೆ ಆಗಮಿಸುವ ಎಲ್ಲರೂ ಅಡ್ಡ ಪರಿಣಾಮಗಳನ್ನು ಎದುರಿಸಲೇ ಬೇಕಾಗುತ್ತದೆ… ಹಾಗಿದ್ದರೆ ಏನಿದು ಸಮಸ್ಯೆ? ಎಂಬ ಪ್ರಶ್ನೆಗೆ ಉತ್ತರ ನೀಡಿದ್ದಾರೆ ಲೇಖಕ ಕಾಯಪಂಡ ವಿಷ್ಣು ನಾಚಪ್ಪ
ಇದು ಒಂದೂರಿನ ಕಥೆಯಲ್ಲ. ಇಂದು ರಾಜ್ಯದಾದ್ಯಂತ ಶೇಕಡ 60ರಷ್ಟು ಜನ ಸೊಂಟ ನೋವಿನಿಂದ ನರಳುತ್ತಿದ್ದಾರೆ. ಮಲೆನಾಡಿನ ರೈತನಿಂದ ನಗರದ ಸಾಫ್ಟ್ವೇರ್ ಇಂಜಿನಿಯರ್ವರೆಗೆ ಎಲ್ಲರದ್ದೂ ಒಂದೇ ಡೈಲಾಗ್ – “ಅಯ್ಯೋ ನನ್ನ ಸೊಂಟ!”. ಈಗ ಸಿಕ್ಸ್ ಪ್ಯಾಕ್ ಬಿಟ್ಟು, ಸೊಂಟ ಪ್ಯಾಕ್ ಮಾಡಿಕೊಳ್ಳುವ ಕಾಲ ಬಂದಿದೆ
ಗುಂಡಿ ಬಿದ್ದ ರಸ್ತೆಗಳು, ಲೆವೆಲ್ ಇಲ್ಲದ ರಸ್ತೆಗಳು, ಒಂದು ಕಡೆ ಎತ್ತರ ಇನ್ನೊಂದು ಕಡೆ ತಗ್ಗು – ಇವೇ ನಮ್ಮ ಜನರ ಬೆನ್ನುಹುರಿಯನ್ನು ದಿನವೂ ಕುಲುಕುತ್ತಿವೆ. ಒಂದು ಕಿಲೋಮೀಟರ್ಗೆ 100 ಗುಂಡಿ ಇದ್ದರೆ ಬೆನ್ನುಹುರಿ ಯಾವ ಲೆಕ್ಕ? ಬೆಳಗಿನಿಂದ ಸಂಜೆವರೆಗೆ ಬೈಕ್, ಜೀಪ್ನಲ್ಲಿ ಹೋದ್ರೆ ಸಂಜೆಗೆ ಬೆನ್ನುಹುರಿ “ನನ್ನ ಬಿಟ್ಟುಬಿಡಿ ಸ್ವಾಮಿ” ಅಂತ ಬೇಡುತ್ತೆ. ರಸ್ತೆ ಗುಂಡಿಗಳಿಗೆ ಹೆದರಿ ಈಗ L4-L5 ಡಿಸ್ಕ್ನೇ ರಾಜೀನಾಮೆ ಕೊಡುವ ಪರಿಸ್ಥಿತಿ ಬಂದಿದೆ . ರಸ್ತೆ ಅಂದ್ರೆ ರಸ್ತೆ ಆಗಿರಬೇಕು, ಮಂಗಳ ಗ್ರಹದ ಮೇಲ್ಮೈ ತರ ಇರಬಾರದು. ವರ್ಷಗಟ್ಟಲೆ ಈ ಉಚಿತ “ಗುಂಡಿ ಮಸಾಜ್” ಅನುಭವಿಸಿದರೆ ಕೊನೆಗೆ ವೀಲ್ಚೇರ್ನಲ್ಲಿ VIP ಆಗೋದು ಗ್ಯಾರಂಟಿ.
ಇದಕ್ಕಿಂತ ದೊಡ್ಡ ಜೋಕ್ ಯಾವುದು ಗೊತ್ತಾ? ಚಿಕಿತ್ಸೆಯ ಹೆಸರಲ್ಲಿ ನಡೆಯುತ್ತಿರುವ ತಾತ್ಕಾಲಿಕ ಉಪಶಮನ. ನಮ್ಮ ಬಹುತೇಕ ಜಿಲ್ಲೆ, ತಾಲೂಕುಗಳಲ್ಲಿ ಬೆನ್ನು ನೋವಿಗೆ ಸರಿಯಾದ ರೋಗ ಪತ್ತೆ ಮಾಡುವ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆಯೇ ಇಲ್ಲ. ಜನ ಏನು ಮಾಡ್ತಾರೆ? ಕ್ಲಿನಿಕ್ಗೆ ಹೋಗಿ ಒಂದು ನೋವಿನ ಇಂಜೆಕ್ಷನ್, ಒಂದು ಹಿಡಿ ನೋವು ನಿವಾರಕ ಮಾತ್ರೆ. ಮುಗೀತು, ಚಿಕಿತ್ಸೆ ಕಂಪ್ಲೀಟ್! ಡಾಕ್ಟರ್ ಹೇಳ್ತಾರೆ “ನೋವು ಕಡಿಮೆ ಆಗಿದೆ ಅಲ್ವಾ?”, ನಾವು “ಹೌದು ಸಾರ್, ಈಗ ಡಿಸ್ಕ್ ಒಳಗೊಳಗೆ ಸೈಲೆಂಟಾಗಿ ಜಾರುತ್ತಿದೆ” ಅನ್ನೋಕೆ ಆಗುತ್ತಾ ನೋವು ಮಾಯವಾದರೂ ಒಳಗೆ ಬೆನ್ನುಹುರಿ “ಹೆಲ್ಪ್ ಮೀ” ಅಂತ ಕೂಗುತ್ತಲೇ ಇರುತ್ತೆ.
ಇನ್ನು ನಮ್ಮ ತಟ್ಟೆಗೆ ಬರೋ ವಿಷಾನೂ ಕಡಿಮೆ ಇಲ್ಲ ಬಿಡಿ! ಈಗ ಇಂಜೆಕ್ಟೆಡ್ ಚಿಕನ್, ಇಂಜೆಕ್ಟೆಡ್ ತರಕಾರಿ, ಹಾರ್ಮೋನ್ ಹಾಕಿದ ಮೀನು ತಿಂದು ತಿಂದು ನಮ್ಮ ಮೂಳೆಗಳೇ ಪೊಳ್ಳಾಗಿ ಹೋಗಿವೆ. ಕೋಳಿಗೆ ಇಂಜೆಕ್ಷನ್ ಕೊಟ್ಟು ಬೇಗ ಬೆಳೆಸ್ತಾರೆ, ಅದನ್ನು ತಿಂದ ನಮ್ಮ ಮೂಳೆಗಳಿಗೆ ಇಂಜೆಕ್ಷನ್ ಬೇಡ ಅಂದ್ರೂ ಸಿಗುತ್ತೆ . ಕ್ಯಾಲ್ಸಿಯಂ ಇರಬೇಕಾದ ಜಾಗದಲ್ಲಿ ಕೆಮಿಕಲ್ ತುಂಬಿಕೊಂಡರೆ L4-L5 ಡಿಸ್ಕ್ ಹೇಗೆ ಗಟ್ಟಿ ಇರುತ್ತೆ ಸ್ವಾಮಿ? ಮೊದಲು ರಸ್ತೆ ಗುಂಡಿ, ಈಗ ಊಟದ ಗುಂಡಿ – ಎರಡೂ ಸೇರಿ ನಮ್ಮ ಬೆನ್ನುಹುರಿಗೆ ಎರಡು ಕಡೆಯಿಂದ ಏಟು.
ಸೊಂಟ ನೋವು ಬಂದ ಮೊದಲ ವಾರದಲ್ಲೇ ಸ್ಕ್ಯಾನಿಂಗ್ ಮಾಡಿಸಿದರೆ ಶೇ.80ರಷ್ಟು ಜನರಿಗೆ ಆಪರೇಷನ್ ಇಲ್ಲದೆ ಗುಣ ಆಗುತ್ತೆ ಅಂತ ವೈದ್ಯರೇ ಹೇಳ್ತಾರೆ. ಸೊಂಟದ ಕೊನೆಯ ಬೆನ್ನು ಮೂಳೆಗಳಾದ L4-L5, L5-S1 ಡಿಸ್ಕ್ ಜಾರಿದ್ದರೆ ಆಗಲೇ ಪತ್ತೆ ಹಚ್ಚಬಹುದು. ಆದ್ರೆ ನಮ್ಮಲ್ಲಿ ಸೀನ್ ಬೇರೆ. ಕೊಡಗಿನಂತಹ ಜಿಲ್ಲೆಗಳಲ್ಲಿ ಇದಕ್ಕೂ ಮೈಸೂರು, ಮಂಗಳೂರಿಗೆ ಹೋಗಬೇಕು. ಅಲ್ಲಿ ಹೋಗಿ ಸ್ಕ್ಯಾನ್ ಮಾಡಿಸುವಷ್ಟರಲ್ಲಿ ನೋವು ನಮ್ಮನ್ನು ಸ್ಕ್ಯಾನ್ ಮಾಡಿ ಮುಗಿಸಿರುತ್ತೆ . 300 ಕಿ.ಮೀ ಪ್ರಯಾಣ, 10 ಸಾವಿರ ಖರ್ಚು, 2 ದಿನ ರಜೆ. ಬಡ ರೈತ, ಕೂಲಿಕಾರ್ಮಿಕ ಇದನ್ನೆಲ್ಲ ಮಾಡೋಕೆ ಆಗುತ್ತಾ? ಆಗಲ್ಲ. ಕೊನೆಗೆ ನೋವು ಕಾಲಿಗೆ ಇಳಿದು, ಕೈಕಾಲು ಮರಗಟ್ಟಿ, ಸ್ಟ್ರೈಕ್ ಮಾಡಿದಾಗ ಆಸ್ಪತ್ರೆಗೆ ಓಡ್ತಾರೆ. ಆಗ ಡಾಕ್ಟರ್ ಹೇಳ್ತಾರೆ – “ಸಾರಿ, ಲೇಟ್ ಆಯ್ತು”.
ಪರಿಣಾಮ, ಈಗ ಊರುಗೋಲು, ವಾಕರ್, ವೀಲ್ಚೇರ್ ಇಲ್ಲದ ಮನೆ ಸಿಗೋದು ಕಷ್ಟ. 30ರ ಹರೆಯದಲ್ಲೇ “ಬೆನ್ನುಹುರಿ ಆಪರೇಷನ್” ಫ್ಯಾಷನ್ ಆಗಿದೆ. ಹೀಗೇ ಮುಂದುವರೆದರೆ ಹುಡುಗಿಯರು ಬಯೋಡೇಟಾದಲ್ಲಿ “L4-L5 ಡಿಸ್ಕ್ ಗಟ್ಟಿ ಇದೆಯಾ?” ಅಂತ ಮೊದಲ ಪ್ರಶ್ನೆ ಕೇಳಿದರೂ ಅಚ್ಚರಿ ಇಲ್ಲ . ಇಲ್ಲಾಂದ್ರೆ “ಸೊಂಟ ಇಲ್ಲದವನಿಗೆ ಸೊಸೆ ಇಲ್ಲ” ಅನ್ನೋ ಗಾದೆ ಹುಟ್ಟಿಕೊಂಡ್ರೆ ಡೇಂಜರ್.
ಈಗಲೇ ಎಚ್ಚೆತ್ತುಕೊಳ್ಳಬೇಕು. ಪ್ರತಿ ಜಿಲ್ಲಾ ಕೇಂದ್ರದಲ್ಲಿ 24 ಗಂಟೆಯೂ ಸ್ಕ್ಯಾನಿಂಗ್ ಇರುವ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆ ತುರ್ತಾಗಿ ಬೇಕು. ಪ್ರತಿ ತಾಲೂಕು ಆಸ್ಪತ್ರೆಯಲ್ಲೂ ಸ್ಕ್ಯಾನಿಂಗ್ ಕಡ್ಡಾಯ ಮಾಡಿ. “ಇಂಜೆಕ್ಷನ್ ಕೊಟ್ಟು ಕಳುಹಿಸುವ” ಕಾಮಿಡಿ ಶೋ ನಿಲ್ಲಿಸಿ. ಗ್ರಾಮೀಣ ಭಾಗದಲ್ಲಿ ಉಚಿತ ಬೆನ್ನು ತಪಾಸಣಾ ಶಿಬಿರ ಮಾಡಿ.
ಮತ್ತು ಸ್ವಾಮಿ, ದಯವಿಟ್ಟು ಗುಂಡಿ ಮುಕ್ತ, ಲೆವೆಲ್ ಇರುವ ರಸ್ತೆ ಕೊಡಿ. ಡಾಂಬರ್ ಕಿತ್ತುಹೋದ, ಕೆಸರು ಗದ್ದೆಯಂತಾದ, ಒಂದು ಬದಿ ಎತ್ತರ ಇನ್ನೊಂದು ಬದಿ ತಗ್ಗು ಇರುವ ರಸ್ತೆ ಬೇಡ. ರಸ್ತೆ ಸರಿ ಇದ್ರೆ ಅರ್ಧ ರೋಗ ವಾಸಿ. ಈಗ ರಸ್ತೆ ನೋಡಿದರೆ ಗೊತ್ತಾಗುತ್ತೆ – ಇದು ರಸ್ತೆಯೋ ಅಥವಾ ಬೆನ್ನುಹುರಿ ಟೆಸ್ಟ್ ಮಾಡುವ ಟ್ರ್ಯಾಕೋ ಅಂತ! ಜೊತೆಗೆ ಇಂಜೆಕ್ಟೆಡ್ ಚಿಕನ್, ಇಂಜೆಕ್ಟೆಡ್ ತರಕಾರಿ ಮಾರಾಟಕ್ಕೆ ಕಡಿವಾಣ ಹಾಕಿ. ವಿಷ ತಿಂದು ಮೂಳೆ ಕರಗಿಸಿಕೊಳ್ಳೋದು ಬೇಡ. ನಾಟಿ ಕೋಳಿ, ನೈಸರ್ಗಿಕ ತರಕಾರಿ ತಿಂದ್ರೆ ಮೂಳೆ ಗಟ್ಟಿ, L4-L5 ಡಿಸ್ಕ್ ಸೇಫ್.
ನಮ್ಮ ಶ್ರಮಜೀವಿಗಳ ಬೆನ್ನುಹುರಿಯೇ ಈ ನೆಲದ ನಿಜವಾದ ಆಸ್ತಿ. ನೋವಿನ ಮಾತ್ರೆ ತಿನ್ನಿಸಿ ಅದನ್ನು ಕಂತಿನಲ್ಲಿ ಕಟ್ಟಿಸಬೇಡಿ. ನಮಗೆ ಬೇಕಾಗಿರೋದು ನೋವಿನ ಮಾತ್ರೆ ಅಲ್ಲ, ನೋವಿನ ಕಾರಣವನ್ನೇ ಕಿತ್ತುಹಾಕುವ ಚಿಕಿತ್ಸೆ. ಮೈಸೂರು-ಮಂಗಳೂರು ಅವಲಂಬನೆ ತಪ್ಪಿಸಿ, ನಮ್ಮೂರಲ್ಲೇ ಚಿಕಿತ್ಸೆ ಕೊಡಿ. ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆ ಕೊಡಿ, ನಮ್ಮ ನೆಲದ ಬೆನ್ನೆಲುಬು ಉಳಿಸಿ. ಹುಡುಗರ ಲಗ್ನಾನೂ ಉಳಿಸಿ
ಮುಖ್ಯ ಸಲಹೆ ಏನು ಗೊತ್ತಾ?
ದಯವಿಟ್ಟು ಮಹಾಜನತೆ ತಿಳಿದುಕೊಳ್ಳಿ. ನಿಮಗೆ ಸೊಂಟ ನೋವಿನ ಜೊತೆಗೆ ಅತಿಯಾದ ಕಾಲು ನೋವು, ಕಾಲು ಸೆಳೆತ, ಮರಗಟ್ಟುವಿಕೆ, ಅಥವಾ ನಡೆದಾಡಲು ಕಷ್ಟವಾಗುತ್ತಿದ್ದರೆ ನಿರ್ಲಕ್ಷ್ಯ ಮಾಡಬೇಡಿ. ಇದು ಸಾಮಾನ್ಯ ನೋವಲ್ಲ. ತಕ್ಷಣವೇ ಒಬ್ಬ ನುರಿತ ವೈದ್ಯರನ್ನು ಭೇಟಿ ಮಾಡಿ, spinal cord ಸ್ಕ್ಯಾನಿಂಗ್ ಮಾಡಿಸಿಕೊಳ್ಳಿ. ಆರಂಭದಲ್ಲೇ ಪತ್ತೆ ಹಚ್ಚಿದರೆ ಶೇಕಡ 90ರಷ್ಟು ಸಮಸ್ಯೆಗಳನ್ನು ಆಪರೇಷನ್ ಇಲ್ಲದೆ ಫಿಸಿಯೋಥೆರಪಿ ಮತ್ತು ಔಷಧದಿಂದಲೇ ಸರಿಪಡಿಸಬಹುದು. ನೋವು ನಿವಾರಕ ಮಾತ್ರೆ ತಿಂದು ರೋಗ ಮುಚ್ಚಿಡಬೇಡಿ, ರೋಗವನ್ನು ಬೇರು ಸಹಿತ ಕಿತ್ತುಹಾಕಿ. ನಿಮ್ಮ ಬೆನ್ನು ನಿಮ್ಮ ಜೀವನ.
ಗುಂಡಿ ಬಿದ್ದ ರಸ್ತೆ, ಲೆವೆಲ್ ಇಲ್ಲದ ರಸ್ತೆ, ಇಂಜೆಕ್ಟೆಡ್ ಚಿಕನ್, ಇಂಜೆಕ್ಟೆಡ್ ತರಕಾರಿ ಇವುಗಳಿಂದ ಹೆಚ್ಚುತ್ತಿರುವ L4-L5 ಡಿಸ್ಕ್ ಸಮಸ್ಯೆಯ ಬಗ್ಗೆ ಜನರಿಗೆ ಎಚ್ಚರಿಕೆ ನೀಡುವುದು. ನೋವಿನ ಮಾತ್ರೆಗೆ ಜೋತು ಬೀಳದೆ, ಆರಂಭದಲ್ಲೇ ಸ್ಕ್ಯಾನಿಂಗ್ ಮಾಡಿಸಿ ಶಾಶ್ವತ ಪರಿಹಾರ ಕಂಡುಕೊಳ್ಳುವಂತೆ ಪ್ರೇರೇಪಿಸುವುದು. ಪ್ರತಿ ಜಿಲ್ಲೆ, ತಾಲೂಕಿನಲ್ಲೂ ಸೂಪರ್ ಸ್ಪೆಷಾಲಿಟಿ ಆಸ್ಪತ್ರೆ ಮತ್ತು ಗುಂಡಿ ಮುಕ್ತ ರಸ್ತೆಯ ಅಗತ್ಯವನ್ನು ಸರ್ಕಾರದ ಗಮನಕ್ಕೆ ತರುವುದು.
